[平行時空下的結局]後香港小男人網上日記: Week33　Fri

Week33　Fri

呢一日，我冇返工，除左唔想俾一大堆煩惱影響到我嘅工作之外，主要原因都係我真係唔知返到去有咩要做。於是我選擇左做一樣好無聊嘅事，就係返上廣州視察下（Janet嘅）業務。不過主要原因，都係因為想見下小吉，點解？當然唔係因為我想飲酒，然後再飲到不醒人事，跟住再次發生嗰晚嘅事啦，我發誓，絕對唔係！其實想見佢，都係因為我講過，我當佢係朋友，咁有事想問題朋友意見，好正常啫，何況，我真係好需要一個中立啲嘅人俾意見我，加上佢嘅經歷或者會令我有另一番領會。

係我冇通知嘅情況下殺上office，當然成公司嘅人都好驚我喺突擊觀察佢哋工作表現啦。不過佢哋有佢哋扮忙，我一入到去就逕自走到小吉個位到，佢假都未請就俾我拉咗佢出去。我拉咗佢去一間酒吧，我發誓我當時真係冇諗歪，真係冇諗過會借醉行凶。我將我近期所發生嘅事一五一十咁同小吉講哂。點知小吉回咗一句好玄嘅嘢：「你嘅目標喺咩？」

我而家就係唔知自己想點先山長水遠走嚟搵你俾意見，你又問返條咁嘅問題，我應該點答呀？

「唔知，買樓掛。」





「咁買樓你要啲咩？」

「咁仲洗問嘅，梗係要錢啦！」

「兩者間邊個係呢方面對你最有利？」

嘩頂，咁功利嘅諗法，睇嚟真係經歷返咁上下嘅悲劇先會講得出。

「但係，我唔想將愛情睇得咁功利，我而家係想搵一個愛我嘅人，而唔係包起我嘅人。」





「唔通Janet就唔愛你嗎？賓哥，我問你，記唔記得我曾經用我肉體交換你幫我落香港呢個條件？」小吉問得好直接，少少尷尬都冇。

「記得…」你唔提我都實記得呀，其實我而家都仲有啲心郁架！當然我冇講出口。

「當時嘅你並冇應承到，其實作為一個男人，面對住一個咁嘅誘惑都可以堅持住自己嘅原則，我就知道你真係一個好人。你而家嘅困惑係你知道無論揀咗邊個，都係傷害咗另一個係咪？而且到呢一刻你都冇辦法作出揀擇可能係因為你對兩個都有感覺。但係對Janet，你唔知自己因為佢嘅各項優點而對佢有好感定係出自真心；至於阿Kit，你好清楚知道你將來要面對住一個人每日都會提住你，我唔係你親生架，嘅感覺，但出於你對Kit嘅遺憾，你好想揀佢。」

的確，小吉完全講中哂我嘅困惑，不過答中都冇用架，而家又唔係小學常識問答比賽。係我沉思緊嘅時候，小吉繼續講：「如果Janet同阿Kit一齊困係火場入面，你會救邊個先？」

嘩，你唔好再老土啲。諗咗陣之後，我都係揀唔到，所以……





「我會救火先。」係答完呢句，換黎嘅係被小吉白左我一下眼。

「係生死關頭你都唔知應該救邊個，即係你其實對兩個都係出自真心啦，如果係咁，我問你最後一樣嘢，愛情同麵包你會點揀？」

「……」我無言以對。

「其實你係呢個遊戲入面，從來冇被規限出只可以揀一樣，點解兩樣嘢唔可以共存呢？客觀啲講句，Janet無論係愛情抑或麵包方面，都有絕對壓倒勝嘅優勢，你要知道，機會唔會咁好彩有第二次，尤其係一個咁完美嘅機會。」

「我諗我明你講咩嘅，我會消化下架啦。」其實我明，最簡單直接嘅意思，就係揀Janet。但係阿Kit點，如果我再一次離開佢，佢可能會一世都唔會再對男人有信心，唉，好煩，唔理住啦，好好享受下今晚啦！

呢一晚，我自隊咗好多，最後都係要小吉送我返酒店，之後……乜都冇發生過，我就好似臨走前嘅一晚咁，攬住小吉，由佢好安心咁瞓係我身邊。