我要寫出一個好好好好甜既好故事: 第三章 現實既殘酷

  我睇返個時間表,今日又真係我煮早餐喎......

咁我唯有死死氣咁去煮左兩個餐蛋麵走餐蛋

「餐肉呢,雞蛋呢,說好的餐蛋呢......」

我好有興致咁唱「說好的餐蛋呢」,

「阿哥,你係到唱緊邊首歌啊,嗰melody咁熟嘅?」





阿妹同佢老婆玩緊四人同心,可惜隊友就唔夠同心斷左線

「哦無野頭先我亂哼姐.....」

如果比佢知道我亂改佢男神既歌,

仲要餐蛋麵冇餐蛋既話,折斷我手腳都似

「哦,無野,都幾好聽啊,吊又輸咗.....」





阿妹一定又係同老婆企喺起點到傾計啦,話咁快麵就煮好,

「阿妹,麵就煮好左,要食自己黎拎。」

我今日唔得閒招呼大少姐,因為我仲未睇我尋日既成果。

  我承認當我見到故事既關注度時,

內心真係好失落,





人點解會失落?咪就係現實同期待反差太大囉,

又唔係話冇人睇既,不過成晚流流長,都係得十幾個人睇過,

係我相信自己既寫作生涯就好似小說中既主角咁,

首先要經歷苦難,各種艱辛之後再成功,

只不過睇小說嗰陣覺得好合理,心諗主角點會一開始屈哂機,

冇哂成長既心路歷程就唔會好睇,

但係真實既情況就係,

總會覺得自己係主角,一做任何事就會成功,





最後得到萬人既景仰,

但我十幾歲先開始發現,

無錯,自己係主角,不過原來其他人都係主角,

為左出演主角你就要爭崩頭先可以,

有時用上壞人既手段先容易得到主演既位置,

從來就冇幸運兒,

只係睇你有幾努力,幾有上進心。





從小唔鐘意同人爭既我,

始終認為屬於你既,點搶都屬於你,

反之亦而,

可能因為呢種價值觀,

我失去左我中學唯一真心鐘意過,祝福過既女仔。



    我係陳天朗,叫得天朗既我當然夠哂開朗啦,

就算升得上黎中學,





我都有信心好快可以識到朋友,

甚至係紅顏,

而當我第一日返中學嗰陣,我就知道佢出現了,

一個長髮及肩,其實係馬尾,皮膚好白同埋最緊要,佢對眼好靚既女仔,

我覺得睇人一定要睇佢對眼,

因為眼睛係靈魂之窗,眼睛靚即係代表,

佢嗰靈魂一定好靚,





呢個方法萬試萬靈,

所以我本能上會排斥對眼唔靚既人,意思就係唔可以喺我生命中佔有重要一席,

總之佢真係好靚,每一堂,

無錯就係每一堂我雙眼都會不自覺咁望向佢,

咁個頭咪會好辛苦?

絕對唔會,因為你嗰頭絕對會擰咗過去,

以配合你既視角,

咁條頸呢?

唉我直接同你講,你成個身都會對住佢,

因為你潛意識為左方便望佢而調整坐姿,

各位女讀者,如果有男仔唔坐向前而成堂,

係成堂都維持向著一個方向,咁嗰邊一定有佢鐘意既人,

呢個係金科玉律,

依家男女平等啦,

各位女士見到啱心水而又有以上特徵既男仔就大膽去馬啦,

戴定頭盔先,我唔知道呢個情況適唔適用於女仔,

各位男讀者唔好亂黎,

除非你有我咁靚仔,

總之我由返學到放學既目標都係得一個,

就係望住佢,

個陣Form one 雞真係好容易滿足,

尤其係嗰種你眼望我眼,跟住又避開各自眼神既刺激,

就好似華山上高手過招咁,見招拆招,鬥內功既情況,

我以為小說既情節唔會發生,

點知原來小說都只係抄襲現實既情況而寫出黎既,

不過如果冇之後既情況,可能我過去嗰幾年就唔會咁痛苦,

不過如果你問我後唔後悔,

我會選擇黎多次,但係之後唔後悔,

好好修補美中不足嘅中學生涯。

  「點呀你好似諗左好耐啦喎,仲未決定好寫咩?」

阿妹一定係玩緊問問Dr.Hell,

從聽到係咁掉落街重生既音效就知道

「無,我諗起左少少往事,而且我已經諗好要寫咩。」

我此時滿腦子想法

「真既?記得寫我記得寫我!」

阿妹聽完之後好興奮。

對了,標題就是這個吧

「我與她相處了一個月,只需要六年就可開始忘記她」

我在鍵入文字途中,不自覺地微笑了,

也不知道是釋懷的笑還是其他意味。