某天我脫毒了，走上了情聖之路: 第七十六章 - 一年後
一年後．
「食得!!!!」肥森大叫。
「落肥牛!!!!」阿謙成板車落去。
「你洗唔洗咁狼?」柔柔男朋友問。
今日我地慶祝完左期中考而去左肥森屋企打邊爐。
同佢地一齊吃喝真係好爽.....
不過見到佢地個個情侶一對對就.......
「屌狼，我想食響鈴。」矮小既嵐嵐指住遠處既響鈴。
「你岩岩叫我做咩話?」
「快啲啦!!!」
我夾起響鈴放入鍋中，再將響鈴從鍋中抽出，
湯汁由半軟半脆既響鈴上滾滾流出......
嵐嵐雙眼發出一絲絲既飢渴既眼神....
我將整條響鈴...........放入.......自己口中......
「啊!!!!!黃少朗!!!!....比番我呀!!!」嵐嵐捉住我手臂。
「真好味~」
「啊....我要呀......幫我啦!!!」嵐嵐不斷搖動我隻手。
「嵐嵐~」柔柔將響鈴夾到嵐嵐碗中。
「都係表姐最好......唔似得啲賤人咁。」
「你唔好成日都咁話小狼啦。」柔柔幫我講好說話。
「表姐你清醒下啦..........」嵐嵐扮喊。
「你咪再玩佢啦....」柔柔一臉無奈...
「頂你...臨時演員都係演員....比啲修養...」我搣住佢塊面。
呢段時間覺得好多野都變左，
柔柔拍拖、肥森有左天欣、阿謙既冰山被劈開、長毛同浩兒刷出愛火花;
晴晴離開左、家樂失蹤左、.......連佢.....都消失我無影無踪.....
唯獨無變既係嵐嵐......
依然都係中意挑我機....
每次見面，最後都會娛得吵鬧收場。
如果我有一個真既妹妹，會唔會就好似佢咁呢?
「條毒撚又開始FF啦......」嵐嵐道.....
散既時候，肥森話有野想同我傾傾, 叫我同佢去行下。
「你唔洗送天欣番屋企咩?」我問肥森。
「今晚唔洗...」
「下?」
「總之唔洗.....」
我地兩個行左一陣，
肥森終於開聲。
「其實....對唔住....」肥森突然向我道歉。
「搞咩?」我驚訝....
「自從拍左拖之後我真係少左同你吹水.....特別呢一年你又....」
我拍一拍肥森膊頭....
「其實我真係無野，即使你地唔講出聲我都感覺到你地對我既關心。更何況我已經無咩野....」
「雖然你表現到無咩，但你總係不其然地流露出一絲憂傷。家樂既失蹤、小櫻既....離去.....」
「時間......時間係唔會因為我既悲傷而停止，佢地既離去已經係事實，我要做既野都已經做晒...我只能夠繼續向前行....」
「小狼....你仲中意小櫻嗎?」
「我....已經無再諗愛情。」
「就咁逃避落去真係好嗎?」
「我只係選擇繼續向前行而已。」
「你咁係逃避，你不斷將自己每日既行程排到緊緊密密，一放學就做幾個鐘gym，之後就自己打機做功課，越黎越唔同人交流....」
我打斷肥森既說話....
「咁你教我可以點? 我成個人停係到喊你覺得有意思咩? 小櫻會番黎? 家樂會再出現?....唔會呀!!!!，
無論我地做啲咩，一切都係徙然，所有野都唔會改變.....」
肥森捉住我衫領。
「你認為你用呢種晦氣既心態就係繼續向前行? 真正既向前應該係你一步一步慢慢咁放低小櫻，而唔係扮無野係到強顏歡笑!」
「放手。」我冷言。
肥森將我扯高。
肥森真係好大力，扯到我雙腳腳踭微微離地...
「你咁係咩態度?」
「呢句應該係我講先岩......明明小櫻既事係發生係我身上，而你就講到自己好有經驗咁係到指指點點，
你真係明我感受咩?!! 起碼你同天欣仲一齊開開心緊，就知你唔會體會到我呢種痛。」
肥森因我既說話而動搖，慢慢鬆開手。
「你講我岩，可能我真係唔明你有幾傷心.....但你係我最好既朋友.....見到你咁，你覺我我可以袖手旁觀? 」
我握住肥森原本捉緊我衫領既手腕「多謝你......對唔住.....我.....我真係唔知可以點面對....我仍然接受唔到佢已經離開左，我仲好中意佢...」
肥森講得無錯，
我的確係想用盡方法逃避現實....
每次想去面對，想去忘記既時候，
心裡既痛....痛得一次比一次接近崩潰...
「你唔係自己一個。」肥森走前講左一句。
呢句話提醒左我。
佢講得岩，我並唔係自己一個。
即使我心入面有幾中意小櫻，
但唔等於我無左佢就咩都唔係，
我心入面仍然好中意好中意佢，
可能兩年、三年、甚至十年後我都仍然咁中意佢，
但我都無理由因為咁而放棄一切.....放棄自己.....
行到番去大廈門前，
又見到一個熟悉既背影....
佢仍舊係一張傻笑臉....
「你咁夜係到做咩?」我問。
「等你。」
「下? 無啦啦做咩等我?」
佢拮高腳摸住我頭頂，
「因為你唔開心囉。」
「無唔開心，番屋企啦。」
佢跟隨我既步伐一齊走入大廈。
「後日一齊番學~」佢問。
「睇下點~」我答。
無左一個你愛既戀人，也許你會悲傷得要生要死，甚至覺得全世界只剩下你一人 ;
但稍稍抽身一看，身邊仲有好多同伴支持你，值得你去同佢地一齊笑。