某天我脫毒了，走上了情聖之路: 第四十一章 － The Last Date
我同柔柔會係分開?
定係繼續落去?
無言柔柔係我最中意既女仔。
好唔容易我鼓起勇氣同佢一齊，但呢一刻我應該點選擇?
食完飯之後我wts app左柔柔。
我︰「我同你爸爸食完飯。」
柔柔︰「食成點?」
我︰「幾好，你爸爸真係好好人。」
柔柔︰「你地傾左啲咩?」
我︰「我地既野。」
柔柔突然打黎。
「柔柔?」
對面發出幾下索鼻水既聲。
好心痛，我感覺到柔柔喊緊。
「小狼，對唔住，我比佢發現到我一齊，我守護唔到我既關係。」
「唔關你事，我本來就唔應該要你獨自承受呢啲野。」
「但食得咸魚就抵得渴，如果我可以堅強啲……」
「柔柔你已經好堅強，更何況問題唔係你到。」
「如果我大個啲就可以同小狼你永遠係埋一齊，都係我既問題。」
「呢啲事無人控制到，你已經好努力。」
柔柔不停喊，啊得好淒厲。
我無講咩，只係聽住佢係到喊。
應該係話陪佢一齊喊先岩，只係我無喊出聲。
「柔柔，不如我地聽日一齊出去玩?」
「可以咩?」
「當然，柔柔係我最錫既女朋友黎喎。」
「嗯!」
「咁你因間問下你爸爸。」
「Daddy唔知比唔比?」
「放心啦你爸爸會明。」
「咁好啦，我因間問下Daddy。咁聽日我地去邊?」
「我轉頭話你知。」
「Ummmm…好啦咁。」
同柔柔收左線之後，我就打比佢爸爸。
「唔好意思Uncle，咁夜打比你。」
「小狼，有急事?」
「嗯，聽日可以比我同柔柔出一日街嗎?」
「睇黎你決定左，聽日你同中意玩到幾點都可以，只要你送佢番黎就可以。」
「多謝你呀Uncle，你真係一個明白事理既長輩。」
「還可以啦，小狼，你真係好勇敢，換轉係我，一定唔會好似你咁做。」
「我只係想柔柔好。」
「聽日盡情玩番一日，作為長輩既我係你既勇氣面前感到羞愧。」
「只係因為Uncle我先夠膽咁做。」
「睇黎我地惺惺相惜。」
柔柔既爸爸真係好錫柔柔，而且係用左岩既方法去錫佢。
佢大可以大鬧我地，趕走我。
但佢選擇去同我地一齊處理。
佢係唔只係一個好爸爸，仲係一個好長輩。
第二日，我帶左柔柔去海馬公園。
柔柔一落車就開心到周圍跑。
「好黑呀!」
估唔到柔柔怕黑既程度，連海洋列車都驚。
「咁多人係到唔洗驚啦。」
「總之好驚啦。」柔柔攬到我實一實。
「唔好搵藉口抽水好喎小朋友。」
「嘻嘻，比你發現左tim。」
我地一開波就勁玩機動遊戲。
我無諗過柔柔完全唔驚，仲大膽過我。
「唔得啦，老子要抖抖。」
「咩你咁咋嫁。」
「係你痴線姐。」
「咁去睇動物?」
「好呀!」
得救了!!!!
我地去左鯊魚館。
「嘩，比佢咬一啖唔知會點。」柔柔係到讚嘆
「無左勿肉囉。」
「咁咪好肉酸?」
「應該同你而家差唔多。」
總覺得柔柔說話既方式越黎越似我。
「嘩!真係有狐狸嫁!!」
「嘩!啲企鵝呆呆下好得意呀!」
「嘩!啲熊貓好肥!」
柔柔去到邊嘩到邊。
如果唔係柔柔既話，真心係煩。
可惜佢係柔柔，無論幾白痴都依然咁可愛。
「小狼!快啲過黎! 我想玩呢個!」
「會濕晒嫁喎。」
「夏天咁唔怕啦。」
我地係無防備，無後備衣服低下走左去玩激流。
「仆街!!條蛋散係咁射我。」
「哈哈哈哈哈哈」柔柔係咁傻笑。
「笑咩!?」
「你啲反應好得意。」
「咩呀，比人射水係咁嫁啦。」
柔柔真係笑得好靚。
唔知以後仲有無機會見到呢?
走番出去果陣，我同佢都濕晒。
「噢，濕晒lu。」
柔柔出水芙蓉咁既樣吸引左好多視線。
「知啦，你快啲去廁所抹抹。」
差啲又比人睇蝕。
我抹完就係廁所門口等佢。
女仔果然係搞耐啲。
佢終於出黎，但佢心急得制成個仆左係地。
「痛唔痛呀?」
「好痛呀T^T」
我拎水幫佢洗一洗。
「行唔行到?」
「啊!」柔柔痛叫左一下。
「我孭你啦。」
「唔洗啦，我可以嫁。」
「上黎啦。」
「對唔住，搞到無得玩。」
「唔會啦，我地都玩到七七八八。」
「又係丫可。」
「你真係玩到咩都唔知﹐你餓唔餓?」
「少少啦。」
「咁撘車出CWB食?」我問柔柔。
「好呀。」
「小狼。」柔柔又講。
「?」
「你背脊好暖好舒服。」
「嗯。」我怕醜了。
「如果可以一直伏係到就好。」
柔柔呢句話令我好心up。
上到巴士，我地互相靠依咁訓著左。
柔柔啲頭髮好香。
仲訓到流晒口水。
真係好可愛，好想永遠係佢身邊。
係銅鑼灣食過飯之後就去左太古睇戲。
全程都十指緊扣住柔柔既手。
周不時就搣佢塊面。
搣到紅晒等佢發嬲果陣真係好可愛。
最後我地企左係海旁，一個無咩人既位置，一齊相擁望住個海。
「今日好開心呀小狼。」
「我都係，真係好開心。」
「個月光好圓。」
「個天仲好清，個月亮真係好靚。」
「你會唔會變人狼嫁?」
「我係叫小狼唔等於我真係隻狼。」
「哈哈，個月光靚啲定我靚啲?」
「當然係你啦，除左靚你仲好可愛tim。」
「口花!」
「我講真嫁，仲記唔記得我地點識?」
「有唔帶眼既師兄撞跌晒我啲書。」
「果陣見到你已經覺得你好可愛，好想識你。」
「你作野。」
「肥森佢地可以做證。」
「信你啦。」
「咁你咩時候中意我?」
「有次你借件衫比我果陣。」
「估唔到係果次。」
「係，係真係好溫柔，我有事你都會係我身邊，又陪我溫書。不知不覺就想係你身邊。」
「我都係，總覺得有你係身邊，心靈就可以安定落黎。」
「小狼，如果我地無左對方會變成點?」
「我都唔敢想像，係無想像既痛。」
「嗯，一定好痛好辛苦。」
「真係好想時間永遠係呢一刻。」
「我唔想同你分開。」
「我都唔想。」
「小狼….」柔柔望住我雙眼。
「柔柔….」我望住柔柔雙眼。
「我….」
「柔柔我愛你。」我搶柔柔對白。
「小狼，小狼，小狼….」柔柔一路叫我個名，一路伏係我心口喊。
我抱緊佢。
「唔想分開，我想同小狼一齊，永遠一齊，一齊長大，我要做你女朋友，要同你結婚!!」
「柔柔….」
「對唔住呀!!如果我可以堅強啲反抗父母….」
「柔柔，呢個唔係堅強與軟弱既問題，而係愛，你唔係唔敢反抗父母，而係你愛佢地，唔想傷害佢地，你明白佢地為你好，你懂得佢地既溫柔，佢地既愛。就好似我愛你一樣，唔會想傷害你，唔會想害你兩難當中。」
「我可以唔愛我既父母，我可以任性。」
「如果你真係咁做就唔係我所愛既柔柔。我所愛既柔柔，唔比會比佢所愛既人受傷害，一直都以溫柔既微笑治癒他人。而懂得咁去愛人既柔柔，正正就係因為佢懂得父母既愛。因為柔柔唔會破壞愛，所以柔柔一直好似天使咁愛著我。柔柔，我都同樣愛你，所以希望你有健全既幸福，健康既愛，我愛你，但唔一定要去擁有你，係唔適栴既時間相愛，可能智永遠咁傷害對方。你仲記得卓芝嗎?我唔想你成為下一個佢，如果我地係命中注定既一對，一定會再次相愛，然相廝相守相皆老。」
「小狼….我愛你愛你愛你愛你愛你愛你!!!!」柔柔抽泣地說愛我。
「阮芯柔，你既心意我收到，多謝天使你下凡愛我。」
「黃少朗，多謝你一直都照顧我錫我愛我，我會永遠記住你用愛去接待我呢個天使。」
「傻妹，本來愛你就係我既職責。」
我地相擁、相吻了。
相吻間我嘗到淚水既味道。
明明味覺告知我係咸的，為何我會嘗到酸澀呢?