短篇散文集: 《2013兵役回顧》

我用咗兩日時間去自己過去嘅一年做咗個總結，咁當然我係唔會講發現自己改變咗好多呢啲廢話架啦，成年時間邊個敢話自己冇變，呢秒嘅細胞都已經唔係上一秒嘅細胞啦（可能）。

望住呢篇話長唔長，話短唔短嘅記錄，我見到一隻365日都oncall嘅兵。仲要唔止效忠一個娘娘嗰下勁啊。

當我睇到入哂神嘅時候，阿強走出嚟話：「做兵做得過唔過癮呀？」

「兵呢家嘢，你識條春咩？你估隻隻兵都可以24oncall架？」

「我先唔想識，就係因為你做咁多年兵都剩係識24小時oncall，所以咪抵你做兵做足咁多年囉。」





係我未反駁得切嘅時候阿強繼續話：「嗱，咪話做兄弟嘅點條明路你行，其實你正正常常（至少表面上丫），何必自貶身價走去做兵呢。」

阿強突然大師上身，揮一揮衣袖，雙手擺後咁繼續講：「女呢啲嘢，唔洗對佢哋咁好嘅，閒時鬧下佢，無聊打下佢，有需要就搵佢嚟發洩下，等佢知道邊個先係話事人咁就啱架啦！」

呢條唔止係明路……仲擺明老點我行黑路，呢個情況我剩係諗到某啲地下團體先會發生架啫……

「啊強大師，你估全世界都好似Mary咁忍得你架，俾著第二個唔報警都還拖啦。」

「咁你又錯喎，我對Mary好好架喎！」





「咁你頭先講緊啲咩？」

「人哋條女又唔係我條女，對佢咁好做乜？」

代吾問候令壽堂安好矣！汝娘非吾娘，何須禮待！

俾阿強打斷咗陣，繼續望返呢一年發生嘅事，其實都係好似好唔真實。每次考final都係唔知做乜咁就考完；返工個陣我剩係記得我不停咁調戲女同事或者俾啲女同事調戲，都唔記得原來我有做嘢。

不過無論係做緊啲咩都好，有一個人名都算係我呢一年嘅回顧入面出現得最多次。呢一年，經過佢佢高超嘅訓練技術，我已經成功練到半夜三四點有wtapp聲響起都可以即刻覆到，佢打嚟，明明已經收線我都會自投羅網，打返俾佢。做兵做到咁都可算係精兵啦掛……





不過講真，兵，又有咩好做喎……但我就係做咗咁多年。

所以到咗今年2014年，我為自己定下咗一個目標----唔可以再做兵！

係不消一秒，電話響起娘娘嘅專屬鈴聲……

我拎起電話，按下接聽鍵，之後講咗句……

「係，娘娘，i am ready i am ready……」

及早退役，回頭是岸呀施主。