短篇散文集: 《男人？係咁架啦！》

係唔知幾多年前，三日唔埋兩日都會有女性朋友走嚟問我：「你哋啲男仔係咪拍拖剩係識諗攪嘢架咋？」

當時嘅我係咁答嘅：「係咁架啦！好出奇呀？」或者我啲答案太高深，隔幾日佢哋又會重複多次條問題。

我以為當時佢哋就話入世未深，接受唔到呢啲咁無稽嘅思考模式啫。點知幾年後，係同個朋友食食下飯嘅時候，佢又問呢條問題，我差啲將口中嘅麵由個鼻到噴返出嚟。就係呢一刻，我竟然諗到一個絕妙嘅比喻：「男人溝女為咗攪嘢就好似人類肚餓要食飯一樣，你幾時見到自己唔餓唔口痕嘅時候會想食嘢丫？」

「屌，你把口真係好賤呀，而家當我哋啲女仔係咩呀吓？」其實我已經收斂咗架啦，你唔熟悉我唔怪你。

「屌乜咩，古語有云，男人唔係為咗攪嘢，係冇一個男人會溝女！要神交就上“這個國家地理頻道”啦。溝女又哂錢又哂時間，所謂有女就大腦辛苦，冇女就細路辛苦呀。」當然你唔好問我邊個古人，呢個古人可能未出世。





「拍拖明明係件好浪漫嘅事嚟架麻，兩個人拖住手漫步沙灘，放假煮下飯仔行下街咁架麻！」Amy完全陶醉喺自己嘅幻想入面。

「咁你要怪就怪點解人猿進化到人類，都冇改變過雄性一出世就係為咗交配呢個天性啦。呢啲人類祖先留落嚟嘅嘢，我哋想架？你睇少啲浪漫派嘅愛情小說吧啦。」好可惜我都係睇呢啲糖衣陷阱大，曾經都有幻想過好多浪漫嘅事。

但而家同我講男人嘅浪漫，我除咗諗起豆腐火腩飯之外，就剩係諗到行過啲大排檔，幾個呀叔係到搭枱，但偏偏可以吹水吹到好似識咁幾十年咁。如果問我覺得咩係最浪漫，我可以講，最幼稚嘅事對我嚟講係最浪漫。

「車，浪漫呢啲嘢你識條春咩！」

「你試下問你條仔打機同啲隊友出生入死浪漫啲定同你行街望住你出血，而自己都要流埋一份浪漫啲？」講完之後我又俾人“人身攻擊”。





「唉，做你條女真係慘，你條友，一啲浪漫細胞都冇！」

「做你條仔仲慘啦，你咁浪漫主義，剩係諗驚喜都諗死佢。」

俾我激到半死嘅Amy放棄咗糾纏呢條問題，當然佢咁做絕對正確，要同我拗我驚我講2036都未講完。

「咁你或者條女聖誕有冇做啲咩浪漫嘢咁過？」如果唔係女嘅浪漫得唔得架！？

「去咗北韓大叫解放政治犯，咁嚟共患難，算唔算浪漫？」





「算啦，我唔應該問你，你夠鐘返青山。」嘩，乜你咁睇好我呀，講到我係青山走出嚟咁，事實係青山都唔收我。

「浪漫係有嘅，不過唔係我條女俾我。」

「嘩你都算賤啦，仲要有第二個。」

「屌你，男人嚟架。」

「仲衰，攪埋基，你條女真係可憐。」頂，講都講到自己覺得好基味濃添……

「唔係呀，個晚平安夜倒數完之後，咁手機梗係最忙架啦，個陣收到幾條wtapp，我覺得幾浪漫。」浪漫…男人…頂…唔係咁嘅意思啊！！！

總之個內容大致上係咁：

我：「Merry Christmas啊仆街仔」




Fd：「Merry Christmas啊陷家鈴，你個wtapp status扮咩憂鬱？」
我：「屌你，關你撚事咩。」

Amy聽完之後幾乎呆咗：「呢啲人類對話嚟架？」

「有問題？」「男人唔鍾意同性咁明顯嘅關心，呢啲咪恰到好處囉，比起你哋啲港女，merry 完個christmas又例牌話好耐冇見幾時出嚟呢啲得閒飲茶式嘅廢話，我哋呢啲舒服幾多！」

「變態佬！鍾意俾人鬧！不過你有冇話佢知你咩事？」

「痴線，心事點會亂話俾人知架。」

「咁你又同我講？」

「所以你唔好俾我他朝出人頭地，有錢有名氣，如果唔係一定殺咗你！」





「關咩事呀？」

「你知我咁多秘密，容乜易到時俾你爆我大獲架…哈哈哈哈哈……」

跟住又係一場我俾打嘅場景……

其實男性同女性呢兩種嚟自唔同星球嘅生物可以生存係同一星球已經唔易，講到結婚生仔同一間屋過人世就更加係一生嘅訓練，所以點可以唔知另一半諗咩呀！想知？問啦仲望。想人明你？講啦仲睇。