短篇散文集: 《陌生的密友》

唔知大家求學時期有冇過一位好特別嘅異性朋友，係人前會扮到各不相干，但係背後其實每日都會同對方傾上幾個鐘嘅電話，感覺就好似地下情咁。 

我同阿穎由中一開始識咗六年，除咗一個知心好友知道我哋私下係咁熟絡之外，其他人都以為我哋只係普通朋友，或者係連朋友都稱不上嘅同學。 

呢六年嚟，我哋試過嗌交->冷戰->和好->再嗌交，呢種循環不停咁發生係我同佢身上。有人話過你在乎一個人先會同佢嗌交。冇錯，我係鍾意阿穎，不過我好清楚阿穎唔會鍾意我…… 

一直以嚟，我對阿穎嘅心意，係佢面前都表露無遺，不過當時嘅我覺得，比起其他對阿穎嘅追求者，我有種高人一等嘅感覺。至少佢哋唔可以令阿穎無論開心與否都會打俾我同我分享，而且只要可以一直係阿穎身邊，咩身份都重要。 

但係，人總係貪心，當你得到一啲，就會想得到更多，慢慢我會開始諗：點解我同阿穎嘅朋友開係要咁秘密？點解我唔可以係人哋面前同佢好似平時私底下咁親密？點解連其他追佢嘅都可以同佢玩得咁光明正大，而我就乜都冇…… 





而且呢種關係亦都令到我係一啲重要日子，倒如生日，我都冇可能正日同佢興祝。即使每次話要補祝，到最後，呢樣咁冇意義嘅行動都係不了了之。 

終於捱過咗中學呢段咁唔見得光嘅日子，而今年亦都係佢踏入18歲嘅大日子，我以為終於可以係正日同佢興祝。不過一切都只係我以為…… 

為咗佢生日大費周章準備嘅18份禮物，一個完美嘅計劃就係因為佢俾另一班遲過我約佢嘅人約咗而取消…… 

其實我心知阿穎只係當我係一隻隨傳隨到，又有耐性嘅兵，所謂嘅朋友都不過係為咗安撫我呢隻兵嘅一個掩飾…… 就係佢正日生日當日，我依然照原定計劃去進行，望住維港兩岸嘅夜景，默默地講咗句： 

阿穎……生日快樂……