【好想同你講下野】一隻厹的日記: 27

無人同我講過，原來離婚都係咁煩。 


首先要大家都分開過一段好長好長嘅時間，再簽紙，然後再簽紙。 


人類嘅手續點解咁煩嘅？ 


哩段時間，媽媽成日返屋企，都係會不停嗌交。 






最難受嘅，當然係哩段時間嘅阿澄。 



哩段時間係阿澄問得最多問題嘅時間。 


「阿波，點解會搞成咁.......」 






「阿波，點解爸爸媽媽唔原諒對方？」 


「阿波，佢地會唔會再係一齊架？」 


「爸爸，點解你唔挽留媽媽？」 






爸爸無答過阿澄。


大概佢心裡面都唔知道。 


不過最煩惱嘅，都係要選擇跟邊個。 


跟爸爸？跟媽媽？ 


阿澄絕對唔想揀，因為佢根本唔想佢地分開。 






佢唔想淨係得返一個爸爸同媽媽。 


「如果屋企得返一個爸爸或者媽媽......就好似已經唔再係『爸爸』同『媽媽』咁。」佢抱住我講。 


我地狗狗好清楚哩樣野，所以以前啲狗前輩都會同我地講，結婚前一定要諗清楚，如果唔係會影響啲狗仔狗女一世。 


阿澄最動人嘅笑容已經無出現好耐。 


然後，佢變得多咗傾電話。 






但可惜，係電話裡面，佢都會成日喊，表達佢嘅唔開心。 


好希望對面個男仔會安慰到佢，個男仔好似成日都可以哄到佢笑咁，做到我做唔到嘅野。


求你可以幫下阿澄。 


「阿波......」阿澄對住播緊多啦A夢嘅電視，眼濕濕咁對住我講：「如果我有個多啦A夢就好啦......我想問佢要件法寶，可以將爸爸媽媽變返和好。」 


多啦A夢...... 






雖然阿澄傾電話多咗，但好似傾嘅時間越黎越短。 


而個男仔都越黎越忙。 


我係度諗，你咁短時間，點安慰到阿澄。 


原來，人嘅愛真係好膚淺。 


某一日，阿澄拎住電話，拎咗好耐好耐。 






而再無個男仔嘅電話打黎。 


「阿澄......我會陪係你身邊架.....」 
















「如果我有個多啦A夢就好啦......我會問佢拎翻譯蒟蒻，然後親口安慰你。」