某天我脫毒了，走上了情聖之路: 第二十七章 - 戰幕
估唔到柔柔會突然間請我食牛肉球。
仲要係我呷醋呷到爆既時候，簡直係幫我反擊卓芝一下。
我唔洗望過去都feel到卓芝既醋味，但又要無形於色咁。
突然間覺得好心涼。
「一唔一齊坐?」我問柔柔。
柔柔諗都無諗就坐左係我隔離。
我都feel到卓芝由醋意轉成怒意。
佢越係咁，我個心就越爽。
不過好似利用左柔柔既單純咁。
番到去班房，卓芝就立即wts app我。
「又話唔中意比人請你食野?」
我個頭轉向卓芝既方向，見到佢個樣好似就黎變超西咁。
我就知道我今次真係玩大左。
「我都有拒絕。」
「我都叫左你幾次啦，但你點對我?」
「sorry啦，下次唔會啦，鍚番。」
「仲有下次?」
我突然覺得呢幾句對白好TBB。
「唔會有!!我中意既人就芝芝豬你。」我send完呢個wts app都覺得嘔心。
不過女人就係受呢套，由其同你熱戀緊既女仔。
佢無再嬲就由佢，不過呢次真係搵自己笨。
自己激嬲完佢又要氹番佢。
「點解卓芝岩岩好似好嬲咁既?」柔柔突然wts app我。
我真係無諗過柔柔會留意到。
柔柔洞察力都唔差。
對唔住呀柔柔，我唔可以講太多你知。
「佢不嬲係咁，可能M到又或者同家楓嗌交掛。」我回覆柔柔。
有一刻諗過同柔柔講我同卓芝既事。
有時屈住屈住真係好辛苦，好想搵人分擔下。
但我又唔捨得純如鴿子既柔柔去接觸呢啲咁黑暗既事。
如果柔柔唔你咁細個既話，也許今日與我挽手相共既人係柔柔而唔係卓芝。
我一定係傻左，又諗埋晒啲咁既野。
每一日放學就睇住卓芝同家楓拖住手一齊走，個心真係好痛。
我真係好想衝過一手拉卓芝黎我既身邊，可惜我無咁既勇氣。
我只能夠扮無事咁同肥森佢地有講有笑。
因為家楓經常同卓芝出街，我好自然無得同卓芝相處。
加上我同佢而家又唔係坐埋一齊，我同佢之間既溝通只剩下wts app同傾電話。
「你今日踢學界好型!」卓芝係夜晚果陣打電話黎恭喜我又羸一場學界。
「咪又係咁踢。」我同卓芝只可以電話溝通而萌生晦意。
「做咩事唔開心?」卓芝溫柔咁問我。
「你成日同家楓係我面前”姨姨泣泣”你叫我點開心?」
「對唔住呀，我已經叫佢唔好咁樣。」
「其實你當我係咩姐?」「你係我一個好重要既人。」
「咩重要既人?」
「好重要! 重要到唔可以無左果隻。」
「算啦，我地都唔好再逗留呢個話題。」唔知大家係咪同我有一樣既感覺?
卓芝既說話似藉口多過真心話。
似係一個魚與熊掌皆想兼得既藉口。
我亦問過自己，呢段關係可以繼續嗎?
今個星期日因為家楓約左朋友，終於有一日時間我可以同卓芝出去。
始終我同卓芝係一段唔見得光既感情。
如果我地想出去拍下拖就要有咁遠去咁遠。
咁話卓芝又話想去行荃灣廣場。
荃灣廣場真係好多女仔野行。
悶到我抽筋，我只可以得閒當卓芝係公仔咁玩下同攬下黎解悶。
「你係咪好悶?」卓芝又向我用讀心術。
「都唔係既。」緊係死都話唔係啦!!
「不如去食啲野。」卓芝講完之後就帶左我去一間班戟店。
我叫左個有蟹柳既班戟，好味到痴晒線。
「呢個堅正!!!」我一路食一路同卓芝講。卓芝淨係好開心咁望住我食。
「你開心我就開心啦。」
「傻妹。」我摸一摸佢個頭。
「咪摸啦，你隻手都唔知乾唔乾淨。」好難得可以同卓芝拖住手行街。
拖惶卓芝既時候有種好奇怪既感覺。
我同佢本來係狗吠狗骨既冤家，後來我暗戀佢，再去到我放手成為大家既好朋友。
我知我呢一刻拖住既手，只係一個夢一個隨時都會消逝既感情。送佢番屋企既時候，我地又去左柴灣公園散步。
行下公園，攬下傾下計，做番啲普通情侶會做既事。
「其實你同我一齊開唔開心?」卓芝問我。
「開心呀，只係有時會心酸。」
「對唔住呀，你唔應該受呢啲苦。」
「唔緊要啦。」
「但咁樣對你好唔公平。」
「但我可以點? 叫你同家楓分手?」
「我可以! 為左你我可以同家楓分手。」
「你唔好咁衝動，為左我值得咩?」
「我唔想無左你，你要我做咩都可以。」
「傻妹。」我攬住佢。其實我知道佢只係一時衝動。
縱使係衝動既說話，總好過連一刻既決心都無。
起碼呢一刻佢個心係我就足夠。其實我係咪真係離開佢?
我捨得嗎?
定其實我真係想成為佢真正既男朋友?
要放手一搏，與神一戰嗎?
「點解你最近好似悶悶不樂咁既?」我隔離位女同學上上下堂問我。
「同你坐咪悶悶不樂囉。」
「真係嫁?」
唉，又一個純白如綿羊既女同學。
「子欣同學，世界好多大灰狼，唔該你唔好咁易信人。」
「咩呀! 我見你咁好人先信你咋。」子欣自己講完自己係到笑。
見到佢咁on居連我都忍唔住笑勁佢。
「笑番咪好囉。」
「哈哈。」
「你有心事唔怕同姐姐講喎。」子欣指住自己。
「算啦，你唔會明。」
「就算我唔明，你講出黎都會舒服啲。」
我將成事一五一十咁講比子欣聽，但無講到事件入面既女主角係卓芝。
「早知如此，何必當初呢。」子欣講左呢句廢話出黎。
妖!講乜春丫佢。
「咁你之後諗住點?」子欣問我。
「我可以點?」
「你唔會想以後所有節日都要睇住自己深愛既人同第二個男人過掛?」
子欣呢句說話完全點醒左我。
「但我根本無能力同果個男仔爭。」
「我唔知你既對手係咩人，但個女仔中意得黎就已經証明你有一定程度既能力同果個男仔死過。你只要令個女仔越黎越需你就得。」
「講就易，我憑咩?」
「佢有個咁好既男朋友都願意冒險出軌同你行，你一定有啲野好吸引佢既。」
雖然佢個樣係蠢蠢地，但講野都幾到位喎。
聽完佢咁講之後，我就不停係諗我有咩籌碼去砌低司徒家楓呢個最接近神既男人。
即係話，我正式與神開戰。