短篇散文集: 《過去，重要咩？》

噚日一個小學聚會上，我見返一個曾經差啲同我一齊咗嘅女仔，candy。

係聚會完咗之後，我同佢行同一個方向走，一路上我哋都冇傾過計，而就係等待班馬線嘅時候，我哋之間個種冷空氣，令我有種好唔自在嘅感覺，亦都因為咁，我忍唔住問咗佢一個問題：「其實當年你有冇鍾意過我？」

「嗯？」candy有啲驚訝咁望住我。

「當我冇講過啦……」

「嗯。」





「係呢，你呢排點呀？」今次到candy主動問我。

「嗯…都係咁啦，冇乜特別。」

「做咩頭先突然咁問我？」

「冇呀，你當我好奇囉。」問得你一定係想知答案啦，唔通貪啲air唔夠dead咩……

如果你問我點解係可以一齊，我只可以答你，曖昧完冇一齊咪冇一齊囉！問乜啫問！其實我自己都想知，當年究竟差啲咩……





「你答我先丫，咁多年嚟，你有冇拍拖呀？」乜兩條問題有關係架咩……

「一次咁大把囉……」

「咁之後點解分手丫？」哦，冇呀，唔通話你知我同佢各自去咗同一間酒店偷情，出到嚟咁啱撞到對方呢啲咁戲劇性嘅橋段咩。

「性格不合……掛。」

「記唔記得你啱啱分手個陣係咩感覺，而依家諗返又係咩感覺丫？」





「你想講咩，直接啲啦！」

「不如去我樓下個公園坐低講丫。」

記得以前返學我會特登搭早兩班車，去佢樓下同佢一齊返學，放學個陣又會送佢返屋企，但偏偏成日因為怕俾屋企人見就攪到好似做賊咁，要揀啲暗角位等，十幾年後，係呢條路，好似望返當日嘅我哋咁，不其然咁傻笑咗出嚟。

「你知唔知呀，我以前同初戀分手嗰陣，成日都好想尋根究底，一直問點解，一直諗到底有咩問題會攪到咁……」就係candy屋企樓下，我聽住佢講故事。

「正常丫，當時我都係呀……」

「咁而家？」

「嗯？」我一臉不解咁望住candy。

「當日你執著嘅所有嘢，對今日嘅你嚟講，仲重要咩？」





Candy講完之後，我完全陷入沉默之中。

「我返上去先啦，有機會再見啦，拜。」

頂你攪到我呆哂之後就不負責任咁走咗去，而家啲女人……

係返屋企嘅路上，我反覆咁諗返佢條問題。的確，對過嘅我嚟講，真相係好重要。可惜世界上嘅真相大多數都係殘酷，追根究底最後可能換嚟一個最唔想要嘅答案……

或者留返啲空間俾自己，反正發生咗，過去嘅已經唔再重要，重要嘅……係當下。