短篇散文集: 《禮物停屍間》

近排發現，原來我間房保留咗好幾件想送俾人嘅禮物。 

無論買嘅定係親手整嘅，而家都靜靜咁躺係我嘅儲物櫃，始終冇辦法親手送到原本應該收到佢哋嘅人手上。 

為咗想裝住一隻大型毛公仔而整親手整嘅大型禮物盒；為咗一個講笑嘅承諾織咗成個月嘅頸巾；為咗保佑阿詠公開試順利嘅學業符…… 

每份禮物都有一個故事，一個對收禮物嘅人嘅一種心意。 

然而今時今日，個份心意已經被與禮物嘅價值掛勾。禮物愈貴先顯得愈有心。到底係社會嘅價值觀被扭曲，抑或送禮變成咗種交易，一種收賣人心嘅交易。 





對我嚟講，只有我重視嘅人，我先會記得係特別日子買禮物俾佢哋。當然我講到送禮講心唔講金咁，唔代表我真係求其係街邊摘條草又當係禮物。 

就好似個手製禮物盒，剩係材料都買咗三位數，砌都砌咗我兩日，為嘅只係想收到嘅人冇咁快發現入面裝住啲咩，只可惜都交唔到去佢手；而條頸巾用嘅雖然只係街邊幾十蚊有交易嘅冷，但由個從來唔識織頸巾嘅男性手上，變成一條都叫帶得上頸而唔會俾人當成意圖吊頸自盡嘅頸巾，都遇過唔少血光之災，真係稱得上有血有汗架，只可惜同其他禮物同一命運，依然送唔到出去。 

如果每份禮物等同一份心意，一個生命，咁我個儲物櫃應該都可以叫做停屍間。 

唔知道今日係呢個心意同金錢掛勾嘅社會上，仲有幾多人在乎禮物嘅心意而非佢嘅價值呢？ 

可能一份小禮物已經表示咗一個人對另一個人無價嘅心意…… 





今日，「停屍間」又多咗一件「屍體」……