【好想同你講下野】一隻厹的日記: 31

屋企無啦啦多咗個百厭星。 


聽聞佢係阿澄個表姨嘅舅父個四嫂個仔嘅媽媽嘅外甥嘅仔黎。 


大概一歲半左右，唔係好識講野，但破壞力十足。 


一黎到屋企，就將屋企三隻杯兩隻碟打爛野，外加扯人頭髮，拔我啲狗毛！ 






然後，佢笑得好開心。 



我決定咗，我要同哩句人勢不兩立！ 


唔知邊個人類嘅祖先話，人性本善。 






邊個會信哩句，你睇個BB就知。 


「嘩，好得意呀你哈哈哈。」 


阿澄對住個BB好開心咁笑，仲係度讚佢？ 






阿澄，你無事嘛？ 


佢係惡魔呀！


我話都未講完，個惡魔已經吐咗口水落阿澄塊臉度。 


豈有此理，毀我女神清麗嘅臉容！？ 


你死梗啦！ 






但阿澄無嬲不得止，仲幫佢抹返啲口水。 


咩事呀？ 


阿澄，你唔敢郁手，唔緊要，等我黎！ 


等我去咬死佢！ 


阿澄見我咁激動，就對我講：「阿波，你咁會嚇親BB架。」 






「但佢......」 


「BB仲細，乜都唔識，好細膽，所以唔可以咁。」 


我覺得一肚怨氣。 



我想幫你咋。







然後個小惡魔繼續周圍破壞，搖控呀，公仔呀，電話呀，見乜都甩乜，勁順手。 


啲大人笑得好開心。 


我都唔明點解。 


我好無癮咁返返去自己個竇度。 


憑乜細個就可以任性呢，可以橫行霸道。 






唔識野唔係理由呀，我好細個，已經係舊屋，被人類訓練要識行識禮貌規矩要識去廁所。 


根本就無咩爸爸媽媽可以畀我任性。 


阿澄好衰。 


唔知做咩，我怨下怨下就訓著咗。 


訓咗一陣，忽然有人拍一拍我，我一張眼，就見到好大隻眼睛望住我。 


又係你隻小惡魔？ 


「有人唔開心呀，BB我地哄下佢好無呀？」阿澄係後面抱住BB條腰。 


我無唔開心呀。 


然後個小惡魔就摸下我個頭，一下一下咁。 


佢隻手仔好細，好柔軟，有啲似阿澄，不過係另一種感覺。 


然後佢就格格咁笑。 


呃..... 


我承認佢係.....幾得意嘅。 


佢用好好奇嘅眼光望住我。 


我被佢嘅眼神征服咗。 


跟住佢就勁唔客氣咁騎咗上我背脊，係咁周圍跑，周圍玩，好似坐車咁。 


我地玩咗成日，玩到佢係挨住咗我訓。 


「哈哈，阿波，你一定會係一個好爸爸。」阿澄講。 











爸爸......