自殺以後，進入了RPG的世界: ❆銀髮的溫蒂妮

疾走。
隨住風龍王既咆哮，天空風雲色變。
成片森林比暴風移為平地。

如我所料，風龍王放開左希爾芙。
然後過黎追我。

我唔明白點解人類會咁弱小。
人類一直相信住太陽神，先唔講太陽神究竟係咪真係存在，但太陽神真係會去幫人類咩？
除左太陽神，就連其他既龍王，一切既魔物都覺得人類渺小。




人類呢一種生物就係好奇微。

如果我並唔係曾經係一個人類既話，或者我都睇唔起人類。
但我既然作為人類生存左兩次，就自然應該深愛住人類本身。

雖然人類係魔物面前同垃圾無分別。
相信魔物係自己既同伴，但實際上魔物只係覺得自己係可有可無既存在，只要阻礙佢，佢即刻會下殺手不念舊情。

雖然人類自身創造既世界體系對人類本身並唔友善。
好辛苦經歷過掙扎先可以係生存落黎，先至可以勉強生存到。





兩個世界黎講，人類都只可以悲慘咁生存。
正因為人類本身既無能。
即使如此，我依然深愛住人類。

或者可能係憐憫之心。
或者可能係人類身上望到我自己既影子。
我只係覺得唔可以放棄佢地唔理。

我並唔係神，亦無資格自居神既個地位。




我只不過想對佢地伸出一下援手姐。
想稍微拯救一下悲哀既佢地姐。

希爾芙。
尖耳既一個女人。
尖耳……同精靈族有咩關係呢？
精靈族，從來未出現過既種族，係由希爾芙呢個人衍生出黎？

望住佢悲憤既心情，令我產生左唔可以唔理既感覺。
再加上，佢係最後既一個人類。

最後既一個人類。
本能已經係弱者既人類，係一夜之間比風龍王殺哂。
如果唔係我救佢既話，希爾芙都會死。
如果希爾芙都死埋既話，咁樣人類真係絕種。





無錯，雖然全世界得返希爾芙一個人，但係人類到呢一刻都仲未絕種。
我要去保護佢，保護人類。
因為係雙胞胎，點都唔可以一屍三命。

風龍王不斷問我我係咩人，我無去答佢。
我只係一尾疾走，避過風龍王既追捕。

雖然我大概可以直接係呢到同風龍王一戰，但咁樣就無意義。
因為呀，呢場戰鬥係屬於人類既戰鬥。
我已經唔再係人類，無資格代表人類同風龍王戰鬥。
無資格代表人類同自然戰鬥。
無資格代表人類同世界戰鬥。

我淨低可以做既，就只有去幫一幫弱小既人類。




等佢地有能力挑戰風龍王。
之後既事，就睇希爾芙既造化。

要上呀，希爾芙。
最後既人類。

不愧係風龍王。
終於我比佢捉到。
巨大既龍爪壓住左我。
龍既眼睛同我對望。

「汝為何人？」

唔洗答啦，你應該都知我係邊個架啦。
去到呢個位，你應該都GET到我係邊個啦？





呢一刻，我諗返起果一個人。
唔係，佢唔係人，佢只不過係一隻蜘蛛。
捨棄左人類既身份，用蜘蛛既身份活下去既果一隻蜘蛛。

我再一次係到諗，人類身份係咪真係咁差？
真係寧願去做一隻蜘蛛，都唔寧願去做人類咩？
如果佢唔係蜘蛛，而係一個人類，成個故事會變成點？
係新手村果陣就已經比其他既魔物殺左？

人類絕對唔係弱者。
我望住風龍王身後既希爾芙。
無聲無息之間跳上風龍王既後背。
用劍插落去龍王既頸椎之上！