短篇散文集: 《惜你所選，選你所適》

每當阿詠有事，我都會係佢身邊。小至考試唔合格，大至離家出走，俾班「偽童黨」蝦，我我都係第一個企喺佢個邊。 

佢可以因為考試唔合格俾人鬧，喊一個通宵，而我就一路係電話入面陪住佢。到第二日瞓醒，佢心情好返，佢會話：「多謝你！」 

曾經，我覺得呢句說話係幾咁窩心。 

又試過阿詠嘅前男友嘅現任女友妒忌佢哋仍然有來往，玩埋啲小學雞「吹雞」遊戲嘅時候，阿詠嘅現任男友竟然䄂手旁觀，仲將所有錯都歸究於阿詠，甚至全部人都想置身事外嘅時候，只有我企係佢身邊。佢為令我牽涉入呢件事而對我講咗句：「對唔住！」 

曾經，呢句說話令我覺得為咗你，我死都唔怕。 





當時嘅我覺得，可以為佢做咁多嘢，一定可以感動到佢同我一齊。但係，慢慢睇住佢初戀，被飛，唔敢拍拖，再拍拖，再被飛……點解我付出咗咁多，佢都唔肯同我一齊？點解我對佢咁好，佢偏偏要揀其他對佢咁衰嘅人？

慢慢，我覺得佢所講嘅每一句多謝抑或對唔住都好刺耳，甚至我每聽一次，我都會好憎阿詠。 

你講呢啲說話有咩用？你知道我做咁多嘢，為嘅並唔係想聽到你講呢幾句。你知道我為嘅只係想同你一齊。如果你跟本冇諗過同我一齊，其實可以連呢幾句話都慳返，因為對我嚟講好無謂。就係咁，每次佢再講呢呢兩句，我就會不其然發佢脾氣，繼而冷戰。 

直到有一日，我發現我錯哂！跟本一直以嚟我都係好自私咁為咗想同佢一齊而付出，所做嘅嘢都係想有回報，我發覺，我最愛嘅都只係我自己。 

如果我真係愛佢，點解要望到成果先付出？ 愛情唔係一樣交易，我冇可能要求阿詠對我嘅付出作出同等嘅回報。如果阿詠單純因為我對佢好而同我一齊，咁佢到底係愛我，抑或係愛我對佢嘅好…… 





係同佢經過無數次嘅冷戰之後…… 

六年後嘅某一個凌晨……當阿恆仍然昏睡中… …電話再次接到阿詠嘅來電…… 

「喂？你瞓緊覺呀？我好唔開心呀，又唔知可以搵邊個，剩係諗到打俾你咋，你攰嘅唔洗理我架啦，去瞓啦。」電話另一頭傳嚟阿詠嘅啜泣聲。 

「得啦，你講啦。」 

（下刪一小時對話內容。） 





係收線前，阿詠講咗句：「恒，多謝你咁夜都肯陪我。」 

今次，我聽到之後，已經再冇恨意，取而代之嘅係昔日嘅窩心。我知道，其實無論有冇可能同阿詠一齊都好，只要可以繼續係佢身邊對佢好，已經足夠。 

惜你所選，選你所適！