【好想同你講下野】一隻厹的日記: 26

我唔知阿澄喊咗幾耐。 


正常嘅，一個女仔遇到啲咁嘅事都應該會驚到喊。 


最後，係隔離屋陳生聽到有爭吵聲，然後報警先無事。 


阿澄一直喊。 






喊到隻眼紅哂。 


「阿澄，不如你畀隻眼抖下啦。」 


「阿波你痛唔痛呀？」點知佢一開口嘅第一句就係咁。 






「你頭先同佢打，真係嚇死我......下次唔洗咁架.....」 


佢嘅意思係我可以走先？ 


真係令我狗狗不能釋懷。
我從來都無諗過，阿澄會咁擔心我。 






阿澄堅持帶咗我去睇醫生先，包紮係最首要，一定要檢查到我係無事。 


其實我真係無乜大礙，只係傷咗咁啫。 


之後，阿澄佢地去咗警局未返黎嗰時，我暫留咗係陳生屋企。 



暫留咗係陳生屋企意味住...... 







「點解你又過黎嘅？」熟悉嘅女聲又出現。 


係Diana. 


「我地屋企被人打劫，過黎避一避。唔通為咗見你咩。」 


「你仲咁串，好黑人憎。」佢又講：「不過我鍾意。」 



其實上次我都已經講到明唔鍾意佢架啦，都唔知佢做乜野。 






嗰時我好攰，訓咗係門口附近，無力氣再理佢，點知佢又走埋黎我身後撩我講野。


「阿波。」 


「做咩呀？」 


「你好擔心你主人呀？」 


「當然啦，佢係我主人。」 





佢用好疑惑嘅眼光望住我。 


「我總係覺得，你係唔止咁多。」 


「點解咁講？」我唔覺得有咩問題。 


「因為我對我主人唔會咁囉，好分得清。」 


我對Diana嘅說話好不以為意。






「係你唔盡忠啫，失禮咗狗。」 


「你......洗唔洗咁話我呀！」佢眼濕濕，好似想喊咁。 


「我講笑啫。」 



佢好快就平復返，然後話：「咁.....我地繼續上次嘅事。」 


「其實你有無聽過做女仔要矜持啲？」 


「我.....淨係聽過女追男隔層紗。」佢好認真咁答。 


我都唔明點解佢可以咁死唔斷氣。 


「我唔會鍾意你架，你死心啦。」 


「點解呀？」佢追問落去：「無理由，我出街明明好多狗公都會撩我，不知幾多狗追我，例如隔離樓個隻八哥、街口隻蠟腸狗、公園個......」 


「關我咩事啫？」 


「即係我好多狗追囉。」 


「所以？」 


「所以你鍾意我都係天經地義。」 


「痴線，多狗鍾意你關我要鍾意你咩事？」 


「我唔理，除非你講到理由。」
理由？乜鬼野理由？ 


唔鍾意一個人都要理由架咩？ 


「無點解啵，唔鍾意就係唔鍾意架啦。」 


佢死唔斷氣咁追問我，我停唔順：「我好攰，畀我抖下啦。」 


佢先肯停低走開。 


我終於可以休息下。 


「愛是痕狗忍耐。你睇住黎，我一定會令你鍾意我！」佢最後拋低哩句。 


痴線，佢亂改人類嘅聖經，小心畀雷劈。 


江湖從此多事。 











我開始發現原來唔愛一隻狗／一個人，就真係可以無理由，簡單，殘酷。