某天我脫毒了，走上了情聖之路: 第二十八章 - 決意
「卓芝，我好中意你，如果有得比我揀，我當初一定唔會做懦夫，所以今日我都唔會再因懦弱而放手，終有日我令你放心去愛我。」夜晚既時候我wts app卓芝。
我已經決定左爭卓芝過黎，要堂堂正正成為卓芝既男朋友。
「傻小狼，無啦啦講啲咁既野。」卓芝wts app我。
「我認真嫁!! 我真好中意你!!!!」
「知你中我啦傻佬。」
過多陣卓芝終於等閒同我傾電話。
「岩岩做咩無啦啦咁講既?」卓芝係電話。
「因為已經決定左要比幸福你，要同你挽手到老。」
「你突然咁認真我好唔習慣，不過我好感動你咁講。」
無錯，我唔會再將你拱手相讓比第二個男人。
你既幸福由親手守護。
「我對你從來都認真。」我用堅定既眼神同卓芝講。
「多謝你。」
我係一個講就天下無敵，做就有撚無力。
我煩惱緊點去顯得我對呢段關係係認真。
中學生有咩野能夠証明自己已經大個同定性?
咪就係成續囉!!
司徒家楓做到既野，我都做到!
我一樣都可以成為林卓芝最愛既男人。
我開始每日都keep住溫下書，我亦少左入召喚谷。
如果無野溫，我就預習第二日會教既章節。
「近期食錯藥? 咩都識答既你。」子欣上緊數學堂果陣問我。
「妖，我識如來神掌又話過你知?」
我串完佢之後，子欣就係咁拍我手臂。
我重力抽擊佢後尾枕，佢個額頭向前撞左落張枱。
「黃少朗、趙子欣!!!!你地玩夠未!?」臭口王鬧我地子欣。
「玩夠玩夠，sorry sir」我低聲下氣同臭口王講。
「你班主任都唔知點調位，成日調啲女比你溝。」臭口王抱怨。
班上既人叫囂既叫囂，大笑既大笑。
「都係你啦，搞到我比臭口王鬧。」子欣細細聲講。
「唔通我由你係咁拍?」
「緊係啦!!你男仔黎嫁。」
因為唔想又比臭口王鬧，所以我都廢事再理佢。
「你岩岩同子欣玩得好開心喎。」落左堂卓芝走埋同我講。
「哈哈，咁岩姐。」我支吾以對咁答。
「唉，仲係到掩飾。」
我用左好耐時間先氹到卓芝。
雖然卓芝係一個好好既女朋友，但啲脾氣真係………。
因為最近要多左時間讀書，所以陪少左肥森佢地打機。
加上我又冷醒，一識多啲就成日搶答啲問題。
因此我又開始惹黎大家既注視。
「你呢排做咩好似咩都識咁既?」卓芝係小息果陣走過黎問我。
「咁岩佢教果啲野我有興趣姐。」
好野!!我既努力終於引起卓芝既注意。
「奇奇怪怪咁。」卓芝講完呢句就行開左。
會注意我既人除左卓芝之外，當然仲有肥森哥。
佢都有問我點解課堂既表現會突飛猛進。
我都係是但用啲藉口耍走佢。
直至夜晚卓芝打比我既時候，我先講出真正原因。
「你好講點解突然勁左咁多啦喎!」卓芝係電話咆哮。
「因為我想用我既成績証明比你睇我對你係認真。」
卓芝默不作聲。
「我知我份人比較唔可信，但家楓做到既野，我都做到!」
「傻瓜，你就係你，你無需要成為另一個人，我只需要你做番自己，我唔想你因為中意我而變成另一個人。
我認識既黃少朗係一個好中意玩既人。我中意係本來既你。」
呢次輪到我無聲出。我心裡只有無盡既感動。
我無諗過會有人願意接受諸多缺點我既我。
「我知道啦，我會好好番自己，努力愛你。」我回過神黎。
「不過你都要繼續努力讀書，我只係唔想因為我而去努力讀書。」
「得啦知啦。係呢! 其實你點解會中意我既?」
我一直好好奇點解有男朋友既卓芝仲會中意我呢啲除左柒之外就唔顯眼既人。
「你同其他人好唔同，比起其他男仔你有一份溫柔，有一份善良。雖然你把口好衰，但你對人好好，只係口不對心而已。
你永遠唔會用對耳仔去聽人講野，而係用心去聆聽。我每次有唔開心你一定會靜心去聽，去安撫我。
你總係令我有一種說不出既安寜。好似時刻都係你身邊。」
第一次有女仔同我講呢類既說話。
我無諗過自己原來咁大既魔力。
雖然我想問埋佢對家楓又係咩感覺。
但無謂令自己唔開心。
選擇沉醉係呢一刻既謊言好過啦。
我每一日都沉醉係我同卓芝呢段唔見得光既感情入面。
縱使無得好似普通情侶咁拖手行街，但知道佢心裡有我就已經足夠。
我真係唔知我同卓芝可以維持幾耐，亦唔想去諗，我呢一刻有佢係身邊就足夠。
話咁快我同卓芝呢段地下情已經兩個月。
有唔少人都開始懷疑我同卓芝。
始終紙包唔住火。
「我好驚我地件事會揚左。」卓芝係夜晚打黎同我講。
「我都怕，咁不如我地少啲接觸?」
「都好，淨係番到屋企講電話先講野?」卓芝問。
「暫時都要，避下火頭都好。」
謠言越強，家楓出現係我地班房既次數就越多。
我同卓芝既見面同溝通都變得越黎越少。
有一日柔柔wts app我。
「其實你同你班個林卓芝係咪真係有野?」
「點解咁問?」
「啲人傳得你地好勁。」
「咁你覺得呢?」
「唔知呀(眼淚emoji)」我唔想呃柔柔，我好想講比柔柔知。
「柔柔，其實我同卓芝真係有一齊到。」我都係選擇講比柔柔知。
柔柔比左一連串既驚訝emoji我。
「點解你要咁做?」柔柔繼續係wts app問。
「因為我真係中意佢，我都唔想。」
「你有好多女仔可以揀，你咁做係唔岩嫁。」
柔柔真係好單純，雖然佢好想指責我。
但當聽到我唔開心我難過既時候，佢立即咩都唔理咁安慰我。
柔柔同佢個名一樣，一樣咁溫柔。
如果我愛上係柔柔既話，唔知結果會變成點呢?我同柔柔一直傾到訓著左?
突然電話響起。
我拎起部電話下意識講左句
「柔柔….」
你總係令我有一種說不出既安寜。