【好想同你講下野】一隻厹的日記: 30

唔知一隻狗可以陪個主人去到幾耐呢？ 


其實如果可以陪到十年，已經好長好長。 


畢竟人同狗個壽命，差太遠。 


聽聞，傳說本身人類嘅壽命都係唔長，牛、狗同豬都係50年命，人類得20年命。但人想長命啲，所以牛、狗、豬將自己條命畀咗20年人，先令人類咁長命。 






豈有此理，我個先祖究竟係邊個？同我出黎！ 


自把自為將我20命畀咗人，我無咁同意過啵！ 


我好羨慕嗰啲陪咗主人十幾年嘅狗，可以陪主人咁耐。 






如果畀我可以陪阿澄咁耐，我都想。 


可唔可以畀多20年我呢？ 


雖然而家有兩年，但我都好心足。

「阿波，好熱呀。」 





炎炎嘅夏日黎到，阿澄倒咗好多冰出黎，一啲用黎作冰水，一啲就咁食。 


我都好少見阿澄著背心，睇黎真係太熱。 


其實講熱，我地哩啲狗先熱，你人類都唔多毛，但我地狗周身都係。 


夏天，係狗嘅大敵，熱到啲狗飛起，熱到就係有種食物叫熱狗。 


我熱到條舌唔願入返個口，然後阿澄扔咗一個石頭過黎。 






「畀你架阿波。」 


咦，原來唔係石頭，係一枝結咗冰嘅礦泉水。 


佢笑住咁話：「咁樣你咪無咁熱囉。」 


我即刻衝去佢腳邊抱住佢。 


「你好體貼呀阿澄。」






「哈哈哈，唔好再舐我啦好痕。」佢笑到走黎走去。 


自從媽媽返咗黎之後，阿澄就開心返。 


媽媽返咗黎，唔係乜野都一野解決，雖然而家仲同爸爸冷戰緊，但情況已經有好轉，起碼佢都肯返黎先，而且有社工跟進，佢地搵咗社工傾好耐，喊好耐，心結算係少咗啲。 


爸爸都認咗錯。 


至於媽媽點解返黎..... 






當然無人知，因為得我知。 


爸爸亦都無發覺，佢枱面少咗張紙。 


雖然係咁，但媽媽返黎之後，阿澄用好疑惑嘅眼光望住我。 


「係咪你做架阿波？琴日唔見咗你幾粒鐘。」 


係又點唔係又點。
重要係媽媽返黎啫，都要佢自己肯畀機會爸爸先。 






最緊要，係你開心返。 


「阿波。」我一轉身，就成兜水淋咗我度。 


「哈哈，落水狗呀！」阿澄指住我黎笑，我係咁追住佢黎吠，整濕返佢。 


佢就笑到傻咗咁，我地係咁通屋走，走到媽媽要鬧我地整濕哂間屋，罰阿澄抹返乾淨。 


「最衰都係你啦阿波。」佢一邊抹一邊講。 


「係你衰先。」我舒舒服服咁攬住阿澄畀我枝水訓。 











夏天，好熱好熱，但我有啲鍾意咗你哩個敵人。