《失蹤》: 第二季 第一回
今日，中心收到一名太太嘅求助個案。佢懷疑個女被「鬼上身」，每當被嘈醒後，就會不斷撞擊窗口求死。呢名太太仲將整個過程拍低，經我地社工觀看段影片後，確實如太太所講有啲不尋常行為，但唔排除佢個女有精神錯亂出現幻覺等等因素，所以我同Karen按太太所提供嘅地址，前去探訪，搵出真相。
「啪啪啪!」我輕輕力咁敲道門，以防驚醒屋內嘅女兒。
「啪啪啪!」我見屋內無任何反應，於是再敲打道門，但仍然無結果。呢個時侯，我聞到從門隙內滲出一陣令人感到惡臭嘅味道。呢種氣味非常嘔心，而且一時之間難以用詞語形容當中氣味，彷彿好似一舊生豬肉被棄置於密封空間超過一個月般咁難聞。
karen雙眼充滿疑惑地望住我，似乎佢都覺得呢種氣味唔多正常。
我嘗試拉開鐵閘，發現竟然無鎖上，於是順勢將整個鐵閘拉開。再比較用點力去敲道門，當我敲落去時侯，門被我推開，原來大門都無鎖上。但當門被推開剎那間，屋內一股異味隨即湧現，我同karen本能反應地用手掩蓋鼻，然後慢慢踏入屋內。
呢個時侯，我被屋內嘅環境嚇到，我地發現大廳中央有一條屍體跪喺地上，而屍體塊臉呈現受到極度驚嚇嘅臉容，可能生前睇到一啲恐怖嘅野。而且屍體上滿佈屍蟲，不斷從屍體嘅口、眼、鼻孔同已經腐爛嘅皮膚之中湧出同蠕動，非常嘔心。
加上屋內不時有好多烏蠅周圍飛，而且窗口全部被木板封上，令到空氣唔流通，屍臭味充斥住整間屋。
「報警!快啲報警......」我話未說完，一開口感到屍臭味傳入我口中，即時反胃作嘔，將中午食過嘅飯嘔到地上。
Karen拎出手機，按上「999」，而我亦拎出紙巾清潔下。過咗陣，Karen蓋住把口說:「唔得呀!打咗都無反應嘅!」
我隨即拎出自己手機，發現接收訊號正常，於是再打去「999」，但一直都無任何反應，連接通嘅聲音都無。我心知不妙，於是望一望屋內四周，見到電話喺電視機旁邊，於是走近拎起電話打出去求救，但無論打去邊到都無任何反應。
「阿明!究竟點解會咁呀?」
「呢度有啲唔妥......我地行返出去先!」說罷，我同Karen就走出屋外，直接按對面住戶門鐘，希望對方能夠協助報警。
「叮噹!叮噹!叮噹!」我不斷地按下門鐘，從急速嘅門鐘聲音可以感受到自己內心上有幾咁混亂同緊張不安。
karen見我按極都無人應，於是主動走去其他住戶試下按鐘求助。此時，整條走廊只剩下我同Karen兩個人和各戶不同的門鐘聲音。
但無論我地去邊個住戶按門鐘都好，都無任何人開門，我挨近鐵閘嘗試感受屋內有冇人，但無任何聲音。結果，整條走廊有二十間住戶，竟然無一個住戶開門應我地。
「點解無人應門嘅!? 唔通個個人都出哂街?」Karen緊張地問。
我望一望走廊四周，無任何窗口，而且燈光設施殘舊，顯得整條走廊都十分陰暗恐怖，加上屍臭味經我地開門後，一下子從屋內湧現，令到走廊開始充滿一股屍臭異味。
「既然無人應，我地就落去同個看更講。」我地兩個人走到Lift門位置，按下制等待。呢個時侯，我內心不斷期求部Lift能夠順利到達我地呢層同埋順利開出，因為呢一刻，我感覺到成件事好唔妥，大概又有唔知咩怪事再一次發生喺我身上。
我地兩個望住Lift門頂上嘅顯示屏，緊張地望住該到達樓層數字慢慢由15......18......21.....直至到達我地呢層24樓。
我同Karen慢慢退後幾步，我地兩個都感到有種不安感覺，都驚一陣Lift門打開時侯會有啲咩喺入面。
「叮。」Lift門隨住聲音提示後打開，Lift內和岩岩所搭嘅一樣，一切正常，我亦都鬆一口氣，於是快步地入去按下G樓。
當Lift門關上後，亦順勢向下。我累透地挨住門柄，估唔到整個過程單單十分鐘內就已經將我整到咁累。
「頭先條屍究竟係邊個嚟? 點解會死咗喺太太屋企?」Karen問。
「我都唔知，我就知道條屍已經死咗一段時間。」
「你點知嘅?」
「頭先你唔見咩? 堆屍虫條條都大大隻隻，亦都將條屍食咗唔少，我估應該死咗至少六個星期。」我解釋說。
「嗯......但除咗條屍之外，我更加在意嘅係......點解我地電話打唔到出去，同埋成條走廊每個單位都無人喺到，你估會唔會......」Karen大概想講結界嘅野。
「唔會嘅!你唔記得咗我講過咩，結界入面絕對唔會有任何昆蟲或者動物，亦姐係話，條屍身邊咁多屍體同烏蠅，證明呢個係活生生嘅現象，絕對唔會結界內所發生嘅事。」
「唉......總之快啲報警處理。」
「嗯。」
過咗幾秒後，我突然間覺得有啲唔對路，於是抬頭望一望顯示屏，驚覺顯示屏一直顯示 「24樓」，亦即係我地原先嗰層。但部Lift一直呈現落緊去嘅狀態，如果部Lift無上無落我地係完全感受得到，但呢刻好明顯係落緊，究竟係咪顯示屏有錯?
「點解部Lift咁耐都未到嘅? 我地岩岩搭Lift上嚟都只係十幾秒，但我地呢家搭咗成一分鐘都有.....」Karen都意識到問題所在。
我吞一吞口水，膽粗粗咁按下「21樓」，希望試下落其他樓層會唔會正常。終於，部Lift有反應地停低了，但開門嘅時侯，道牆有塊牌仍然顯示24樓。
我同Karen嚇到呆咗，於是再按「18樓」，Lift門亦關上落去，數秒後，部Lift停低了，但開門嘅仍然仲喺24樓。
我握緊拳頭，我同自己講要冷靜落嚟，雖然一直唔想承認自己喺結界，但種種現象令我不得不承認。如果你問我山上面結界嘅事我可以滔滔不絕咁回答，但公屋大廈嘅結界我就只有半桶水認知，因為自己一直都未遇上呢種情況，加上結界呢樣野千變萬化，歷史深遠，根本唔係一般人可以理解得到，又或者頭先間屋嘅結界係容許昆蟲出現?
「阿明! 呢家點算呀? 我地走唔走到返出去架?」Karen開始著急。
「行出去先，再諗諗辦法。」於是我地就踏出Lift門，亦由得部Lift關上。我望一望四周，整條走廊同後樓梯都係密封式，要望出外面只有透過住戶屋內嘅窗口。但岩岩我地去嘅屋所有窗都被封上木板，好難望到外面究竟係點。
「Karen，我地再返去間屋睇下，我地仲未睇廚房、廁所同埋房。」
「吓? 點解要返去呀? 不如我地由後樓梯走返落去丫!」Karen似乎唔想再入去嗰間充滿屍臭同屍蟲嘅嘔心屋企。
「但你要諗下，如果......姐係我話如果......如果嗰條屍正正就係今日搵我地嘅太太，咁間屋入面，一定有佢個女喺到。」
「點會呀? 你唔係話條屍死咗好耐咩!?」
「我話如果姐，呢刻我都唔想用常理去分析。你諗下，每次發生呢種事都總有佢背後原因!我相信今次都有原因!可能我地需要去幫佢地!」
雖然Karen有十萬個不願意，但仍然跟住我走返入屋。我叫佢留喺出面等我，但佢好怕當我入屋後就唔見咗我，到時只剩低佢一個。
今次我同Karen除下外套，緊緊地繞住口同鼻，希望減低對惡臭嘅感覺。
踏入屋內，再次見到一副展露出極度驚嚇嘅臉容屍體，我心諗究竟佢生前見到啲咩而嚇到咁? 而佢望嘅正正就係大門方向，同埋點解佢要跪低呢?
於是，我同Karen開始喺屋內進行搜索，睇下有冇相關嘅野搵到。我喺大廳張梳化搵到一個袋，呢個袋令我好深刻，因為今日搵我地嘅太太正正就係用呢個袋。
我打開銀包，更加肯定間屋的確係太太所住嘅。但至於條屍係唔係佢，我雖然無實質證據百分百肯定，但我都假定佢就係。究竟當中點解會咁? 今日嚟到中心個太太又係點解釋?
「呀!!!!!!!!!!!!!」突然房內傳出Karen慘叫聲。
我嚇咗一嚇，即時衝入房內睇下究竟發生咩事。只見房間內張床瞓住一條屍體，同樣地滿佈屍蟲，而且屍體姿勢似係臨盆狀態，床單上染了一大攤已退色的血，加上屍體沒有穿上內褲，大量屍蟲不斷從陰道蠕動，而且仲有一條似係染了血嘅繩索物體。
「呢條係臍帶嚟!」Karen指出該物體係連貫剛出世的嬰兒的臍帶，通常都會由醫生將佢剪斷，如今又邊個剪斷?
我再望下房間內嘅環境，雖然窗口仍然有木板封上，但仍露出少許空隙，引來唔少烏蠅，大概引致屍體爆發咁多屍蟲原因。但最重要嘅係，我搵極都搵唔到個嬰兒喺邊。
我行近窗口的空隙望出去，發現外面一片白霧，完全睇唔到外面嘅景象，甚至聽唔到車輛行駛聲音。我大概想像到自己身於一個結界範圍，而今次結界範圍比以往大得多。而且我諗氣味係突破結界嘅其中一種媒介，或許正常人唔會發現或聞到，但屍體發出嘅氣味仍然吸引到結界外嘅昆虫進入。
既然烏蠅可以由外邊進來，姐係我地都可以離開呢個結界出返去!
「Karen!我地試下從後樓梯出返去!」當我轉身對Karen說時，只見Karen痛苦地半跪在地下。
我緊張地走近，問佢係咪唔舒服定係嚇親? 佢痛到臉都青埋，話個肚突然間好痛，而且感到個肚好似慢慢咁脹大。
我慢慢咁扶佢出屋外走廊睇一睇，我細心望住Karen個肚一睇，的確係脹大咗少少。但我完全唔知咩事，我唯有安慰住Karen，話我地可能入咗結界，但有辦法可以出返去，叫佢頂住。
於是我同Karen走到後樓梯，推開防煙門，牆上亦掛住24樓嘅牌。我喺袋到拎出一支筆，然後畫咗個圓圈喺塊牌到。
「我地行。」說罷，我同Karen就沿後樓梯一直行落去，希望可以走出結界。
果然，每當我地落去下一層時侯，牆牌上仍然係24樓，呢個時侯Karen同我對望，我地都更加肯定呢度就係結界。於是我將行走速度加快，直頭用「跑」嘅方式跑落去。
「唔得喇! 阿明……好痛呀!」跑咗一陣，Karen叫停咗我。
我望一望Karen，驚見佢個肚愈嚟愈大，似係有咗身孕一樣，大得誇張。Karen不斷流出冷汗，臉如白紙，佢感覺到個肚有異物，不斷踢佢個肚。
我用手摸上，真係感覺到肚入有野踢緊佢。
Karen大大力捉緊我隻手:「好痛!!!好痛呀!!!!救我呀!!!點解會咁呀!!!」
呢刻我有點手足無措，佢叫痛得愈嚟愈大聲，令到整條後樓梯充斥住Karen慘叫聲，不斷來回上下層。我再拎出手機致電「999」，依舊無人聽，而Karen呢個狀況跟本行唔到，我究竟應該點做?
「呀!!!!好痛呀!!!放過我呀!!!」karen淒厲地大叫。我從來都未見過佢咁，亦都唔未遇過咁嘅情況。
我呆呆咁望住佢，腦海一片空白，亦有一點頭暈，大概緊張情緒加上空氣不流動關係，我開始體力不繼。
突然，Karen搶我掛喺恤衫袋嘅筆，然後作勢插去自己肚嘅方向。我即時驚醒，捉緊佢隻手阻止佢。
「阿明……好痛……不如比我死咗佢…..」Karen喊得滿臉眼淚，最後仲痛到昏迷咗。我收起支筆，慢慢扶起佢，然後說:「我一定帶你行出去。」
由於Karen個肚已經好似懷胎多時，唔岩我背住佢行，我唯一慢慢咁扶佢一步一步落樓梯。
我記得當時時間係下午5點16分，但我扶住Karen一直慢慢咁向下走，不斷重覆走緊24樓，永遠都停留喺24樓，而手機時間已經顯示為9點05分。
我地已經行咗差不多3個鐘。我體力已經響起警號，頭暈愈嚟愈劇烈，開始腳步不穩。我慢慢咁扶返Karen喺地下，我就捉住樓梯扶手回氣。
「滴答。」突然一滴水滴喺我手背上。
我好奇點解有水滴落嚟，於是我慢慢從樓梯間向上望。
驚見一個女人，而且個女人正正就係我較早前喺防煙門嘅女人。由於佢企喺高處樓梯間，我望唔清佢個樣，但好明顯見到佢張開個口，口中不斷流出口水，以致滴喺我手背上。但剎那間佢退後了，究竟佢係邊個嚟?
咪住，假設我不斷遊走24樓，亦姐係話佢都喺24樓，佢岩岩縮後，姐係話佢就喺我後面!? …..我即時轉身一望………
《第二季第一回完》
(再一次無限期待續)
****************************************************************
好耐無更新《失蹤》，希望大家體諒。
因為我唔係全職寫野，只係一名普通嘅打工仔，所以好難抽到時間去寫故。
但遲到好過無到，終於打好新一回，希望大家繼續支持喇!
記得比Like 同留言，比我知道你地仲有追緊......Thank!
另外，有人話我掛住寫失蹤，都好耐無短篇故仔
既然係咁，我黎緊會寫返更多故仔，未必下下都出失蹤，敬請留意=]