某天我脫毒了，走上了情聖之路: 第七十七章 - 是緣? 還是孽?
思愉︰[你到未?]
我︰[下個街口到...]
思愉 - 晴晴既好朋友。
自從晴晴走左，
我同思愉一直都有保持簡單既wts app聯繫，
但可惜每當我想問有關晴晴既事，佢都立刻轉話題，甚至已讀不回。
思愉邀請我去佢教會既Christmas party....
但佢地既Christmas party唔係聖誕正日。
我有問過思愉點解唔係正日搞，
佢話正日教會有好多活動，
所以就係之前搞，
啲時間會易啲按排。
本來唔太想去，
但基於思愉強硬既態度，
我最終屈服左.........
因為怕悶既關係，
我決定帶埋嵐嵐去....
走進教會門內，
令我諗起晴晴.....
唔知佢而家做緊咩呢?
教會人果然好熱情.....
搞到我有啲唔慣...
直到我地坐低...
「嘩屌....從來未試過一次過同咁多陌生人講野....」嵐嵐再次真情流露。
「小....小狼。」思愉向我打打眼色。
「嵐嵐!」我叫一叫佢。
嵐嵐意識到自己講錯野就掩住口.....
不過坦白講，
但但咁多人同佢講左咁多野，
佢一個字都無講過，已經好好....
party終於開始....
一開波佢地簡單既唱詩歌，
幾柔和，幾好聽.......真係估唔到。
唱完之後，
就開始遊戲同食野
老實講，我對教會既認識唔太多。
一路都認為佢地係一班悶蛋，
但估唔到佢玩起上黎都幾癲。
係食野期間，
男男女女都爭住同嵐嵐傾計，
特別係思愉，
對嵐嵐勁好，
佢兩個仲變得好投契.....
真係唔知點解嵐嵐總係一種魔力，
一種令身邊既人會自然走去愛錫佢既魔力。
完左活動之後思愉邀請左我一齊同佢班frd去食糖水。
啲人話教會多靚女，
呢樣真係見仁見智。
可能因為咁....D男仔既目光好自然投向左嵐嵐..
其實嵐嵐既顏值加佢清爽既性格，
無疑係可以收好多兵。
但以佢單純既性格應該唔會咁做，
希望佢大個左都唔會學壞.....
「阿叔，你叫得未?」嵐嵐敲我頭。
「得啦.....要個桑寄生蓮子蛋茶。」
「阿叔又食老餅野。」
「係傳統! 唔係老餅!!」激死mode...
「有差嗎?」
「你地感情都幾好。」突然有條友亂入。
「一啲都唔好!!!」我口快答。
「咩你咁嫁.....」嵐嵐突然唔開心...
在場好多人黑面起黎...
睇黎佢地太唔認識嵐嵐....
嵐嵐呢個樣明顯係扮可憐等我係眾目睽睽之下束手無策....
最主要目的....都係令我難做同臣服係佢淫威低下...
「因為我地既感情已經唔可以單單用個好字黎形用。」我手心放係佢頭頂。
「好嘔心....我得14歲咋。」
我感覺到身邊既人用一啲奇異又鄙視既目光望住我....
場面相當尷尬，進退兩難。
最後要思愉幫我打圓場...
「係呢，嵐嵐你住邊嫁?」突然有人問嵐嵐。
「筲箕灣~」嵐嵐答。
「咁小狼呢?」
「筲箕灣。」我答。
「你兩個咁岩都住筲箕灣!!?」有人雙眼發閃。
「係呀，我地住埋一齊。」嵐嵐搶答。
我再一次feel到一堆鄙視而又好奇既目光望住我....
「其實你地咩關係?」有人係我澄清前問。
「我地係密友!」嵐嵐又搶答。
「wowwww」好多人都驚訝到叫左出黎。
「我地係同學兼鄰居.....同埋咁岩住埋一棟大廈....唔係密友..」我解釋。
佢地用羨慕既目光望住我...
也許同一個可愛既女同學成為鄰居係一種緣份，
但同嵐嵐成為同學兼鄰居.....係種孽緣......
係番屋企途中，
嵐嵐不斷係到講野無停過，
基本上我無咩點應佢，
但佢就一輪嘴自己係到講，
有幾次仲比口水濁親....
「你平時係咪無人同你講野?」我忍唔住問。
嵐嵐靜左一陣子....
無正面回答，
繼續佢果啲無聊既話題。
但係嵐嵐靜果一瞬間，
我隱約見到佢流露一絲悲傷。
「嵐嵐。」
「咩?」
「去食雪糕好無?」
「真嫁?」
「係。」
「好呀!!」嵐嵐心心眼。
我地係海旁附近既七仔買雪糕，
是但坐左係啲長櫈。
由於平安夜既關係，
海旁特別多情侶。
海旁...
情侶....
小櫻.....
fuck......
「凍」嵐嵐用手摸我塊面。
「好凍! 搞咩?」
「因為你食雪糕果陣發吽逗。」
如果係平時既話，
應該又會觸發口角...
不過今次唔係佢既話，
我應該又會陷入無限悲傷既結界。
佢真係純粹係整蠱我定係察覺到我既唔開心先咁做呢?
雖然佢好煩，什至有時都幾討厭，
但每當同佢一齊，煩惱同憂愁都好似突然消失左咁，
可能就係呢份樂天又直率既性格，令到嵐嵐一直都受大家既愛載。
嵐嵐係我隔離打左個冷震。
「凍?」我問。
「唔...唔凍。」嵐嵐把聲震震地。
嵐嵐又係到死頂。
我除左我件褸比嵐嵐。
「唔要，我真係唔凍。」
「著住啦，人都震晒仲話唔凍。」我強行用件衫笠住嵐嵐。
「咁你唔凍咩?」
「唔凍。」
其實我都死頂....
「不如咁啦，我住著你件衫，然後你孭住我番去，咁你運動量大左咪無咁易凍囉?」
嵐嵐講得頭頭是道。
「講咩呀你，你都係想人孭你之嘛。」
「咁我唔著。」嵐嵐想除番我件褸。
「怕左你，上黎。」
嵐嵐一彈就上左我背脊。
「好臭....」
「妖，仲嫌三嫌四。」
彷彿聽我出嵐嵐既背後語...
越係中意就越抹得黑，
雖然好直率，
但面對自己真心喜愛既事物，
仍然會有種少女般既害羞。
「唔好行咁快，我驚我暈車浪。」
「係....」
行番屋企既呢後路，
嵐嵐無乜點講野，
應該係太累。
只係有一刻嵐嵐突然攬得好實。
「哥....哥..」
「哥哥?」
嵐嵐無答，
好似瞬間訓著左咁。
我撳嵐嵐屋既門鐘，
然後交番嵐嵐比應門既屋企人。
「麻煩晒你呀小狼。」
「唔麻煩。我唔好意思就真。」
「唔好咁諗，得閒上黎坐下，凍啦，快啲番屋企。」
寒暄左幾句我就落番屋企。
但係岩岩交收嵐嵐既期間，
我望到嵐嵐家中掛左一幅全家福，
隱約見到嵐嵐屋企人當中仲有一個男仔，
同嵐嵐有啲似樣。
但我從未聽過嵐嵐有兄弟，
一路以黎都以為佢係獨女。
應該係話我嵐嵐既事，
其實一無所知。