《十年又過去，我對你仍耿耿於懷》: 12

「有咩唔衰得呀？」我不停在笑，她在說的是什麼呀？ 
「唔知呀！」她的聲音開始尷尬了！嘻！ 
「算啦算啦！其實，而家諗一下，你嗰下拉住我係無錯㗎！我咁樣鳩衝都無用，分分鐘會傷害到你。」 
「喂！唔准講粗口呀！」 
「妖，邊度有講粗口呀？」 
「你話鳩衝嘛！」 
「哦！你都講粗口，咩呀！重複我句粗口就唔係講粗呀？」 
「你真係好無聊呀！」 
「爛口琪，爛口琪⋯⋯」 
「乜呀！總之你唔准再講粗口！再講粗口就要罰！」 




「你咪一樣咁無聊⋯⋯罰咩呀你想？」 
「唔⋯⋯我未諗到！總之，你講一隻字就扣一分，扣十五分就要罰聽我話做一件事。咁好無呀？」她到底知不知道自己在說什麼呀？ 
「咁淨係得罰咋？無獎㗎？」 
「獎咩呀？唔講粗口係你嘅本份嚟㗎蔡先生。」 
「你都戇鳩嘅⋯⋯」 
「一分。」 
「痴線⋯⋯咁都計？」她那把勝券在握的聲音讓我有一點認真起來。 

「咪住先林安琪。」 
「做咩呀？」 




「咁乜嘢叫粗口呀，如果有一日你話『對唔住』都係粗口咁點算呀？」 
「點會呀⋯⋯唉，蔡梓豪你份人真係小氣過女人呀！一陣我會SMS一個名單俾你，之後每一日我都會話你知你俾我扣咗幾多分。咁OK嗎？」 
「是但啦！」 
「你咩台㗎？」 
「People呀！」 
「我都係，咁我一陣SMS你啦！唔講喇，三點幾我一定要瞓喇！」 
「好啦！早抖。」 
「早抖喇！蔡梓豪。」 
「喂⋯⋯喂⋯⋯我有嘢想講呀。」 
「咩呀？」 




「早抖喇！林安琪。」 

沒等我說完，她已經掛線了。 
再過了三十秒，我還沒來得及從對話中抽神回來，我已收到她的短訊。 

「白痴仔，我知你想講無謂嘢㗎！」 
「屌、撚、鳩、柒、閪、仆街⋯⋯今日小豪子已經扣咗一分喇！」 
「:(」 
「早抖！小豪子！」 




我在笑，笑得很甜。 
為什麼我要對這種無聊遊戲這麼上心呢？