短篇散文集: 《MSN的回憶》

作為一個90後嘅人，msn可算係陪住我地成長嘅「最佳損友」。當年仍然係小學嘅我同大部分同學一樣，每日一放學就趕返屋企，為嘅並唔係咩「放學深切治療部」或者咁乖返去做功課。而係返到屋企即刻on msn，然後同一班人開個聊天室，傾到屋企人叫瞓先忍痛熄左個對話視窗。

當時嘅我哋唔洗理入面嘅人有幾多係識，講說話又唔洗就住就住：小至今日發生過咩趣事、某某老師嘅壞話﹔大至功課上嘅交流(抄考)，某某同學嘅秘密，天南地北都可以講一餐。傾傾下發現原來某個被講事非嘅同學原來係個聊天室到，個陣突然被迫收斂嘅興奮，到之後某同學道出係扮嬲嘅惡作劇，一段段清澀時期嘅回憶都係由msn帶俾我哋。

係聊天室到得悉一直想認識嘅女同學嘅msn，急不及待加佢嘅激動，等待佢回應嘅心情，然後兩人慢慢就由一個群體聊天室縮窄到只係兩人嘅小天地，一段單純嘅愛情就此萌芽。

以前點樣從螢幕上得知道方嘅心情？就係留意佢個人信息。當時個人信息之下仲有個位係顯示對方聽緊咩歌，當你發現佢聽嘅歌有好幾首歌詞都帶有同一意思，再加上佢嘅個人信息，就為你同佢打開左話題。只要估中佢status想帶出嘅信息，你就可以令佢打開心窗同你談心。對比起今時今日，你要點先知對方近況？只要打開facebook，望一下佢有咩動態更新，大概已經知佢發生過咩事，然後最多留低一個讚好，一句說話都冇留低就表達左你對佢嘅「關心」。MSN可以令大家為左了解一個人而花盡心思去猜想佢想表達嘅意思，估中嘅時候腦海亦同時會浮現出「今次仲唔得手﹗」嘅興奮。相比之後，facebook已經著重係到底有幾多人like，每個人都會攪盡心思去諗點樣將經歷或者心事用更有趣嘅方法去顯示係動態更新到，從而去呃多幾個llike。

曾經，我哋想表達對個嗰人嘅關心，我地會親自問佢，陪佢傾心事，今日要表達關心，只要留下一個like即可。其實一個like同你小學交功課，老師俾個「閱」嘅印仔你冇分別，只係話俾佢知，你已經睇左，甚至有冇認真睇過都唔知。





係今年四月八日，陪住我哋成長，記錄住我哋生活嘅msn終於完成佢嘅歷史任務，剩低嘅就只係記錄住我哋成長嘅對話記錄，當中嘅喜或悲，已經變成回憶，當年嘅時光亦都隨住時間去流走。係時代嘅巨輪下，我地已經失去左唔少寶貴嘅時間，錯過咗好多令自己後悔嘅事。係科技發展下，連關心都被一個like取代咗嘅時代入面，希望大家仲記得，關心唔止要用手，而且要用心！