某天我脫毒了，走上了情聖之路: 第二十六章 - 兄妹
初四呀爸呀媽番左工，家姐又去左自修室溫書。
今年既年初四真係慘過年初四咁既樣。
屋企好靜，自己一個人更容易諗起卓芝既事。
唔知佢同家楓見到面未呢?
佢同家楓係咪都做緊同我一樣既野呢?
突然好掛住佢。
又無心情約人，一個人咁屈左係屋企。
我嘗試入過召喚谷，可惜入到去又無心機打，係咁比人屌老母。一個人係撻左係張床到。
「叮!」wts app聲當我以為係卓芝wts app我既時候，
原來係柔柔係wts app話好耐無同我傾計。
講真呢幾日真係無搵過柔柔，我眼中只有卓芝。
柔柔總係我有需要既時候出現，呢啲係咪就係緣份?
「點呀我既好妹妹?」我wts app番柔柔。
「仲以為你唔會應我。」
「傻啦，點捨得唔應你。」
「做緊咩?」
「岩岩起身無野做攤左係到XD」
「咁你呢?」我連send左兩個wts app。
「睇電視XD」睇完呢個wts app我就走左去開電視睇下有咩睇。
「無線?」我wts app問佢。
「係呀。」
「尋秦記好睇喎。」
「古天樂好靚仔!!」突然覺得佢係為左睇靚仔而多過睇戲情。
「咪同我差唔多。」
「(笑喊emoji) (笑喊emoji) (笑喊emoji) (笑喊emoji)」好明顯佢係唔識應我。
通常啲人淨係覆emoji既話，我係唔會覆番佢。
放低左部電話專心欣賞尋秦記(古天樂)。
古仔果陣真係好靚仔，演技又唔差，難怪咁多人中意佢。睇完之後覺得好鬼肚餓，走左入廚房搵野食。
點知乜鬼都無，唯有洗個頭落買野食。
吹完頭之後撳下部電話睇下卓芝有無搵過我。
雖然仍然無收到卓芝既wts app但收到柔柔既wts app幾好。
柔柔send左張佢同力力既合照比我。
力力係柔柔隻貓，基本上柔柔當力力好似佢細佬咁。
「阮力力真係好得意!!!」
「不過佢好惡。」
「睇下對邊個嫁姐。」
「佢係我呀媽面前勁乖囉。」我柔柔一路係咁傾落去。
有時我都好內疚，柔柔總係充當住一個後備既角色。
每一次我同人拍拖有咩事，柔柔都會係我有需要既時候突然出現。
如果呢個世界真係有守護天使既話，也許柔柔就係我既天使。
「柔柔你係我最好既妹妹，無論發生咩事我都會係你身邊。」我心血來潮send左呢個wts app。
「你都係我最好既哥哥，我永遠都會係你身邊。」
估唔到柔柔唔係用一啲驚訝既字眼黎回應，而係承接我既心聲黎回應
從此我同柔柔就正式成為兄妹關係。
我亦同自己講，將來無論發生咩事，只要柔柔需要我，我一定會企係佢果邊。結果全日卓芝都無wts app過我，雖然我真係好失望好唔開心。
但我有柔柔呢個好妹妹陪住我，唔開心極都有限。大約係十點既時候，卓芝終於wts app我。
「對唔住呀，因為家楓要我陪佢，所以到而家先可以wts app你。」
「唔緊要啦，佢始終先係你男朋友嘛。」我晦氣咁覆佢wts app。
「對唔住呀! 我真係好掛住你。」
「知啦，岩岩番到屋企?」
「係呀，你有無掛住我呀?」
「當然有啦，你都累啦，快啲沖涼休息啦。」
「咁我沖完打比你OK?」
「OK」
其實有乜醋好呷?
由我做第三者果日就預左會係咁。
不過我諗每個第三者都希望自己有機會可以成為正身。
我都唔例外，但可惜我既對手係男神般既存在。
卓芝沖涼完真係有打比我，佢有解釋點解全日都無搵我。
話家楓今日全日都痴實佢，根本無空餘時間wts app我，又怕比家楓發現。
我都無理由去要求人地咁多野，佢唔冒風險wts app我都正路既。
即使有幾委屈都好，只要聽到中意既人把聲，一切哀愁都會一掃而空。
原來卓芝氹男朋友既功力都唔差，我好快無左果種唔開心既感覺。
可惜開心還開心，現實歸現實。
「對唔住呀，家楓佢打比我。」
「明白，咁我打多陣機都訓啦。」
「sorry呀，拜拜。」
「拜拜。」
試問我邊會有心情打機呀?
我又攤左係張床到發呆。
望住部死寂既電話，我又諗起柔柔。
可惜我唔想柔柔成為卓芝既替身。
寧可一人接受呢份孤寂，我都唔願意令柔柔有機會受到傷害。攤係到唔想打機，搵唔到有咩好做。
唯有煲下動畫，我又翻睇我最愛既高達00。
「訓左未?」大約1點既時候卓芝wts app我。
見到呢個wts app既喜又悲。
最後我都放低電話無應佢。
我只想靜下，享受”我就係高達”既呢一刻。
新年假淨番既大部份日子都比家楓霸晒。
就算見到面，我同卓芝都只會去對方屋企。
因為怕出街果陣會比人撞到。假期好快就完左。
家楓仍然同卓芝一齊番學。
我緊係一支公跑番學啦。
一入班房就已經見到卓芝佢個位，即係我隔離個位等緊我。
「傻豬，你番黎啦?」卓芝遞上佢為我預備既早餐。
「幾錢? 比番你。」
「唔洗啦，我係…..係你重要既人黎嘛。」我竟然期盼佢會話佢係我女朋友。
「唔好啦，我唔中意無啦啦受人恩惠，你幫我買早餐已經好好。」
「無所謂啦，我又唔係你外人。」佢仍然唔肯收番啲錢。
聽到呢句突然無名火起。
「我咪就係咩人都唔係囉。」我將份早餐既錢塞左落佢櫃通。
我氣沖沖咁食份早餐，肥森佢地見勢色唔對路都無行埋黎。
可能岩岩太惡，搞到卓芝好似想喊咁。
「你份三文治好好食，聽日可唔可以再幫我買。」
「唔買呀，我唔想幫你呢啲鬧女仔既人買。」
「買啦，我好想食多次，最多唔比錢你啦。」我央求佢。
「傻佬，邊有人叫人買早餐會話唔比錢人嫁。」卓芝笑住講。
「又係丫可。」我都忍唔住笑自己。
「你永遠都係咁可愛。」
或許我地仲係熱戀既當中，所以好快就唔會再嬲對方。
可惜熱戀敵不過現實。
正式上堂既時候，陳sir條爛坦話因為下學期關係要調位。
我同卓芝凸晒眼咁對望住。
「咁我地咪無得坐埋一齊係櫃通低偷情囉?」卓芝失望咁同我講。
「唔緊要啦，可能我地唔會調得太遠呢。」
小喇叭!!!豈有此理個陳磨碌，將我同卓芝調到天南地北。
坐我隔離係一個唔太熟，樣貌普普通通既女仔。
因為前期故事同佢無咩關係所以我都廢事介紹佢，為免太多人物整亂左大家。
不過我見佢個樣好似好開心咁。
「點算呀?」卓芝wts app向我求救。
「你都同你班上最fd既女同學坐啦，唔係好差姐。」
「但我地無得傾計!」
「而家咪傾緊囉。」
「wts app點同面對面姐。」卓芝真係好唔開心，但我又可以點?
對手係班主任，唔同我走埋同佢講我要林卓芝坐咩。
小息既時候，家楓又黎接走左卓芝去小食部買野食。
我心裡有無比既怒氣。
「行啦。」肥森走埋黎。
「去邊?」
「小食部呀仆街。」
我、肥森、阿謙、家樂一齊落去買野食。
落去小食部既途中，又見到家楓同卓芝係樓梯拖住手落去。
我真係睇到眼火爆。
我咩到無理，一支箭衝左去前面。
再以怒氣十足既眼神望向後面，我視線範圍有肥森三人同卓芝、家楓。
「行快啲啦!! 好撚肚餓呀!!」我向肥森怒吼。
呢一下我特登比卓芝知道我係到，想佢內疚，想佢知道佢做既一切我都睇到，同我有幾唔開心。
係小食部買完野食，多數都會食完先番上去。
我同肥森幾個自成一角咁係到食，家楓同卓芝就係附近卿卿我我。
嬲到我即頭想食晒小食部既所有人。
就係我最眼火爆既時候，我既天使又再出現。
「小狼，我請你食呀。」柔柔遞左袋牛肉球比我。
雖然佢講得唔係好大聲，但肥森、卓芝佢地應該聽到同睇到呢個情況。
「我比番錢你丫」我接過柔柔既牛肉球。
「唔洗啦，你平時請我食咁多野。」見到柔柔令人融化既笑臉，真係唔捨得拒絕。
柔柔你果然係我最好既妹妹!! 我一定錫晒你!!!
........你係我最好既妹妹，無論發生咩事我都會係你身邊。」