短篇散文集: 《你等緊嘅，只係生命中嘅過客》

望住充滿單向留言嘅對話框架，阿恆再一次鼓起勇氣輸入文字。 

「你可唔可以應下我？」 

發送出去嘅信息就好似特首嘅承諾咁，石沉大海。 

幾個月前，阿恆同阿穎依然係無所不談，於阿恆而言，阿穎就好似一個幾乎冇可能實現嘅夢想一樣，遙不可及。但只要每日可以同阿穎傾計，聽阿穎分享佢嘅喜與憂就已經足夠。 

雖然阿恆並冇對阿穎講出自己嘅心意，不過明眼人都可以從對話中，感受到阿恆對阿穎嘅感情。係呢段日子，對阿恆嚟講，可以話係最美好嘅時光。 





不過有一日，阿恆因為一件小事而令到阿穎嬲咗佢，亦都因為咁，阿恆之後所發嘅信息都再得唔到回應。 

或者你會話：你覺得係小事人哋覺得係大事呢。

其實係一段關係入面，發生事件嘅大小從來都唔重要，重要嘅係有人可以藉此去同另一個人斷絕所有來往。唔知大家有冇試過，想結束某段關係，但偏偏搵唔到理由。到之後終於搵到個突破點，從而將個問題化大，再合理化自己永遠唔再搵個個人嘅行動。或者其實個個人都知道，呢段關係嘅結束並不在於一件事上面，而係在於，你已經冇心再維持呢段關係。 

其實，一件事嘅大小影響唔係影響你同佢關係嘅理由，如果你願意繼續維持呢段關係，對方再大過失你都會有願諒佢嘅勇氣。無論係友情，親情抑或係愛情，只要有心去維繫，發生咩事都唔會係斷絕嘅理由。 

若果當對方依然決絕，或者應該離開，而唔係繼續留係原地等待。雖然命運係好虛無嘅一樣嘢，不過如果真係命中注定你同佢會一齊，無論點樣兜轉，最終你同佢依然會再相遇。 





反之，你可能只係等緊生命中嘅過客，來去無期，從而錯失你嘅命中注定……