我要寫出一個好好好好甜既好故事: 第五章 面癱是原罪
「你地知唔知道自己影響哂成個課堂既秩序?
特別係你,黃家楠,
你知唔知道唔可以喺學校講粗口?」
Miss ma 好激動咁指住阿楠黎鬧,
抵佢啦,哈哈!
「陳天朗你又笑乜野?
唔好以為自己犯既錯比較輕,
我同你講,係一樣既,
同埋頭先你講咗啲乜野......」
Miss ma 起勢咁鬧,似乎冇諗住停,
得閒話下我,跟住又話阿楠,
form one 雞既我們只可以係咁點頭,
毫無縛雞之力(?),
但係我真係好肚餓啊,
我最終都係忍唔住
「Miss,可唔可以比我地買咗野食先?
再唔落去買就無野食架啦......」
miss ma 好驚訝咁望住我,
但係可能見我地得form1咁慘,所以無奈之下只能同意
「見你地都有歉意,今次就放過你地,冇下次啊講明先。」
我同阿楠聽到之後就狗沖落去
「殺啊!」
阿楠忍唔住大喊
「你收下把口啦,成日係到狗叫......」
阿楠因為腳長關係,
狗沖都快過人,我只可以跟著佢後面落樓梯,
去到小食部,條人龍已經散去,
正當我地慶幸之際
「咩話,冇哂撈麵?」
「係啊,仲有湯麵,咁要唔要啊?」
小食部阿姨面帶不屑,
明顯就係覺得我地係壞學生,所以唔賣比我地,
唔得,
士可辱不可殺,
正當我諗住委曲求存嗰陣
「靚女,我知你仲有貨既,不如幫我地撈一撈呢?」
我望住阿楠,
哇你條友真係唔理好醜,
但求就手,
阿姨你都忍心落手既,
人生七十古來稀啊!
頭先仲喺上面笑我大食,
依家就原形畢露,
話唔定佢遲啲男女通吃,
唔係講笑,護住嗰菊花先
「你頭先叫我靚女,哈哈真係好鬼百厭,
點呀,兩個撈麵夠唔夠啊?」
又比佢得喎,阿楠有前途
「起碼要雙倍,即係四個啊唔該!」
阿楠用邪惡既眼神望住我
「睇到未,有得食唔好徙......」
唉佢真係病入膏肓,
救返都嘥藥費!
「等一陣啊,你地坐低先,整完再叫你地過黎拎。」
阿姨好親切咁同我地講
「多謝美人!」
阿楠真係強大到一個點,遲早要叫佢做師傅,
我地行過去canteen,
見到好多人,不過都係有分form咁坐,
見到啲高form 兇神惡煞既樣子,
我地完全唔敢接近,
係人海之中,我見到女神同埋.....winkie,
雖然頭先激嬲左winkie,
但係有女神既加持,刀山我都要坐架啦!
「唔介意我地坐低嗎?」
我當然喺女神而前展現出我風度翩翩嘅一面,
「得啦,咪扮啦,坐就坐啦。」
winkie真係女漢子黎,阿楠見到winkie咁唔做作
「好,夠豪氣,我地今日把酒言歡,不醉無歸!」
「阿楠,夠啦,我地快啲坐低啦,好多人望住架......」
我提醒阿楠希望佢唔好再病發
「咦,你地冇買野食啊?一定係比miss ma 留到太遲搞到冇野買......」
winkie 一眼就睇出我地既處境,
佢估中咗個開頭,
但係勢估唔到我們中,
出了個天才阿楠,
我雖然好緊張,因為正正面對住女神,
我唔知點解由細到大都有嗰白痴習慣就係對住鐘意既女仔,
但唔係好熟時一定會西面,
我上網查過可能係摩羯座既錯,
搞到我平時塊臉已經夠西,
對住女神既時候更加西上加西,
西過摩西
我一路向西......
「我...我食左一啖,唔介意既話比你吃,男仔要吃多啲野......」
汪瑩塊面紅哂,
因為喺我地既年代既人,都以為錫錫就會有bb,
而我一定係聽錯,
我好似聽到佢話比我食佢口水尾?
我望一望阿楠,
哇條友已經將隻手放喺下體到磨下磨下咁,
我驚我再唔接受女神既好意佢會幫袋撈麵加料......
「哦。」
調我點解會咁冷淡回應女神的祝福,
明明我開心到想直接同女神表白,
但係塊面已經西得不能再了,
女神見到我咁冷淡之後,
好似皺左一下眉頭,
雖然仲係好靚但係感覺佢有啲失落,
「咁你地慢慢吃,唔阻你地啦......」
唉陳天朗點解你可以咁白痴無用,
連一句多謝都唔同女神講不特旨,
仲要黑佢面?
你係唔係唔想食女神吃過既撈麵?
我想,
想你又咁既樣?!
我望住女神既背影,
我好失落亦都好心痛,
我竟然第一次同佢講既野就係傷害佢既說話,
或者從第一次既對話,
我就知道,
我並唔配擁有佢......
「阿哥!唔好發呆啦!!!」
阿妹既獅吼功既我活生生扯回現實,
佢望住我既文字,
皺一皺眉頭
「阿哥乜你唔係話寫甜故咩,點解我睇呢段嗰陣睇到想喊......」
我笑一笑拍阿妹嗰頭
「傻妹黎既,一陣就甜架啦......」
其實有陣時阿妹唔發脾氣都幾可愛既
「你應承我最後既結果要係甜故黎,得唔得?」
阿妹眼泛淚光
「得啦我應承你啦,真係好煩啊你。」
我答應阿妹
「唔好喊啦,傻妹黎既,故仔黎架炸......」
估唔到阿妹咁關心我,
搞到我都有少少眼淚,
但係因邊件事流淚我就分唔清。
好啦,
我決定左下一章節要寫甜既方向,
令阿妹唔再失望!