短篇散文集: 《最後…祝福…》

今日，我出席咗阿詠嘅婚禮。 

著住婚紗嘅佢，好靚。靚到再優美嘅形容詞都冇辦法將佢嘅美表達出嚟。 

記得當日識佢嘅時候，第一眼已經被佢純真而有氣質嘅外表所吸引。

但我就只係敢一直守係佢身邊。 自從中一開始，佢嘅身邊一直有我。只要佢有困難，我都一定盡力幫佢。到之後望住佢嘅情路崎嶇，我都只可以置身事外。 

其實每次，我都好想同佢講：「同我一齊啦，我會全心全意愛你，唔會再俾你流一滴傷心嘅眼淚。」可惜都只係空想。 





慢慢，我由佢嘅一隻兵變到一個知己。我好滿足，或者係我應該要知足。 

到中學畢業，幾乎每日都可以見到佢嘅日子終於結束。佢入到心儀嘅大學，而我……總之就冇可能再成日見面。 

雖然見面少咗，但仍然每晚都會傾電話。有一晚，我收到佢電話嘅時候，我聽到一個我最怕聽到嘅消息：「我拍拖啦！」個男仔係佢同系學長……我唔知個學長係咩人，我唔知佢對阿詠好唔好。我只係知道阿詠又拍拖了…… 

知道呢件事嘅一刻，我異常冷靜，應該係話我情緒上未識反應，但個心就好似被掏空一樣。 

就係呢晚之後，我意識上已經冇哂所有傷心嘅感覺。我唔識發洩負面情緒，唔識流眼淚。我直頭覺得生無可戀。 





可惜地球唔會為咗我一個人而停轉，路都要繼續行，個晚之後我冇再主動搵阿詠。而每次阿詠搵我，我都扮忙收線。久而久之，阿詠都冇再搵我。 

一個月後，我收到阿詠嘅wtapp，只係好簡單一句：「你有冇事呀？我知你唔開心。」偏偏呢句咁簡單嘅關心，就將我一路以嚟被抑壓嘅傷心引爆。 

我不停咁喊，喊到跟本收唔到聲，喊到聲嘶力竭。俾一個自己最愛嘅人所了解係一種幸福；但俾一個自己所深愛，但永遠都唔會愛自己嘅人所了解，對我嚟講係不幸。

係喊過之後，我搵返阿詠，而且我哋亦好有默契咁對感情生活絕口不提。 

就係咁樣，幾年過去，阿詠亦都畢業，出咗嚟做嘢…… 就係幾個月前，阿詠突然同我講：「我同佢結婚啦！你到時記得嚟做我哋主持呀！」 我苦笑咗一下。 





「好丫，恭喜哂喎！」 

就係臨收線前嘅一刻，我同阿詠講咗一番遲咗足足10年先講嘅說話： 

我一直以嚟都好鍾意你，但我知我同你冇可能。所以請你一定得到幸福，如果唔係，我唔放過你架。

阿詠……你一定要幸福呀……