【苦】《英雄聯盟》 - 一件次世代既愛情工具: 《謊言》

「啊……等等！」我立即拉停璇璇：「不如去第二間？我知有間仲好食既！」

『嗯？』璇璇走在我前方回過頭來：『為什麼～～？人家想吃那個…』


老老竇竇，我唔係怕個老闆認得我。

更加唔係怕個老闆會同詩娜告密，影響到我地兩個之間既關係；

而係…我唔想同詩娜共同既回憶…有第二個女仔出現。




試想想，每當我回憶起同詩娜既甜蜜片段時，假設有另一個女仔出現係我腦海之中…係幾咁大罪既一件事。

我雖然唔係啲咩好男仔，甚至係一個壞人，但…我都想可以做返一個專一既人…

再等詩娜返香港名正言順地做佢男朋友。呢點，先係我任天衡而家最想做既事。


我對璇璇既感情，永遠只限於兄妹、同事、戰友之上…絕不超過。



所以，我唔希望璇璇會破壞我同詩娜既感情，就算只係回憶…都唔想。


「璇璇…」我考慮了一番後，便輕輕推開她的手：「我諗有啲野想同你講清楚…」

『甚麼～？』璇璇呆了般凝望著我。

「其…其實……」



唔係喎，我應該講咩好？

雖然我同詩娜表左白姐？但佢都未係我女朋友，謬謬然單方面話詩娜係我女朋友…

好似唔係好尊重詩娜咁喎…

「其實…」我立即改變口風：「我本身今晚約左人……我諗陪唔到你好耐…可能食埋餐飯就要走…」


呼…我終於講左出黎。

呢個唔係籍口，而係真正既苦衷，既唔洗得罪璇璇，又可以返去陪詩娜。

『唔…』璇璇皺著眉說：『沒關係…有天哥哥陪我吃晚飯…我已經很開心了啦…』



「璇璇…Sorry…」

『嗯嗯…』璇璇搖著頭，閃著淚光：『沒差啦～～那…我們走吧～～』


語畢，璇璇就走在我身後推著我前進。

唉…

其實璇璇真係一個好好既女仔黎…

唔單止身材好，而且仲非常溫柔體貼，一聽到我暗示左唔想陪佢，

璇璇連一句說話都無比我聽，立即就應承左我，唔單止咁呀…



佢仲為左怕我尷尬，怕我難受，充起一副懶係堅強既樣子…連少少唔開心都唔想比我見到。

試問一個咁可愛既女仔…我又點好意思拒絕佢呢？


加上璇璇十年都唔黎一次香港，而且我仲識左佢咁耐，為左溝女而唔陪佢會唔會好過份？

假設璇璇係男人，想必我都會同詩娜坦白，話有個台灣黎既朋友，想我陪佢玩一日…我都會講得出口。

我雖然係愛詩娜，但即使係拍拖、結婚都好，兩個人唔係應該有各自既生活圈子架咩？

係咪因為璇璇係女仔，因為佢身材好，我怕自己做錯事先對佢咁唔公平？

換轉佢係男仔既話，我係咪就可以名正言順咁陪佢？




呢一刻我覺得…應該選擇一個正確既決定。


「璇璇，」我停下來，回過頭望著她：「你可唔可以等我一陣？」

『嗯～？幹嘛～？』璇璇抬高頭，張著水靈的眼睛看著我。

「冇…」我展露微笑：「我想打個電話先。」

『嗯嗯～』


璇璇爽快地答應我後，便陪同我去到旺角家樂坊旁的一個休憩公園入面坐低。



而我就走到一邊拎出電話打比詩娜。


當我一拎出個電話時先發覺…

大件事。

電話鎖定螢幕上顯示左五十幾個未接來電…！

而且全部都係詩娜打黎…！

由我放工七點開始打，打到而家成九點！

弊…！

由於我返工既時候，要將電話較到靜音模式，而且我習慣一放工就打比詩娜報平安，

但今日反常地有詩朗同璇璇黎接我收工…！搞到我完全唔記得左睇電話！

當我較返響機準備打比詩娜時，忽然間——


［知不知你在———］

電話就立即響起來。


「喂？」我立即拎起黎聽。

『任天衡——！！』聽筒傳來詩娜吼叫的娃娃音，而且還有幾分沙啞。

「詩娜…」我立即拉低聲線：「Sorry呀…我今日…」

『衰人！！』詩娜打斷我說：『你無事嘛？！』

「我…？」我呆左呆：「我會有咩事…？」

『唔…』詩娜哽咽著：『嚇死我喇！仲以為你有咩事啊…！』

「呃…原來詩娜你……」


我仲以為詩娜會如常地第一句撻埋黎就大聲鬧我…

原來詩娜打咁多次電話黎，並唔係想鬧我…而係擔心我…唔知我出左咩事…

一聽到佢哽咽既聲音…我個心就開始酸起黎…

「對唔住呀…詩娜…」

『哼…！』詩娜淘氣地嗔了句：『死人頭你頭先去左邊啊…！嚇死人咩！』

「我…」我立即想個籍口：「頭先開OT嘛…你知聽日假期…要做減價…特別多價錢要轉…所以…」

『咁你都可以Send個message比人地架嘛！』詩娜嗲聲嗲氣地說。

「但…」我頓了頓：「返緊工點樣send訊息啊…」

『我唔理！』詩娜鬧著彆扭：『你而家即刻返屋企陪我～！我就原諒你啦～！』

「而家…？」


頂…！明明我想打比詩娜講今晚陪唔到佢…點知被佢命令返轉頭添…


「你…」我分析了一下：「你果邊而家唔係下午一點咋咩？唔洗上堂？」

『關你咩事…！』詩娜依舊的說著：『總之你要返去陪我～！哼。』

「但…」

『但～～～？』詩娜嬌聲嗔道：『你唔陪我都得架～！我可以搵第個陪～～』

又係呢句…

最憎就係聽到呢句。

一聽到呢句我都不禁無名火起。


「你聽我講先啦…」我嘗試解釋：「我有個朋友係台灣黎左香港…想搵我食餐飯…我可唔可以食完飯再返去陪你…？還掂聽日你放假…最多陪———」


我講到一半時。


『任—天—衡—！！』詩娜再次打斷：『你記唔記得你今朝應承過我啲咩架…？』

「記得…應承陪到你夜晚訓覺…仲有講故仔你聽嘛…」我一改語氣，接著說：「但我果個朋友識左好耐架喇…佢十年都唔黎一次香港…一晚咁多丫…好嘛？」

『任天衡…』詩娜哽咽著，低聲說：『你朋友重要啲…定我重要啲…？』

「…………」


大佬，我可以點答。

點解啲女人咁鍾意將自己拎黎同啲普通人比架呢？

唔通詩娜感覺唔到架咩？咁梗係詩娜重要啲啦！

但…做人唔係咁架嘛，唔通詩娜重要啲我就要為左佢而將所有朋友都拋低？

真係好唔明啲女人點解要咁迫人。


『你果個朋友…係男定女黎…？』

「…………」我再度沈默。

『任天衡…』詩娜彷彿流著淚沙啞的說：『我今日係學校好唔開心…所以我返左半日就無再返…』

「詩娜…你…」

『原本…我以為你會陪我…』詩娜接著說：『但我知…原來你要返工而唔聽我電話…我當下第一個感覺唔係想鬧你呀…我好擔心你唔知出左咩事…嗚嗚…』

「對唔住呀……」

『你而家無事就好…』詩娜吱聲的說：『你去陪你朋友啦…唔洗理我架喇…』

「對唔住啊詩娜！果個係男仔黎架—！」


呢個，係我對詩娜講既第二個大話。

第一個係隱瞞自己菁英玩家既身份去接近佢…但第二個…我都係為左唔想詩娜難過先講…

但豈料到……


嘟——————

Cut左線…

之後我無論用skype定手機打左幾多次比詩娜都好，都係無人聽…

起初我以為詩娜係蠻不講理，夾硬將自己同我朋友比較要我取捨……

但原來…詩娜今日係過得咁唔開心…咁辛苦。


詩娜第一個想搵既人，就係我…而我竟然想拒絕佢……

我仲係咪人黎？

都不突止，當我問起詩娜今日係應該返緊學時，佢為左掩飾自己難過，怕我擔心而唔同我講…

一切一切…都係我太過自以為是…

我竟然仲咁對佢…我真係……