《玻色子遊戲》: 1

 「今晚食咩好呀？」何允兒問佢男朋友Ivan。
「食老麥囉，你最中意。」Ivan答。
「?～～中意都唔係日日食啦，今日一周年呀，一周年都食老麥⋯⋯」何允兒聽到Ivan話要食老麥似乎唔係太高興。
「講下笑姐，不如去鋸扒咯，上次食嗰間《安娜》唔錯喎。」Ivan提議。
「好哇！」
一對普通情侶係元朗街頭一路行，一路討論今晚拍拖一周年究竟食咩好。你一言，我一語，打打鬧鬧，簡直羨煞旁人。所謂只羨鴛鴦不羨仙，或許做神仙都不及佢倆個快樂。咁如果連神仙都妒忌佢地，呢個神仙仲會唔會祝福佢地呢？ 

啪－－－
「Ivan，不如去睇下啲褸先啦，最近天氣開始轉⋯⋯Ivan⋯⋯Ivan，做咩呀？」何允兒擰轉身發現Ivan暈左係地下。
「Ivan⋯⋯Ivan⋯⋯」何允兒不斷叫Ivan，但始終得唔到回應。




旁觀嘅人開始多起來，何允兒好驚，好緊張，唔知點做好。
「小姐，唔好緊張住，叫左白車先啦⋯⋯喂，係咪999，呢度有個人暈低左，呢度係元朗⋯⋯」終於有個熱心男子向何允兒伸出援手。
但何允兒只係攬住無反應嘅Ivan，自己完全唔知應該做咩好。
救護員好快到左。
「小姐，你放開佢先，等我地黎處理。」救護員指示何允兒，並將Ivan抬上救護車，駁上儀器，觀察Ivan嘅維生指數。
「小姐，你係佢⋯⋯」救護員問何允兒。
「我係佢女朋友⋯⋯你地一定要救下佢呀⋯⋯嗚⋯⋯」話都未講完，何允兒已經驚到喊起上來。
「唔好擔心住⋯⋯」救護員嘗試安慰何允兒，「呢位先生平時有冇咩病？糖尿病，低血壓之類？」
「嗚⋯⋯冇⋯⋯冇⋯⋯佢平時好健康，但啱啱唔知點解就突然間暈左，我都唔知點算好，嗚⋯⋯」何允兒一邊講一邊喊。
「好，我地送佢去醫院先，等醫生做進一步檢查。」




「唔該晒，唔該晒。」何允兒已經亂淨係識講唔該，佢心入面好怕無左Ivan，好怕失去一個佢視為付託終生嘅男人。