【苦】《英雄聯盟》 - 一件次世代既愛情工具: 《詭計》

數日後，下午四時左右。


「喂～？」我用膊頭夾住個電話問：「訓醒未呢～？」

『唔…呵欠……』詩娜睡意朦朧，嬌嗲地說：『嗯…醒喇…』

「真係醒左？」我一邊食飯一邊問道。

『嗯……醒左…任…天…衡……』詩娜明顯地仍在懶床的說。



「發夢有冇夢到我呢？」我開了開玩笑。

『無喎…哼……』詩娜在睡夢中仍傲嬌的道：『邊個要見你喎……』

「哈，係咩～」我不自覺地笑了一下：「不過卞小姐，你再唔醒呢，就遲到架喇。」

『多…十分鐘啦……』

「而家你果邊已經八點半喇，你唔係返九點？」



『八點半…？』突然詩娜頓了頓，語調一轉：『下～？！！』

「係啊…我都就黎食完飯咯。」

『喂呀！任天衡！』詩娜立時醒過來：『做咩唔叫醒人地喎！明明叫你八點打比我架嘛！』

「下…」我皺著眉無奈道：「我咪準時八點打比你囉…係你懶左半個鐘床之嘛。」

『啊～～！！』詩娜忽然不知所措：『死喇死喇…實遲到喇～！！』



「咁…」我想了想後說：「唔阻你先喇，你去整野先啦。」

『唔制…！』詩娜嬌嗔道：『我開住speaker，要你陪住我～～』

「咁都得…？」

『好難為你咩～？』詩娜佯裝憤怒的說：『你唔想我可以搵第二個陪我架～！』

「又呢句…咁又唔係既，」我望一望手錶：「但…我lunch time就黎完…」

『咁…咁…』

「一係咁，」我立即建議說：「今晚我一收工就陪到你訓覺啦…好冇？」



『唔……』

「最多講埋故事比你聽喇。」

『嘻～』詩娜語氣一轉，甜絲絲道：『真係既？』

「傻，」我冷笑了一下：「幾時呃過你。」

『…咁一言為定架喇。』

「嗯，咁我做野先喇。」

『嗯嗯～拜拜任天衡～』

「拜拜…」



『啊～』詩娜叫停道：『仲有仲有～』

「咩事？」我將電話放回耳邊。

『做野加油啊～』

「傻婆…」


嘩…呢下我個心真係甜到。

每日我食飯既時候，就差唔多係詩娜起身既時候，所以順理成章地，我每日都會擔當起叫醒詩娜呢個重要責任。

唔知大家覺唔覺，女仔…係岩岩訓醒時…果把聲係最好聽，最吸引人。（當然有起床氣另計。）



而每一個女仔，無論平時有幾粗魯，有幾惡都好，係岩岩起身懶床果一刻都會嗲到好似一隻貓仔咁…咁純咁可愛。

而如果你有幸聽到呢種幸福既聲音，想必個女仔都應該係對你有好感先會要你叫佢起身。

午餐時間可以同詩娜傾電話，就好似為忙碌左半日既我打左枝強心針一樣咁精神。

然後，我就精力充沛地出返去貨場準備工作。


數小時後。


咔嚓——





『喂阿衡，你係度就岩喇。』超市經理從經理房走出來：『呢度有份表，你跟住執執啲貨架佢，聽日做特價。』

「哦……」我接過份A4紙後一望：「嘩…咁多？」

『係啊，』經理托一托老花眼鏡：『果個Parttime女仔又無返工嘛，咪你頂埋囉。』

「下…之但係，」我望一望隻錶，原來已經七點幾：「我今日返早架喎……仲有一個鐘就收工…」

『咁咪岩囉！』經理奸笑著：『拿，阿衡你爽啲手，喇喇聲做完、喇喇聲收工，最多你做哂我即刻比你打卡走人喇，有你著數啦？』

「哦…」

經理將工作交完比我後，就一臉風騷地走左去。

其實我地呢間超市唔係好多人，每日返工都只係得五個長工，同一個讀緊書既parttime女仔。

不過，你知果啲parttime成日都話學校有野要做，次次都有籍口射波架啦，但奈何佢係經理個女，所以大家都吹佢唔脹。

於是，本應該係兩個人既工作量…一下子就全部推哂係我身上面。

我望住手上既呢一疊A4紙…我真係望唔透，我望唔清…到底我仲有幾耐先可以返屋企休息。

唉，即使岩岩同詩娜傾完電話有幾精神都好，工作左一陣都會消失得蕩然無存。

其實近呢一個幾月，我每晚都同詩娜傾到好夜，有時又要趕客人啲帳號…真係搞到我抖唔到氣咁制。

好奇怪地，明明每日返到屋企都會好攰好想訓覺，但唔知點解…一聽到詩娜果把既甜美溫柔…又鍾意鬧人既聲線，我整個人都會精神起黎，老虎都打死幾隻。

唔通…呢啲就係愛既力量？

不過我都係人黎，精神過後所換黎既…係多幾倍既疲倦。

「唉…屌……唯有頂硬上…」

我拎住份一星期出一次既減價表，走到貨架上根據指示放上適當既價錢牌，等其他同事收鋪後，就會拎走表面果個原價牌，待明天正式減價。

幾經辛苦，足足OT左半個鐘…等到天色完全入黑先可以收工。

「經理…」我拎住份表，拖住疲憊既身軀走到經理房前：「搞掂哂喇…」

『哦？』經理姿悠地坐係椅上，望一望個鐘道：『幾快手喎，得啦，打卡走喇。』

「好…唔該…」

咔嚓——

咔—

經理批准左我收工之後，我就入倉準備換衫打卡走人。

經過左一日既辛勞，我終於都可以返屋企繼續陪詩娜，無論係陪佢打機又好，傾電話都好，只要聽到詩娜把聲…我就心滿意足。

「喂～」我換好衫走到門口的收銀處，向啲阿姐炫耀：「走先啦。」

『走啦走啦！死仔包！』一個阿姐說道。

『咁早收工去溝女呢？』另一名阿姐問道。

「唔係唔係…」我搖搖頭：「返屋企之嘛。」

『哦？係咩？』收銀阿姐蹙一蹙眉，望向門口：『咁果個等左你半個鐘既女仔，邊個黎架？』

「女…女仔？」


聽到阿姐咁講，我即刻呆左一呆，然後立即回望向超市大門外的花圃處。

係果一刻，我腦海入面不斷浮現出詩娜既樣貌。

唔通…佢太掛住我所以走返黎搵我？！定係……

但無幾秒之後，我始終都見唔到詩娜既身影。

係花圃坐係度既人，就只有幾個阿婆同阿伯，根本就無咩女仔係度等人。

而且佢地每個都年過六十，有啲係度捉棋，有啲係度撥涼，有啲係度摔腳趾…

屌，好心啲收銀阿姐唔抵得人地早收工就咪玩人啦！

「邊有咩女仔啊，咪玩———」

就係我講到一半既時候。

啪——

『喂～！』

忽然間，我身後有一股力量拍落黎，令到我成個人立時目瞪口呆。

而我面前既收銀阿姐，無一不露出一個淫邪既笑容，就好似笑我帶女仔返工咁。

然後我立即擰轉面，係我面前出現既……

竟然唔係詩娜。

雖然當下我好失望，但內心仍然係一頭霧水。

因為，我面前出現既……係一個我未見過既女仔。

「呀…呀…」我支支吾吾地說：「你…你係？」


眼前既呢個女仔…我雖然未見過，而且亦算不上什麼國色天香。

不過，少女既身材十分矮小，我諗只有155左右，高度只係去到我心口既位置，我就好似個巨人一樣企係佢面前，而少女只能抬高頭傻笑地望住我。

但…更重要一點。

頭先都講過…少女既身材好矮…所以以我既高度，足以俯瞰留意到一條深…深…深不見底既乳溝。

少女著住一件吊帶深灰既小背心，露出兩條纖幼既玉臂，但雙手之間既胸部卻十分鼓脹同凸出，雪白既頸脖下果兩團嫩肉簡直好似就黎跌出黎一樣。

我明明望住佢個樣…但視線竟然不禁被吸引左去下方的目標之上。

太…太可怕…簡直係人間胸器。

當我望到目眩神迷時——

『天哥哥～～～』少女突然走到我身旁，雙手繞著我的右臂：『你記得我嗎～？』

「天哥哥…？」我好奇地呆了一呆：「你係…璇璇？」

『嘻嘻！猜對了啦～！』璇璇雀躍得不禁將雙乳壓在我的手臂上。

「但…點解…點解你會…？」

正當我一頭霧水之時，我離遠望到馬路垃圾桶旁的一個食完煙走過來既身影。

「原來係你…逸朗…」我望住走過來的男人說道。

『哈，』逸朗冷笑了一下：『唔係我仲有邊個知你係度做野丫？』

「但…點解…？」我回望璇璇：「你唔係後日先黎香港架咩…？」

『呵呵～』璇璇喜孜孜地笑著：『人家打算給你一個驚喜嘛～！』

『哈，係呀，』逸朗插嘴道：『璇璇話想早啲黎香港見你喎。』

「見我？」

我望住逸朗皺一皺眉，只見佢個樣非常奇怪。

唔單止個樣，甚至連行為、言語都十分奇怪！

相信逸朗同我一樣，都望到璇璇廟細燈籠大既身材，試問逸朗咁咸濕，又點會肯放過呢件胸器？！

而且，逸朗同我一樣都未見過璇璇既真身，唔好話逸朗咸濕，就連我心有所屬都情不自禁地起左生理反應！

到底逸朗有咩詭計………