某天我脫毒了，走上了情聖之路: 第六章 - 林卓芝

自從果次之後，我就再無見過希希。
我都離開左某某神域，走左入召喚谷。
每日既行程就係食野同打機。不時會諗起佢，諗起自己有幾衰。
就咁樣頹廢左一個暑假。

九月一日。
中三既第一日。因為開學前已經收到email通知我讀邊間班，所以我一早就知道我又同肥森一班，而長毛低我地一級，更無可能同班。
一入到學校我就搵3B班係邊。

「小狼!!!!!」正當我行緊上五樓既時候，有把女仔聲叫我。




我令轉頭就見到卓芝向住我呢邊跑過黎。
「嘩!聽肥森講你整容，原來係真嫁。」佢搣住我塊面講。

卓芝係我一個好好既女性朋友，我同佢玩得好埋。
有時候仲搞到佢男朋友呷醋，我都唔好意思。所以我都盡量避免同佢太熟。
「妖!」我撥開佢隻手繼續講「比家楓見到又有排煩嫁啦。」家楓係卓芝既男朋友。

家楓高我地一form，可以話係男神般既存在，讀書年年第一，人緣仲勁好!!唔係因為佢靚仔同讀書叻。

而係佢好抵得諗，好中意幫人又無架子，佢簡直係一個完美既存在。




除左肥森之外，我同卓芝今年都係同班。
唉，咁就大獲，實有排煩。雖說佢係男神級，但係絕頂痴身男友，無論卓芝做咩都要匯報比佢聽。24小時全天候貼身膏藥。所以家楓一直視我呢位卓芝既親朋密友為情敵。處處逼我。
我望一望卓芝個樣，心中有千萬個疑問。

「點解家楓會咁中意你既?」我忍唔住問左出口。

佢睥一睥我，跟手就一拳鍋落我個肚到……
我屌，痛那到呢……
卓芝鼓起塊面珠，氣沖沖咁衝左入班房。
雖然卓芝未稱得上係女神級，但都幾靚女，微胖既臉珠登令佢添上幾分天使般既可愛。




自從上年我同卓芝下學期一齊坐之後，就開始熟同玩我好埋。下學期去到一半佢同家楓一齊左，所以我同卓芝係暑假果陣都無搵大家。

打開班房門。原本係到喧嘩傾計既同學們都靜晒望住我。
「小狼?」家樂呆望住我。

「小狼!!!!」肥森撲過黎攬住我。
我隱約聽到大家係到輿論我。
呢首短短既小插曲被中三第一個鐘聲打破。
全部人以不情願既步伐前往禮堂，聽校長廢up。

「每年都係我致開學辭，我都覺得好悶，所以我今日請左司徒家楓同學向大家致開辭。」估唔到校長咁識做，識搵男神做開學辭。
唔怪得今日開學唔見呢塊膏藥痴住卓芝啦，原來有更重要既任務。
完左早會之後我地就行上番班房。
「唔怪得你塊膏藥無痴住你啦。」我同卓芝講。
「咪咁講佢啦。」卓芝簡單咁回應我。






上年既班主任，陳sir今年繼續連任做我地班主任。
托佢鴻福，卓芝又坐我隔離。
佢話上年卓芝坐左我隔離之後，我成續有進步，所以繼續編佢同我坐。
我奶硬野都得啦……
我晏晝同肥森、長毛同肥森呀妹浩兒一齊食飯。
食完番到班房既時候，見到家楓同卓芝係到談笑風生。

當家楓意識到我既時候，我見佢向我放出殺氣。
我相信我係唯一一個會令佢放出殺氣既人，因為佢份人真係nice，好難會嬲同有脾氣。
「黃少朗，你唔同左好多。」家楓行埋我面前同我講

「係呀。」為免講多錯多，我都係求其答就算。
卓芝見到情況唔妥就過黎幫我地打圓場。




家楓都番左自己班房。

「家楓係易呷醋啲，唔好唔開心。」卓芝安慰我。

「都唔明點解好好地一個男神要呷我呢啲毒撚醋。」我抱怨。

「可能其他人未察覺到你有一股令女生安寧既氣質。」

「邊有女仔見到毒撚會覺得安寧嫁?」

「家楓睇人好準，可能你自己未覺，當你呢種氣質與日俱增既時候，你就會發覺有好多女仔想同你交心。」

「好似你咁?」

卓芝驚訝咁望我住，塊臉頰開始紅起上黎。佢又大又圓既眼真係好靚。




鐘聲打破左我地之間既次元。
放學既時候，落起大雨，肥森同佢呀妹搭的士就走左。
我望住家楓同卓芝二人共用一傘既背影，心頭有種莫名其妙既酸。

「你係咪無帶遮呀?」一位唔認識既女同學問我。







你有一股令女生安寧既氣質