【猴年血腥】《拜完年，我畀狗咬死左》: 4. 十世修為的第九世 (5)

「總之，你依加明白未？」他一臉正經問。
 
已不打算回答我的問題。
 
「未啊，仲未明點解龜可以跑嬴兔仔。」我說。
 
「咁係因為……」恭子逞衝口答，不自覺地又露出佩服的表情，「第二世既你投放左超過三千功德去強化佢。」
 
「咩意思？你明明話三千功德係上限。」我說。
 




「準確黎講，佢強化左三個項目，每個項目三千功德。」恭子逞佩服得不禁搖頭起來。
 
「分別係靈性、毅力、腳力，佢一共投放左九千功德落隻龜度，幾乎用晒佢嗰世所累積既功德。」他說，「真係痂線。」
 
聽罷，我卻覺得有點合理。
 
不，應該是終於明白，明白為什麼有龜會持續鍛鍊自己，會向上挑戰，會留下傳奇。
 
因為第二世知道，要成就傳奇——
 




「投資係自己身上，總係唔會錯。」我認真地說，「尤其係偉人，目光遠大，更加會奮身去拼搏，唔可以手軟。」
 
「點都好啦，你似乎，已經明白左個玩法。」恭子逞微笑說，「咁你陣間，準備好既話，就可以去第二個房間，認領下一世既命。」
 
「提醒你一次，你目前有九萬四千三百二十七分。如果陣間我地匹配比你既命唔啱心水，你可以比二百分功德再揀過，之後亦可以再選擇強化。」
 
「強化，唔知會唔會有超能力呢？」我偷笑。
 
「你係有權、有時間去思考同計劃來生。」他說。
 




「不過呢，我建議你慳啲洗。萬一洗多左，下一世補唔返用左既功德，你就白廢上幾世既心血。畢竟，你唔係偉人。」
 
「得喇。」我囔他別煩心。
 
在他離開房間去做一些準備之際，我獨留這裡，模擬一下第二世下棋的身姿。
 
「如果係第二世既話，會點安排我既下一世呢？」
 
我右手夾指，高舉右臂，裝作下一著棋，「噠——」
 
「會坐享其成，定係會再下一城？」
 
我夾指提臂，再下一子，「噠——」
 
「但係……陣間就要投胎既話……」我內心一沉，想起了一個人。




 
「孫宣，我係咪就要忘記妳？」