短篇散文集: 《傻豬嚟嘅，苦得過做人﹗》

相信大部分人同我一樣，細個個陣好怕苦，無論係食中藥、中藥、苦瓜之類嘅嘢都會避之側吉。

「啊，碗藥好苦啊，唔飲呀呀媽。」

雖然父母用盡千方百計，但我仍然唔敢去飲，咁苦嘅嘢點放入口呀。有一次，我嫲嫲餵我飲藥嘅時候，我都係因為苦而吐返哂出嚟。

「好苦啊，唔飲啊。」

「傻豬嚟嘅，苦得過做人﹗」





細個嘅時候，仍然未知呢句說話咩意思，但總覺得好似好有說服力咁，所以乖乖地咁飲哂啲藥佢。

係小時候，我哋都生活係父母嘅護蔭下，無論咩事我哋都可以避過所有覺得苦澀嘅時候。家人就好似藥丸嘅糖衣，令我哋未感覺到苦就已經吞下咗一件件苦事。

但係人慢慢長大，開始面對各種嘅問題，挑戰，而呢啲事亦都再冇父母係身邊幫忙。我哋只可以依靠自己。面對未來，慢慢想起當日嘅一句：

「傻豬嚟嘅，苦得過做人﹗」

中學嘅文憑試、出嚟工作嘅時候所面對嘅人事關係、相戀失戀、就算有父母係旁邊支持，我哋都只可以靠自己去面對。





習慣咗糖衣嘅我哋係面對人生第一次失敗嘅時候會有個疑問，點解呢件事並唔似我所諗咁發生？

盡全力咁考完嘅文憑試，出到嚟嘅成績竟然連基本入讀大學嘅資格都冇；投入社會工作但遇上「馬屁精」上司；面對自己曾經最愛嘅人嘅另一半並唔係自己……

係遇過好多唔如意嘅事嘅時候，你會諗返起曾經有一句說話深深咁刻係你心入面：

「傻豬嚟嘅，苦得過做人﹗」

之後你開始接觸酒精飲品，感受個種苦澀嘅感覺。慢慢感受到，原來所有入口感到苦嘅嘢，比起人生，都不過係九牛一毛。





二十歲嘅自己，會因為愛情同學業唔如意而糾結，面對自己最愛嘅人同另一個人展開感情而沉淪，學業失意而頹廢。

三十歲嘅自己，會因為愛情同事業不如意而埋怨，經歷過相戀失戀，望住最愛嘅佢同另一個人步入教堂；自己付出所有時間係工作上卻換嚟失業……

四十歲嘅自己，會因為愛情同未來不如意地嘆息，經過咗咁多年，今日身邊嘅另一半，係咪真正嘅最愛？今日一事無成嘅我，將來又會係點？

人生匆匆數十載，經過咗幾十年嘅寒暑，今日再次拎起一碗藥茶，原來比起自己嘅人生，真係稱不上「苦」……

比起人生數十個春秋，一碗中藥嘅苦中帶甘，又算得上甚麼……