《玻色子遊戲》: 3

過左幾日，Ivan依然未出院。呢個時候Ivan媽媽收到病房護士打黎嘅電話
「你好，我係屯門醫院病房護士，我姓陳。請問係咪黃子軒（Ivan) 嘅屋企人？」
「係係，我係佢媽媽。」
「黃子軒嘅主診醫生想約見屋企人，講講黃子軒嘅情況，唔知你地今日下晝四點半得唔得閑呢？」
「得，得，準時到。」
「好，一陣見。」
收左線之後，Ivan媽媽即刻通知何允兒，叫佢四點半去醫院。 

「你地好，我係黃子軒主診醫生，我地同黃子軒做過一啲檢查，包括抽血同抽骨髓去化驗。發現黃子軒嘅白血球有唔正常嘅增新，簡單啲黎講呢，姐係白血病⋯⋯」
聽到醫生咁講，何允兒同Ivan媽媽差啲受唔住打擊而暈低。




「我地先幫黃子軒做化療，如果唔得，就要考慮骨髓移植。」 

化療左一個星期，醫生同佢地講白血球數目冇受到控制，似乎要進行骨髓移植，但就要等待合適嘅骨髓。
何允兒同Ivan媽媽叫晒所有親戚朋友驗血，希望可以搵到合適嘅骨髓。係等待嘅期間何允兒每日都悉心咁照顧Ivan。

「小姐，探病時間過左啦，請你盡快離開，我地要做野架啦。」病房護士示意何允兒離開。
「我想陪多一陣，姑娘，通融一下啦。」
「呃⋯⋯好啦，十分鐘好啦。」
原本何允兒諗住十分鐘之後走，但佢見姑娘開始忙起上黎，忙到連叫佢走嘅時間都冇，所何允兒就繼續偷雞留係床邊。
呢幾日，佢每日放工都趕返去煮晚餐，然後帶去醫院俾Ivan。就算Ivan媽媽想幫手，佢都唔俾，事事都要親力親為。呢一刻，佢真係好攰，佢扒左係Ivan床邊，陪住Ivan一齊瞓。