某天我脫毒了，走上了情聖之路: 第四十章 - 男人間的認可
玩到夜晚我地就專心BBQ。
柔柔好快就融入左我地，好似讀埋同一班咁。
「話時話，小狼你同柔柔係點一齊?」家樂突然問。
「我都想知呀!!」子欣竟然附和家樂。
佢地搞到柔柔同我好尷尬。
「我咪行埋去拖住佢隻手，佢無放開，咁咪一齊左囉。」我係咁意答佢地。
「你答得再hea啲丫笨。」家樂十分不滿。
「咁唔係你想啲呀?」
「應該要有啲浪漫情節先配得上令柔柔女神同你一齊。你咁求其就米，實在太便宜你呢個毒撚。」
「陳家樂你唔好越黎越過份喎。」我真係比家樂激死。
究竟家樂今日係咪食錯野?
周圍搞屎棍。
「我都係好奇下姐，咁森森呢?」家樂轉移視線到肥森。
接下來，肥森無答佢。
只係比左一個令佢難忘既晚上。
如果我地永遠都可以一齊玩就好。
唔知兩年後既我地會係點呢?
我送柔柔到佢屋企樓下。
「我今日玩得好開心，多謝你呀小狼。」柔柔。
「咁就好啦，甲硬要你黎，仲驚你會悶。」
「唔會啦，佢地全部都好好人。除左家樂之外。」柔柔微笑。
竟然令到柔柔咁講，睇黎柔柔應該好不爽家樂既行為。
「柔柔?」突然有把成熟男聲。
「Daddy。」柔柔望住我背向既方向。
「hello，你係小狼?」Uncle向我打招呼。
「係…係呀，Uncle你好。」
「唔洗咁見外。要唔要上黎坐下?」
「咁夜打搞你地唔太好。」
「又係喎，時候都唔早，咁得閒上黎食飯啦。」
「好呀!Uncle見到，我一定到!」
「好好!!多謝你送柔柔番黎。」Uncle笑左兩聲。
「唔洗客氣。」
佢地番左上去，我就行去地鐵站。
岩岩真係緊張死。
我總算應對到嗎?
希望無講錯野啦。
聽講佢屋企人唔太讚成柔柔拍拖，唔知佢阿爸會唔會懷疑呢?
SD個wts app過去先。
我︰「岩岩好緊張呀!」
柔柔︰「我都係，無諗過會突然出現。」
我︰「你爸爸會唔會發現到我地拍拖?」
柔柔︰「我都好驚。」
我︰「唔怕啦，佢又唔會對你做啲咩。」
柔柔︰「我驚我地唔可以係埋一齊。」
我︰「唔會，我唔會離開你。」
柔柔︰「我真係好中意你。」
我︰「我都好中意你。」
我一直都覺得我同柔柔會永不分離。
拍拖、升學、結婚。
至少我係咁諗過。
數日後。
呢段時間我地仲有啲試後活動，未正式放暑假。
托學校鴻福，我暫唔愁見柔柔既事。
但暑假一到就要煩同柔柔見面既事。
始終佢唔可以經常出街。
如果成日出街可能會比佢屋企人懷疑。
加上佢又有自己既朋友，無可能長期霸住佢。
話說佢琴晚開始已經無應過我wts app。
搞到我心癢癢。
「你做咩苦埋個樣?」子欣問我。
「柔柔琴晚開始就無覆我wts app。」
「帽事既。」
「你食屎啦，柔柔唔係啲咁既女仔黎。」
「知啦知啦，咁因間放學去搵佢囉。」
「就咁決定。」
與此同時，我收到一個唔識既人既wts app。
「小狼你好，我係柔柔既爸爸，對唔住突然搵你，我今晚想請你食餐飯可以嗎?」
我︰「當然可以。」
之後Uncle sd 左地點同時間比我。
雖然訊息上帶住安穩，但心入面有住無限既不安。
呢一切黎得好突然，會唔會係同柔柔唔應我有關?
我亦都趕緊wts app柔柔。
我︰「你阿爸叫我去食飯。」
柔柔秒回︰「係呀。」
柔柔只係簡單咁覆左一句。
雖然佢既回應好冷淡，但我都堅持問佢琴晚發生咩事。
柔柔︰「琴晚部電話壞左聯絡唔到你。」
如果電話真係壞左，仲有好多方法可以聯絡我。
假如佢真係想搵我既話。
但通常出現呢類情況既原因多數得一個。
不過係其他女仔既話我或者會覺得係帽事，但柔柔絕對唔係啲咁既女仔。
我信佢，我絕對相信佢。
係我諗到入晒神既時候，電話又響起。
「狼哥!」對面傳黎一把女聲。
「做咩無啦啦搵我?」
「呢幾日得唔得閒?」
「都…有既，做咩?」
「悶呀。」
「又搵我攝時間。」
「唔好咁講，我係香港無咩朋友嘛。」
「你係香港無朋友，咁邊到先有你啲朋友?」
「澳洲囉，你唔知我無係香港讀書好耐?」
「好似無聽你提過。」
「是但啦，咁約你兩日後啦。」
「哦。」
「到時再wts app你。bye」
原來晴晴過左澳洲讀書，唔怪佢平時放長假先會出現啦。
我完全無注意到佢既野。
佢小學應該係香港讀，點解唔搵小學同學，要黎搵我呢個係公園無無聊聊識既男仔。
仲記得細個成日比佢呢個男仔頭恰。
唉，諗起都覺得自己無用。
晴晴既野都係唔諗住，我都係煩惱下今晚點算。
無啦啦見家長。佢阿爸仲要約得我咁急，令我有唔好既預感。
“砰”
「對唔住呀。」屌我又諗到入晒神，無睇路。
「唔緊要，比你撞到都基於命運。」
「下?」
「你有無諗過係命運安排我黎撞你?」
「咁命運有無我一腳伸你出馬路?」
今日搞乜?好似諸事不順咁。
「我地無呢樣命運，先生，我黎係比個忠告你。」
「下?」
其實我做咩要係到聽個痴線講野?
但老老實實，我又好奇想知佢會講咩。
「只要繼續同果個女仔一齊，你生命就會變得唔平凡，你有一日會遇上命運之藍，兩人既交替會孕育出新既顏色，呢個顏色會象徵和平，一切事件都會過去，你地既命運都唔會再交纏。因為一無了一，再不能進二。」
坦白講，聽到我一舊雲。
佢應該真係痴線。
「首先我唔係基，唔會遇到咩命運之男，仲有!我真係會繼續同我女朋友一齊….」
咪住!
點解佢會知我有女朋友?
佢係跟蹤狂? 純粹盲估?
「信同唔信只係取決於，可惜人只會相信自身認為範圍既東西，好少會相信未知既事物，因為咁樣會為佢地帶黎不安，本能亦會抗拒接觸未知之物，因此亦都係人類智慧既絆腳石。有啲野你以為自己失去左，但其實一直存在，只係你選擇視而不見。最後一個忠告，離開你身邊既女仔，你既人生會好過一啲，我指既唔係短暫分離，而係永遠離開，你已經係不知不覺間遇到果個男仔，趁命運未正式展開，而家離場仲趕得切。」
我呆左望住佢行走。
呢個人痴得好完整。
應該係中二病上腦。
要我離開柔柔係無可能既事!!
比個痴線佬晒左我好多時間。
要趕緊收拾心情見柔柔爸爸。
「等左好耐?」柔爸問我。
「唔係，只係早你5分鐘到。」
「隨便叫野食，我請。」
「唔太好，無啦啦要Uncle你請。」
「唔緊要啦，你就當多謝你平時咁照顧柔柔啦。」
「咁我恭敬不如從命。」
我地一路食一路傾計。
主要係傾我既背景，大過想做咩。
咩都講上。
Uncle個人好幽默，同佢傾計唔會太悶。
只係突然間問左一句令我噴飯既問題。
「小狼呀，你有無中意既女仔?」
「無，無呀。」
Uncle其實我中意你個女…..
「我明白係難開口既。小狼你係咪中意柔柔?」
睇怕佢都係有備而黎，再呃落去都無意思。
「Uncle，對唔住岩岩同你講左個大話，我確實係中意柔柔。」
「多謝你坦白，小狼咁我都坦坦白白。」
氣氛好緊張，但Uncle都好好盡量令到氣氛輕鬆一啲。
「首先我覺得你係一個好男仔，能夠被你中意，對於柔柔、對於我地黎講係一件開心既事。我地亦知道你同柔柔已經拍緊拖，本來拍拖唔係咩大不了既事。但柔柔只有中一，仲係好細個，我地認為唔適合拍拖住。我好明白我個女有相當既吸引力，你會想同佢拍拖都可以理解。但未免真係太早，柔柔係身心靈各方面都未成長，日後我地仲可能會送柔柔去外國讀書。如果你真係中意柔柔就應該為佢好，都起碼等到佢中學畢業之後先。柔柔佢由細到大都未講過大話，佢為左你甘願呃我地。佢唔講大話係基於佢善良，覺得呃人係唔好係會傷害人，柔柔媽媽當然好傷心。但我可以理解柔柔既苦困，佢可以為你呃我地，我唔會否定佢係愛你呢個事實。但我想你知道，柔柔而家處於手心手掌都係肉既處境。如果你真心愛佢，希望你考慮一下佢既處境，如果你真心為佢好，你會想佢同屋企人既關係變差嗎?」
「的確唔想。」
「你唔需要太失落，我唔會叫你唔好再愛柔柔，如果可以話唔愛就唔愛，我會鄙視你，但我相信你唔係咁既人。我只係想講知你事情既另一面，選擇權仍然係你手，需要我地點唔會比柔柔拍拖，但你有權去呃我地。但最終呢個方係咪對大家都好，你要自己去諗。坦白講，如果呢件事係過多幾年之後先發生，我的確無任歡迎你隨時帶我個女走，可惜而家唔得。小狼我相信你真心愛我個女，雖然你好驚，但你眼神無改變過，我感受到你因愛而聽講咁多野，好似你呢個年紀既男仔好少會咁做。只要時間一到，你隨時可以帶柔柔走，如果到果陣你兩個仲愛對方既話。」
「Uncle，多謝你信我，我都明白你作為父母既難處，但你可唔可以比啲時間我同柔柔?」
「我似咁無情咩? 我會比時間你地處理。仲有! 我唔介意你番黎搵柔柔之前拍過幾多次拖，因為男人要有啲經歷先會學識點樣去愛一個女人，只要你果陣係真心愛柔柔就得。」
「明白!!」
我無諗過柔柔既爸爸係咁明白事理既人。
以為佢會鬧爆我。
我太自私，淨係諗住可以同柔柔一齊。
無考慮到柔柔既人生唔淨係得愛情，佢仲要承受其他野。
其實愛一個人係點?