《失蹤》: 第十二回

香港每年失蹤人口多達三千人以上，而且接近一半人士係離開其住所而直接失蹤。亦姐係話，當佢地離開屋企嗰一刻，就已經不知所蹤。究竟一個有手有腳，神智正常嘅人，點解會突然消失? 而且香港遍佈天眼，但竟然都搵唔到班失蹤人士? 當中究竟發生咩事?
　　
有時侯，失蹤人士未必喺城市之中消失，而喺我地熟悉而且接近嘅地方-住宅大廈。
　
「太太，你填咗啲資料比我地先。」Karen比咗有關資料文件比太太填寫，而呢個時侯，我同Karen就觀看部數碼攝錄機嘅影片。
　　
當我拎起部數碼攝錄機時侯，心情有啲異常沉重。
　　　
片段一開頭影住一個大概讀緊小學嘅女仔，佢伏咗喺張枱到，顯然係瞓緊覺。之後鏡頭影住涉事太太，佢好驚恐咁望住鏡頭說:『亮兒佢瞓緊覺.....但每次一嘈醒佢，佢就性情大變，好似鬼上身咁。」
　　




接著，太太走向亮兒身邊拍一拍佢說:「亮兒，唔好瞓喇!起身喇!」說罷，亮兒慢慢起身，雙目反白，然後怒視太太，並大叫:「做咩嘈醒我呀!!你地不得好死呀!!!」之後亮兒就衝去窗枱，但鏡頭可以見到窗口被釘上木板，亮兒不斷撞擊窗口，然後念念有詞:「嘈我嘅人都要死!嘈我嘅人都要死!」
　　
片段告一段落，太太表示每次一嘈醒佢，亮兒佢會企圖去跳樓，所以已經喺窗口加建木板阻止。
　　
「太太，我建議你去報警求助。」Karen說。
　　
「唔得唔得!唔可以報警!一陣佢地當我個女痴咗線送去青山!到時邊個賠返個女比我?」太太一聽到報警時侯相當敏感。但老實講，從片段之中可見，亮兒的確好似鬼上身咁，但實質情況都要現埸觀察同了解先可以定斷。
　　
太太望一望手錶，露出相當擔心嘅臉孔，然後收恰物品便急急離開。我地追問之下，原來每朝10點，佢附近就有修路工程，會發出相當大嘅噪音，佢要返去睇睇個女。最後，佢比咗地址我地，希望我地可以上門睇一睇。
　　




「呢件事你點睇?」Karen問。
　　
我拎起Case File，邊紀錄邊說:「可能佢個女有精神問題，可能都會幻覺，你知喇，家陣班細路讀書不知幾大壓力，造成咁嘅情況之下其實唔出奇。」
　　
「但係頭先條片......」
　　
「總之唔好諗咁多，我地要專業啲，唔係所有Case都係古古怪怪，就算係!我地都要幫佢地。」我試圖開解Karen，希望佢唔好太擔心。
　
而事實上，當太太比咗佢個地址我睇時侯，我腦海突然閃出一段幾深刻嘅新聞，但一時之間諗唔到。於是我等到Karen行開咗，我就用電腦查下呢棟大廈究竟發生咩事。
　　　




當我用Google一查之下，突然感到一股久未露臉嘅寒意再一次充斥全身。
　　　
原來太太所住嘅大廈喺2006年農曆七月十四鬼節，當晚有一個女人塗上紅色指甲油，著住紅衫、紅褲、紅鞋跳樓自殺，而且當時佢仲寄出一封信比唔少屋邨相關人員，包括屋邨委員會，看更。信內寫住「冤鬼纏身，鬼魂索命。死都唔會放過你，你唔會有好過。」
　
原來當晚自殺嘅女人經常受到鄰居打麻雀同噪音煩擾，佢向屋邨委員會同看更投訢後仍然未獲得處理，最後決定自殺，而且報復心非常強烈。
　　　
其後呢棟大廈多次發生失蹤事件，而且事件多到不尋常。
　
2016年3月26日0600時，陳定光離開住所後不知所蹤。
　
2016年1月2日1615時，黃承軒離開離開住所後不知所蹤。
　
2007年4月23日下午4時正，劉喻與家人在用膳後，她向家人表示會到中央圖書館借書，離開住所後就一直失去聯絡至今。
　　
2010年04月01日，張明志獨自離開住所後，去向不明，至今仍未有任何消息。2010年4月22日由失蹤者父親於將警署報案。




　　
我突然靈光一閃，拎返頭先所寫嘅Case File望一望太太個名，發現佢曾經做過呢棟大廈嘅看更。唔通呢件事同當年紅衣女人自殺有關? 我對鬼怪一事並在意，我在意嘅係點解咁多人離開屋企之後就失蹤呢?
　　
鬼並唔係真實，係無形。但活生生嘅人點解會失蹤? 而且香港地少人多，加上科技發達，要將一個人消失係一件好難嘅事，但失蹤事件卻源源不絕，永遠無法搵到班人呢? 大概我要到呢棟大廈睇一睇先得。
　　　
出發之前，我曾經諗過唔好比Karen陪我去，但自從上次為咗唔想佢有危險而掉低咗佢後，佢苦口婆心咁叫我下次一定會帶埋佢去，因為佢唔想我有事。而且上次都係因為佢救咗我，如果唔係，我可以喺山到消失咗。所以今次我帶埋Karen陪我一齊去。
　　　
喺去程期間，Karen今日好似有啲唔同咁。
　　
「阿明，其實你仲有冇掛住阿盈?」Karen突然問。
　　
「當然掛住喇!而且......我相信佢仲生存緊，只係唔知去咗邊度姐。」
　　
Karen聽到後好似有啲失望，大概我都知道佢份心情。我唔係盲，我點都會感受到Karen對我嗰份熱情，特別無論我發生咩事都好，都會陪住我，一個本身咁膽小嘅女仔肯同我經歷咁多野，佢真係好鐘意我。
　




望住佢失望嘅表情，我不禁有點可憐佢，同時我都要為自己將來打算一下，如果阿盈呢世都搵唔返，我都無可能一直等阿盈出現，我都有人生，我都有生活，而Karen可能係我嘅下半生。
　　
「Karen，完咗呢單Case，不如我地去睇戲行街食飯?」我說。
　　
「真係嘅? 好野! 嗱!你話架!唔好走數喎1」Karen由一副失望嘅表情轉為喜悅，好似一個細路女咁，但亦都令我對佢多了一份情。
　　
但係，呢單Case，比我想像中難以處理。當我地去到呢棟大廈時侯，天氣再一次變得惡劣，雨勢又開始大，最近香港落雨足足落咗兩星期，天氣極為反常。
　　　
去到樓下時，內心一股不安感覺一直充斥住全身，無論看更，大廈環境，街坊人士都令我感到渾身唔聚財。而且仲有啲頭暈嘅感覺，於是我決定上門之前，為自己卜一卜卦。
　　
但當我拎出三個銀仔時，我隻手一直喺到震緊，一時控制唔到整趺啲銀仔。Karen見到後，就問我係咪創傷後遺症復發? 我示意地點頭，但其實我肯定自己唔係，而係呢度嘅環境令我有呢種痛苦感覺。
　　
Karen執起哂啲銀仔，然後說:「唔好再占卜喇!你睇下你!手震成咁點占? 同埋你太依賴呢樣野呀!」
　　
「比返啲銀仔我!」我要求地說。




　　
「唔比!」但Karen堅持唔比。
　　
「比我呀!」我開始有點暴燥，我唔想呢個時侯仲因為呢種小事而拖拖拉拉。
　　
「唔比!」
　　
「如果唔係我識得占卜!我永遠都走唔出個結界呀!你呢家叫我唔好占卜?」我對住Karen大喝。
　　
「你都識講喇!個結界個西貢呀!呢度係城市呀!城市點會有結界呀!你唔好再咁沉迷呢樣野呀!如果唔係你永遠都醫唔好個病架!」Karen面對暴躁嘅我都仍然堅持住，佢實在唔忍心我仍然為西貢一事而影響到我。
　　
我都無咁好氣同佢爭論落去，於是就順佢意，就上門搵涉事太太。
　　
當我地搭Lift上去時，喺Lift入面我同Karen都無出聲，但我感受到自己個心跳得好快，整個身仍然不斷抖震，我嘗試冷靜落嚟都唔得，究竟點解呢種反應會再出次出現? 我真係如Karen所講，我仍然比西貢結界一事影響到?
　　




當到達後踏出Lift門時，發現大廈係密封式，無任何窗口，令人感到十分焗束。而且由於燈光比較殘舊，顯得整條走廊都十分陰暗恐怖。
　
我地慢慢走太太所寫嘅單位時，我地途經一個防煙門時，經過嗰一剎那，我發現一個女人陰沉地從防煙門嘅窗口望住我地，我即刻嚇咗一嚇，再轉身一睇時侯，防煙門嘅窗口竟然無任何人。
　　
「咩事?」Karen問。
　　
我膽粗粗咁行去推開防煙門，只係一條好普通嘅後樓梯，但其設計亦都係密封式，我放隻手指喺口前，示意Karen唔好出聲，然後我叫Karen撐住道防煙門，我再慢慢一步一步行前，望上面，望下面，睇下有冇發現。
　
由於密封式關係，無任何聲音，但我在意嘅係，如果頭先防煙門入面有女人嘅話，短短幾秒間佢應該走唔到好遠，但當我行入去睇時侯，竟然無任何腳步聲，亦無任何呼吸聲，我身處樓層係24樓，我正想走上25樓睇時，Karen殊一殊我，示意我落返嚟。
　
我望一望25樓嘅位置，諗咗一陣，決定都係放棄。於是落返去，但呢棟大廈比我感覺好唔舒服，而且頭先個女仔係我錯覺吧?
　
「Karen，記唔記得我同你講過結界形成原因?」
　
「我記得呀!你話過山入面咁多結界係因為人少陽氣少，令到磁場轉變，形成結界丫嘛。」
　
「咁你仲記唔記得，我講過，後樓梯都有結界。因為公屋大廈有咁多住戶，每戶都有大量電器輻射而令到磁場不斷改變，而後樓梯一直都好少人行，特別係十幾至廿幾樓嘅後樓梯，所以亦都好容易產生結界。亦姐係話，當我地入咗結界後，我地可能不斷喺條後樓梯到走上走落，行極都係某一個樓層，永遠都走唔返出去。」
　
Karen聽到後開始臉色一沉。
　
「我講出嚟唔係為咗嚇你，而係想你小心啲。呢棟大廈經常有人失蹤，我懷疑佢地唔係出面失蹤，而係喺呢棟大廈度失蹤。所以我地盡可能唔好行後樓梯，知道未?」我認真地說。
　
「嗯......」
　
我地走到太太屋外，我深呼吸一下，然後冷靜一下自己，再望下Karen，Karen點頭示意無問題。正當我想按門鐘時侯，發現門鐘已經被破壞，而且有張字條寫住 " 請細力地敲門 "
　
大概唔想門鐘嘅聲嘈到亮兒吧? 於是我就輕輕力咁敲門，正式展開一段令我刻骨銘心嘅經歷。
　
「啪啪啪!」