短篇散文集: 《2014》

每年嘅除夕，其實就好似俾人回顧下過去嘅一年發生過嘅事，所有嘅得失。

係過去嘅除夕，大家都可能為新一年定下咗好多目標，有好多夢想，到今年嘅最後一日，你又做到幾多呢？

作為一個地獄黑仔王嘅我，每年除夕都會為自己許下一個希望下年唔好再咁黑嘅願。只可惜事與願違，總係一年比一年黑。終於今年，我將呢個願望，交咗俾一個人，希望今次唔會有反效果啦……

係過去嘅一年，對我嚟講最大嘅改變，莫過於係開始打文。最初都係為咗一個人而打，但打完發現冇理由哂咗啲文佢架，就試圖放上高登，由啲散文到改編太賀嘅同人小說結局，再因為[前度]篇短故得到你哋嘅錯愛，對個毒撚嚟講，突然有咁多人理都真係幾興奮吓架。最緊要嘅係，我應承過阿穎，即使得返佢一個人睇，我依然會繼續打落去。

呢一年改變得我最多嘅人，都真係非阿穎莫屬，借呢到同阿穎講聲，多謝你。





好，公器私用完，入返正題。

每次一到搭正12點，手機往往都係會出現好多新年祝福嘅字句，連平日冷清嘅wtapp group都突然變得熱鬧起嚟。

我望住contact list，望住一堆熟悉又陌生嘅朋友名。曾經有一段時間無所不談，但慢慢就變到唔知點解係大時大節先會互傳祝賀語句。好少少嘅都仲會寒暄兩句，否則就真係各自一句新年快樂，然後就無言以對，攪到好似例行公事咁。

雖然wtapp有個廣播功能，方便人唔洗同一句說話重覆幾十次咁send俾人，但我覺得自己親手一個個send，點講都有誠意啲嘅。亦都係呢個時候，你可以係揀人send嘅中途，個心不知不覺咁排咗個次序，咩人send先，咩人可以遲啲應。由呢啲小事上，其實已經為佢哋嘅重要性分層級。

係新一年，相信大家都有好多願望，但唔好忘記，呢啲願望大都要建基於香港仍然係屬於香港人嘅情況低下，所以為咗自己，為咗香港人嘅未來，聽日元旦遊行，一齊出嚟，爭取屬於我哋應有嘅普選權利。





最後，小毒撚係到祝大家，新年快樂，願望成真。