自殺以後，進入了RPG的世界: ☁風龍王

血如泉湧。
龍既鮮血灑落去我既臉頰之上。
熱血係我面上蒸發，燒傷我既皮膚。

致命一擊。
一劍插落去龍王既頸椎到。
就算係龍王，都未必承受到咁重既傷害啦。

龍王發出巨大既慘叫聲。
大到四圍卷起暴風。




我比暴風甩左落地上，我勉強用劍插落地上，緊握住劍柄先無比暴風吹走。

叫聲慢慢由咆哮轉變為悲嗚。
然後龍王就訓左係地上面。
張開雙眼望住眼。

暴風停左。
我爬返起身。
佢未死，係時候比佢最後一擊。
但係我身體，都開始承受唔住頭先幾次既攻擊。




只可以以劍作拐杖，緩姍走過去。

龍既眼睛依然想要撕開我。
佢張開口。
吐息攻擊。

明明身負重傷，但係依然有巨大既破壞力。
不過正因為佢受左重傷，瞄準唔到。
佢打偏左。
無直接打中我。




但係強烈既衝擊波輕輕擦過我半身。
我左邊身完全失去左知覺。
我唔敢確認自己既傷勢。
大概我左邊半身完全蒸發哂。
就算我望過去，都唔會見到左手左腳，只可能見到血肉模糊既內臟。

然後，我繼續係地上面蠕動過去。
每移動一公分，地上面既尖石就撕開我內臟一寸。
我只可以感覺到我全身都係血水。
但係我已經聞唔到血既味道。

我身體有幾多既機能已經壞掉呢？
即使係咁，我右手都無放開把利劍。

「區區……人類……」




龍王都無乜氣。

可能連吐息都發動唔到啦。
可能連張開嘴咬我咁簡單既事，佢都已經做唔到。

係兩敗俱傷？
唔係，係贏左。
人類會絕種係既定事實。
反正得我同溫蒂妮係無可能繁衍到下一代。
只不過，以人類之身戰勝大自然既象徵……
感覺都唔差。
呢場戰鬥，將會以人類既勝利告終。

去到龍既面前。
我先發覺，我無力氣揮動劍刃。




我連最後一擊都做唔到。

可惡……
只係差少少……
只要……
只要我有多少少力氣既話！
可惡啊！
太陽神！
你係咪真係存在？
只要少少！
只要少少！
只要比多少少力氣我，只要比我揮得郁今次就得！
只係郁少少姐！
呢個係人類最後，亦都係唯一既願望！
人類已經絕種啦，請袮賜予我最後既力氣，滿足將死之人最後既願望！





劍，我緊握住劍。
大叫一擊。
力氣……我先發覺，我真係仲有少少力氣。
舉劍，一揮！
上啊！
去死啦！
風龍王！

風龍王用埋最後既力氣跳起咬我。
我已經無哂感覺。
連痛楚，都感覺唔到。