短篇散文集: 《回歸單純》

「喂，得閒出黎飲杯野嗎﹖」

「下，做咩，幾時先，我唔知得唔得喎。」

唔知由幾時開始，最熟嘅幾位朋友，約出黎嘅時間愈黎愈少，而且每次都會聽到「做咩﹖」。其實一個約會，可以冇任何理由，單純想見一見自己嘅朋友，想同自己嘅朋友談笑風生咁過一日。點解到今日嘅約會變到需要一個理由﹖

人愈大，愈難去不顧一切咁想做咩就做咩。約人出街要諗有咩特別事先約﹔俾人約嘅又要考慮下有冇咩重要事會撞日子。慢慢一次又一次嘅婉拒，約人嘅已經再冇當初個種想見面嘅熱血，拒絕人嘅又唔知出黎做咩，所以選擇唔再提起個約會。

經歷社會上唔同嘅人同事，慢慢會令自己變得唔再單純，任何事都會變得計較，變得有目的。甚至會將呢種諗法投射落自己身邊嘅所有人身上，認為佢地所做嘅事都係為自己利益。





單純呢兩個字講就易，但係有幾多人今時今日仍然可以保持到孩童時期嘅單純，仍然可以對每件事都唔抱有陰謀論嘅睇法﹖行為，思想，情感上，我地甚至連一個小朋友都不如。細個嗰陣，開心就大笑，唔開心就喊，情竇初開嗰陣，不顧一切去追求愛。

如果你話，呢個社會唔容許人咁單純，咁不顧一切。咁點解細個嘅時候，我地又可以咁做﹖唔通細個嗰陣我地又唔係人﹖定係人大咗，思想模式改變咗，變得怕事咗，而要變得咩事都要跟住社會嘅潛規則去進行﹖

咁請你諗下以下一個故事﹕

一對情侶由中學開始拍拖，直到大學，佢哋嘅感情都好穩定，鍾意就鍾意，當中毫無雜質。但當出到黎社會，佢地開始有爭拗，女嘅希望可以有間屋先結婚，男嘅就偏向享樂，唔想因為間屋而迫使自己咩樂趣都冇。慢慢佢哋無論係思想，行為，抑或情感上都出現分歧。

當身邊嘅朋友都認為佢地最後都會分手收場嘅時候，佢哋再一次重現返當年嘅甜蜜。朋友都大感好奇，好想知佢哋點解又會突然間兩者好似重新接軌。





「因為我愛佢」

答案好簡單，但都好值得人深思。兩個人當然係鍾意大家所以先走埋一齊，但當面對住社會上嘅誘惑，生活上嘅各種問題，當呢段感情當中滲入左咁多雜質，仲係唔係當初所憧憬嘅關係﹖愛情，係最容不下任何雜質嘅情感，單純嘅愛，先最真心，最長久。