《玻色子遊戲》: 2

「允兒允兒，Ivan佢咩事呀？嚇死我啦，你無啦啦打俾我話佢入左院。究竟佢咩事呀？」Ivan媽媽收到何允兒電話，知到Ivan入左院就馬上趕過黎。
「伯母，我⋯⋯我都唔知咩事，Ivan佢行行下街突然暈左，跟住我就送左佢黎醫院，我⋯⋯我都唔知咩事呀，嗚⋯⋯嗚⋯⋯對唔住⋯⋯對唔住⋯⋯」何允兒攬住Ivan媽媽道歉。或許道歉可以減低佢嘅不安。
「唔關你事，唔關你事。Ivan佢會無事，吉人自有天相，無事嘅⋯⋯無事嘅⋯⋯」Ivan媽媽係呢一刻亦只能夠咁樣安慰自己同何允兒，除左聽天由命之外，佢似乎諗唔到有咩可以幫到自己個仔。 
十分鐘後，醫生係急救房走出黎。
「醫生醫生，我個仔點呀。」Ivan媽媽未等醫生開口就搶住問。
「佢暫時恢復意識，我地而家會送佢上病房繼續觀察。」醫生答。
「咁佢係咩事呀究竟？」何允兒好擔心。
「暫時未知，要等上左病房做進一步檢查先可以確定。」

「媽，允兒⋯⋯」Ivan終於醒返，佢呼喚媽媽同女朋友。




「你冇事嘛，擔心死我同允兒啦。」Ivan媽媽見到自己個仔瞓係病床上，就算佢已經醒返，都忍唔住眼紅起來。
「冇咩事嘅，可能最近日日做足十幾個鐘，有啲操勞過度姐，聽日就出院啦。」Ivan雖然唔知自己發生咩事，但為左唔想令自己媽媽同女朋友擔心，佢亦只能夠咁講去安慰佢地。 

「探病時間到，可以入黎啦。」護士打開病房大門，示意探病家屬可以入去探病。
「Ivan，今日醫生講咩呀？」何允兒拿出飯盒，準備Ivan嘅晚餐同時，亦不忙要了解Ivan嘅病情。
「冇，冇咩特別。」Ivan其實講緊大話。醫生今日話佢抽血報告顯示佢嘅白血球指數唔正常，仲抽左佢嘅骨髓去做化驗。
「咁幾時出院？」Ivan媽媽問。
「唔知呀，可能聽日掛。」
「冇事就好，聽日買定碌柚葉等你返黎沖乾淨。」