短篇散文集: 《只要…你仍然在乎…》

「你同詠又嗌交呀？真係好煩呀你哋。」 

阿詠，一個我鍾意咗六年嘅女仔，正確啲嚟講，我只係佢一隻兵。但我同其他兵唔同，成日都同娘娘嘈，而且次次同佢嗌交嘅理由都層出不窮。好似我冇打俾佢又嗌下啦；我發佢脾氣又嗌下啦；佢唔尊重我又嗌下咁。總之就獲獲新奇獲獲甘。 

有幾甘？嗌一次唔理對方一頭半個月，基本上六年嚟，每個365日都會有至少一半時間各自變咗做方丈（好少氣架）。 

可能你會問，你做兵佢都有資格同佢嘈？大佬呀，娘娘大哂咩，咁有錯就要講架啦，盲從唔代表啱架喎。而最重要嘅係，呢個娘娘又真係會認錯呢下有趣。 

呢六年嚟，我對佢嘅自殺式表白都不下數萬次，但次次表白都同陳振聰上訴一樣，被駁回再駁回。就係咁，我入伍入咗六年。而軍銜由頭幾年嘅二等兵，到今日都總算升咗做高級二等兵，始終冇辦法做到统帥。 





升咗軍銜有咩分別？分別就大囉，普通二等兵你嘅軍備只係錢，你只可以無止境咁付出金錢 。但高級二等兵就唔同啦，你可以貼身照顧娘娘需要。點貼身法？你除咗新手必備嘅錢之外，仲要有紙巾、膠布、經痛配方、娘娘牌m巾……等等。 

曾經我諗過，到底我堅持緊啲咩呢？其實你明知佢冇可能同你一齊；其實你明知無論佢幾感動都只可以同你做朋友…… 

我同詠嘅關係，到底最後會點，冇人會知。或者應該話任何一個人同自己嘅關係，都只有到死嘅一刻先至可以蓋棺論定。可能今日你以為可以長相廝守嘅人，下一秒就形同陌生；素未謀面可以變成你生命中嘅不可或缺。 

我同詠呢幾年嚟雖然成日嗌交，冷戰，但最後總會搵返對方。有好幾次我都以為我同佢從此各不相干，但每每因為某啲原因而同佢重新接軌。真係好似上天一早注定咁，又或者，因為一個好簡單嘅原因，我哋都在乎對方。 

其實無論係朋友，家人定係情人，無論咩原因而有爭執，點樣錯失過，只要仍然在乎大家，終有一日，平衡線都可以有交叉點。 





只要……你仍然在乎……