《唔係啩！我間房幅牆有個窿》: Chapter 28
這天晚上正是死妹釘的生日，還好今天整天都下著雨，看來今晚送禮的計劃不用推延了。
等到洞孔出現，我馬上搖了搖繩子。
「點呀大叔，到底今晚有咩事要搵我? 」
「嘿嘿！有啲嘢比你。」然後我將包好的項鍊從洞中傳給她。
死妹釘接過後疑惑道﹕「咩嚟㗎? 」
我神秘兮兮﹕「你打開睇吓咪知囉。」
頃刻，我聽到她充滿喜悅的尖叫聲﹕「嘩！條頸鍊好靚呀！」
我馬上向著洞口大叫﹕「死妹釘生日快樂！」
她喜道﹕「你點知我生日㗎? 」
「嘿嘿！總之我有辦法知道啦！」
「我戴起咗啦！你睇吓靚唔靚? 」
我透過洞看了看，這條項鍊跟她很配，自己買東西給自己果然是最合心意的。
我由衷道﹕「條鍊真係好襯你喎，你戴得好好睇呀！」
「嘻！多謝你呀大叔！我好鍾意呀！其實呢......嗯......」
「嗯? 咩呀? 」
她的聲音好像好點害羞的﹕「我......嗯.....我想講......嗯...都係無嘢啦......」
甚麼事情? 忸忸怩怩的，她平時不是很爽快的嗎?
「咩事呀? 有咩心事咪講囉，鬱住鬱住好易有病㗎。」
她終於說出來了﹕「無...無咩特別呀，想問吓你...你同你嗰邊個阿靜點咋嘛。」
我還以為是甚麼事情，原來只是想八卦。不過我還沒打算據實回報，我只是道﹕「同之前差唔多啦，會出嚟食吓飯睇吓戲咁囉，算係開始熟嘅朋友囉。」
她的語氣聽起來很失望似的﹕「係呀......咁睇嚟好似發展得唔錯喎。」
我不以為意﹕「算ok啦。」
她突然有點難以啟齒﹕「咁...咁如果呢......最後你發覺同佢都無可能做到情侶嘅話，你會唔會同佢講清楚你鍾意佢呀? 」
「做咩突然問呢啲假設性問題呀? 」
「你...你答咗我先啦！」
我想了好一會兒，道﹕「嗯......但係我諗唔到有咩原因令我同佢完全無可能做情侶喎。」而且事實上我們已經是情侶了。
「咁...咁你當係同佢將會long distance，隔好耐先可以傾到一次偈，同埋可能以後都唔會再見咁啦。」
「咁呀......咁我一定會同佢講我鍾意佢囉，因為真係可能呢一世都唔會再見，唔講嘅話我一定會後悔。」
她的語氣聽起來很落寞﹕「就算......就算明知無可能都講? 」
我肯定的道﹕「講！起碼比佢知道我嘅心意呀嘛。而且呢個世界又點會100%無可能喎，可能講咗之後，會變得有可能呢！」
她沉默起來，沒有回應我。於是我問﹕「喂你諗緊咩呀? 做咩唔出聲嘅? 」
死妹釘猶豫道﹕「大叔呀，其實呢...我有啲嘢想講呀。」
「嗯? 咩呀? 」
「我...我想話呢......我鍾意咗另外一個人呀......」
真的嗎? 太好了！看來她已經走出了陰霾。
我興奮道﹕「係? 咁咪好囉！佢點㗎? 」
她沒有回答我的問題，逕自道﹕「不過呢...我同佢係無可能㗎啦......」
我不明白，為甚麼這樣說? 正想追問她的時候，我想起了她剛才問我的問題。
「你頭先問我嗰啲問題......你同嗰個男仔係long d? 」
「嗯......我同佢完全係兩個世界嘅人，仲要好耐先傾到一次偈。遲啲......可能無機會傾偈添呀......」
我想了想，認真道﹕「同佢講清楚啦，趁你仲可以同佢講，如果之後真係無機會嘅話，你真係會後悔一世㗎！」
「真係講? 」
「講！」
她靜沉了一會兒，然後道﹕「大叔，我......我想話............」
她究竟想說甚麼? 吞吞吐吐的。
卻說我想追問她的時候，她突然驚叫起來﹕「大叔！大叔！個窿越嚟越細啦！」
我聞言一看，那個洞果然越變越細，不一會又變回普通的牆壁，我已經聽不到死妹釘的任何聲音了。我瞄出窗外，雨水正好端端的下著，難道這個洞從現在起就會永遠消失?
之後的那幾天晚上都有下雨，我都有待在牆側等待著洞再出現，但卻事與願違。我有點失望，畢竟我還沒有好好的跟死妹釘道別，而且我還欠了她一頓飯和一個願望。早知道就叫那邊的『我』幫我還這個債好了。
這個星期天起來的時候，我看到床尾有一張紙。
難道是死妹釘留言給我?
我看畢後，卻令我整個早上神不守舍。
「大叔﹕
我知道突然間寫呢封信比你可能會令你好困擾，但係我諗起你嗰晚同我講嘅嘢，我一諗到個窿會隨時消失，我同你可能永遠都唔會再見嘅話，我呢一世都會後悔無同你講清楚。係，我係鍾意你。自從嗰日你幫我嚇走個衰人之後，我對你就開始有一種特別嘅感覺。我開頭都以為只係當你係一個好好傾，好夾嘅朋友，但我後來終於知道呢種感覺同朋友唔同。我會開始掛住你，好想見到你，好想聽到你把聲。你知唔知呀? 我而家每一晚都會喺度等個窿出現，我好希望個窿每次出現嘅時候都可以聽到你把聲，聽到你嗌我死妹釘。不過睇嚟我同你嘅緣份就嚟結束啦......呢封信我前幾晚喺個窿消失之後就寫定，希望見到個窿一出現就即刻比你。我唔知你可唔可以睇到，如果睇到嘅話，如果個窿真係可以再次出現嘅話，你要記得你差我一個願望——你可唔可以同我講一次『死妹釘，我鍾意你』?
死妹釘」
死妹釘她......她喜歡了我......
要直接跟她說我和Carmen已經在一起? 我們是兩個世界的人，根本沒可能? 不！不！她自己也知道我們根本沒可能，她也沒要求我做甚麼。但她是因為我才會和『Ron』弄成這個樣子呀！我可以怎麼補救? 我也希望死妹釘可以像水靈一樣幸福快樂啊！
我應該怎麼做? ......
「喂！做咩今日三魂唔見咗七魄咁嘅? 」
「吓? ......哦...係你吖......」我差點以為眼前的水靈是死妹釘。
「係我呀。做咩呀? 同阿靜嗌咗交呀? 佢呢? 唔見人嘅? 」水靈東張西望，想從老人堆中找出Carmen。
「佢今日唔得閒呀，所以唔嚟啦。」
水靈碎碎唸﹕「吖！佢之前都會個個星期日嚟探楊伯母個喎，而家有你呢個男朋友做替工就慳番喇? 」
我沒好氣道﹕「你咪講到佢咁不孝啦，佢知道今日嚟唔到，專登噚日嚟咗啦。」
她恍然大悟﹕「哦...原來係咁。」
我看著她的臉，有點將她和死妹釘重疊了。
她發現我凝視著她，訕笑道﹕「做咩眼甘甘咁望住我呀? 你唔係鍾意咗我呀? 你諗都唔好諗呀！」
現在是『你』喜歡了我呢！我翻了翻白眼﹕「Sorry呀，今世我留咗比Carmen喇。下一世啦，下一世你早啲嚟排隊都可能有機會嘅。」
她「嘖」了一聲﹕「我都未見過啲男人咁唔知醜㗎！」
我想起死妹釘給我的那封信，我覺得問水靈的話應該可以找到令死妹釘幸福快樂的方法。
「喂，你今晚得唔得閒呀? 請你食飯吖。」
她訝道﹕「咁好死? 有咩企圖先? 」
我揶揄她﹕「呢個世界係得阿Ron呢個男人先會對你有企圖囉！我係想多謝你幫我買嗰份生日禮物咋。」
水靈拍了我的後腦一下﹕「死啦你去！」然後她又道﹕「算你識得知恩圖報啦。咁啱阿Ron今晚又要見客，我就免為其難同你食飯啦。」
這個女人......她以為自己是誰? 我繼續翻起我的白眼﹕「謝主隆恩！多謝老佛爺！」
義工活動完結後我們到了一間西餐廳吃飯。
我將餐牌遞給水靈﹕「點菜啦，老佛爺。」
「好吖。」她興致勃勃的看著餐牌，然後召來侍應在餐牌上點來點去。
我嚇了一跳﹕「點咁多? 你食得哂㗎啦? 」
她拍一拍心口道﹕「放心啦，我好肚餓。」
應該是時候問問她的意見吧。
我裝作漫不經意﹕「係呢，你覺點樣先可以令一個女人幸福快樂呀? 」
水靈失笑﹕「做咩呀你? 突然間問啲咁嘅問題? 你好想令阿靜幸福快樂咩? 」
我白了她一眼﹕「廢話！緊係想啦！」
「咁你對佢好啲咪得囉，阿靜份人好簡單㗎咋。」
我乘勢問﹕「咁如果係你呢? 你覺得點先係幸福快樂呀? 」
她指著自己﹕「我? 」她想了想道﹕「其實我都好簡單㗎咋，我鍾意嘅人佢又鍾意我，而佢又對我好咪得囉。」
「咁如果你鍾意嗰個無可能同你喺埋一齊呢? 」
「咁呀......咁我應該會搵過第二個。」
「但係你唔係鍾意原先嗰個人咩? 」
「咁你都話無可能咯，咁唔通嘥自己時間咩? 可能之後又會搵到另一個雙方都鍾意，佢又對我好嘅呢。」她頓了一頓道﹕「話時話，你問我呢啲嘢做咩呢? 你而家同唔到阿靜一齊咩? 」
我馬上搖頭﹕「唔係唔係，純粹想知道吓啲女人點諗啫。」
她瞪了我一眼﹕「奇奇怪怪。」
原來水靈的想法是這樣的，那麼......
太好了！等了不知道多少天，這個洞終於再次出現了。
我馬上搖著繩子，死妹釘那邊立刻噹啷噹啷的亂響。
死妹釘的聲音直接從洞裏傳過來﹕「大...叔......」她的聲音聽起來好像有點不知所措。
我深呼吸一口氣，正色道﹕「我睇咗你比我封信喇。」
她沉默起來，沒有回答我，我續道﹕「你可唔可以幫我做一件事呀? 」
「咩...咩呀? 」
我將一封信卷起來塞進洞裏，並道﹕「你幫我貼張郵票，然後寄咗佢吖。」
「吓? ......」她的聲音充滿了疑惑。
我柔聲道﹕「你可唔可以應承我，唔好睇封信，貼完郵票就寄咗佢。」
「......我應承你......」
「咁好喇，咁我哋......」大概，是時候說再見了。
她突然大叫﹕「大叔！............你係咪...唔會再同我傾偈喇......」
我苦笑﹕「我呢邊前排落咗成個禮拜雨個窿都無出現......我諗就算佢仲會出現，都唔知係幾時啦......」
她哽咽道﹕「大叔...你仲差我一餐飯同一個願望呀......」
我也感到我的眼眶熱熱的，強顏歡笑道﹕「餐飯就唯有繼續有拖無欠啦。至於個願望......我一定會幫你實現嘅。好啦，今次真係拜拜啦。」
死妹釘哭起來﹕「嗚......大叔...嗚......」
我安慰她﹕「傻瓜，無咗個咸濕大叔裝你咪仲好！係咪? 」
她哭得更兇，我狠下心腸將連繫著我們的三條繩子一下子剪斷，失去支撐的風鈴和鈴噹馬上掉到地上，發出一陣亂響。我又馬上將準備好的紙黏土封住洞口，死妹釘的哭聲頓時消失了。
我逃出廳呆坐在沙發上等待著天明。
我相信『自己』，我這樣，是做對了吧！