《玻色子遊戲》: 10

「咩……咩事呀，佢……消失左？」小喬唔敢相信自己眼睛所見到嘅野。
「我地係唔係俾人落左降頭呀？」肥大叔亦同樣懷疑自己所睇到嘅野，呢啲事唔係只會係電影中出現架咩，點解，今次黎得咁真實，巫術真係存在？
「大家冷靜啲先，呢件事一定有古怪，我地要返出去睇黎唔係咁容易，仲之，而家大家唔好貿然咁爬出去，會唔會好似佢咁……」發叔指一指MK仔條「屍」，「我地都唔知，我覺得我地應該留係度，研究下究竟係咩一回事。」發叔又再扮出「大佬」款，嘗試係呢次危機中，帶領大家脫臉。
呢種人通常希望以救世主嘅姿態，係水深火熱中救大家出去，成為英雄；亦當然會有人唔受落，嫌佢煩，嫌佢膠，最後大打出手。
「冷靜？你叫我點冷靜呀，佢變左堆沙呀！」肥大叔捉住發叔衫領，大聲喝罵，「你個四眼佬咪再係度扮大佬呀。扮左咁多年，扮夠未呀！留係度？留係度點知會唔會好似佢咁架！」
「喂喂喂，你冷靜啲先……」呀泰嘗試分開肥大叔同發叔。
叮噹叮噹～～～叮噹叮噹～～～
「咩事呀？夜媽媽做咩事會響鐘架？」肥大叔非常驚慌。
夜晚，學校唔應該會響起鐘聲，但點解……
「不如咁，發叔都有佢道理，我地好似啱啱咁分開搜索一下學校，但安全起見，今次三個人一組，呀泰，你跟住發叔同小喬，而你……肥……肥叔叔，你唔介意我咁叫你嘛。你就跟我同允兒啦。你同發叔分開一下會比較好。」呢個時候，楊平見事情發展得越來越離奇，大家亦越來越不安，似乎，大家係學校出現可能存在住某啲「陰謀」，「與其係度吵吵鬧鬧，不如大家合再，搵出我地係度嘅原因，一齊出返去仲好啦。我諗冇人會反對吧。」楊平嘅說話明顯來得比發叔更有說服力，大家聽完雖然都默不作聲，但心裏面，還是默默認同。




「咁，如果冇人反對，允兒肥叔叔同我就由地下至三樓，睇下有咩發現。發叔你地就負責四至六樓。」
「嗯，就咁決定啦。但分開以前，我地應該去總務室，嗰度有對講機。大家手上都冇手機，有對講機，大家分開左都方便溝通。」呀泰提議。
「好，呢個主意唔錯。」楊平讚同。
「咪住先……」當大家正為準備向總務室進發嘅時候，小喬突然開口，「點解呀泰你會知邊度有對講機？仲有發叔你，之前想問但冇機會，點解你又會知邊度有電筒？而且，你同呢位肥叔叔好似一早識咁嘅。」
「你地……究竟……」 小喬講完後，連允兒都開始懷疑。