短篇散文集: 《地獄黑仔王》

對一般唔係好夠運嘅人黎講，願望當然係行多啲好運啦；但對於身為「地獄黑仔王」嘅我黎講，我寧願冇運行。 

點解？你試想像下每當你一行好運，無論件事係咩，都會有幾倍嘅倒楣接踵而來。我有冇作大？ 簡單啲嘅，女神約我出街，我直頭要提自己，千其唔好興奮，唔係就冇架啦。點知原來提自己都已經出事。女神突然個日有野做，仲唔止，一班好日都唔會約出黎嘅老死突然約正同女神出街嘅日子，係女神未話個日唔得閒之前我當然推哂班fd架啦，點知平時出就出，唔出罷就嘅佢地，突然發脾氣係到鬧我，繼而冷戰。咁都未算，最弔詭嘅係女神之後就係俾佢地約左出去，你話仲邊敢奢想行運丫。 

挑，巧合啫，你柒左就柒左啦。下話，當呢一大堆巧合發生係你身上，你又會唔會講得出呢番說話？ 

好，我又講多個巧合你聽丫，一條平時好順暢嘅公路（司機表示），會因為我係架車到塞左半粒鐘。坐港鐵冇事啦掛？你以為啦，我坐開嘅線就係因為我而得閒無事都延遲開出。如果你睇到呢刻都覺得巧合，我恭喜你，起碼你冇我咁黑。 
但我嘅負磁場已經係勁到唔熟嘅fd都會講句，你黑成咁，唔好痴咁埋呀，唔係黑埋我呀。熟個班好啲，會關心下我：「喂，你寫左遺書未呀，唔係一間你意外死左，我咪冇得分你啲遺產」呢頭講完，個頭返到屋企樓下，樓上就無啦啦有人幫我沖涼，個刻我竟然興幸個啲只係水而唔係其他液體。 

係呢個黑到貼地嘅日子，我成日幻想好快過，點知黑左咁多年，衰啲講句，都黑到慣，而冇運行亦都由願望，慢慢變成奢望……