[平行時空下的結局]後香港小男人網上日記: Week33　Sat

Week33　Sat

今日同小吉食完早餐之後，我就落返香港，諗住拎個電話出黎睇下有邊個搵我。由於我上去嗰陣為咗唔想俾人搔擾，我熄咗機。點知睇返原來Janet同Kit都各有幾個未接來電同幾條wtapp，而我就好似一個犯咗錯嘅小朋友咁，唔敢去睇唔去面對。但要嚟嘅始終要嚟，喺我返到屋企嘅一刻已經接到Janet電話。

「賓，這兩天你去哪啊？怎麼又不上班，電話也關機啊？沒事吧？」電話另一端嘅Janet嘅聲音聽得出好緊張我。

「我上咗廣州探下班舊同事，咁廢事哂電咪熄咗機囉，我冇事，放心。」

「待會有空嗎？我想去旺角。」





「啱啱返到落嚟香港，好攰，我想抖下，下次先啦。」

「那就約定你下星期一吧，可以嗎？」

你係我老闆，咁公然放我假俾我去巡視我自己嘅（動漫）業務，當然求之不得啦。

「你咁講係咪啫喺放我假呀？」

「當然！我還怕公司比較忙，你又罵我呢！那現在你可以就好，約定你嚕！」





我老闆怕公事上俾我鬧，真係世界第九大奇跡喎。不過睇得出，Janet真係將我睇得好重要，明明以佢身份，幾時約都冇理由會怕我拒絕丫。係Janet收線冇幾耐，又到阿Kit嘅wtapp，係喎，就算我唔上，我連接咗網絡都會顯示兩個tick，即喺已經成功發送到我手機喎，可能佢見到變左兩tick，知道我已經收到之前嘅信息喎（兩個tick只係代表收到，並唔係睇咗，希望佢唔會錯呢個concept啦）…死啦，唉，都係要睇佢講咩架。

「賓，今晚得唔得閒，不如出黎食飯。」 

「賓，你係咪已經決定咗？」 

「賓，你冇事丫麻，打俾你幾次都冇人聽，打去你公司又話你今日冇返工，冇事嘅回一回我，至少等我安心。」 

「我知你收到我啲信息，你係咪因為有咗決定所以唔再搵我？」 





望住阿Kit嘅信息，我真係唔知應該點做，隔咗陣，Kit又上咗線，今次佢冇send任何嘢過嚟。我應唔應該再搵佢呢，搵佢又好似俾希望佢，唔搵又好似遺背咗我當日嘅承諾……最後我都係搵咗佢，即使作為朋友，佢都擔心緊我嘅安危，於是我打咗俾佢。 

「我呢兩日返咗上去廣州間公司處理啲事呀，所以熄咗機，攪到你擔心好對唔住。」 

「……」我隱約聽到，電話另一邊傳黎Kit嘅啜泣聲。 

「喂…喂，你冇事丫麻？」

Kit忽然破口大罵：「冇事？你知唔知你忽然失蹤，我幾驚幾擔心你呀？我驚你唔知係咪到頭來都接受唔到我有個女，我唔知你係唔係選擇逃避然後唔再搵我，又好擔心你唔知會發生咩事，點解你上去都唔可以話聲俾我知呀？」 

今次到我語塞。 

「對…對…對唔住，我唔知原來你會有咁多憂慮，對唔住……」 

「得啦，我唔想講住，我唔係好舒服，想抖下，拜拜。」就係我應都未應得切嘅時候，阿Kit已經收左線。 到底我要點做先可以唔傷到任何一個嘅心呀。我真係好想大叫出嚟呀～～～～～～～～～