【好想同你講下野】一隻厹的日記: 19

「波，想唔想去沙灘？」 


星期唔知幾，阿澄帶咗我去沙灘玩。 


因為有啲沙灘，其實都唔係有啲嘅，係好多沙灘都唔畀狗入去。（做咩啫？歧視？） 


阿澄搵咗一輪，先搵到啲沙灘帶我入去。 






不過今次我地唔係兩個人，而係一班人。 



一班人嘅意思就係，一班人囉，我都唔識講，想點啫。 


有好多佢嘅同學，男男女女形形色色。 






唉，每當有佢班同學出現嘅時候，我就少不免會被人強姦。


「嘩，好得意呀。」 


「啲皮好滑呀～～」 






勁多手伸埋黎摸摸摸，勁癢呀！ 


「HANDHAND，HAND HAND。」 


你邊位呀HANDHAND。 


其實做狗真係好慘。 



仲有一個，佢好熟口面......高高瘦瘦，戴黑框眼鏡。 






咦，呢條友咪上次嗰個，樓下怕怕醜醜，返去搵阿澄嗰個人？ 


今日先發現，原來佢都幾高，仲高過阿澄添。 


不過唔知佢地係咪嗌交，成程都無傾過計，好似好有默契唔搵大家玩咁。 


「你地係咪嗌交呀？」我問阿澄，不過佢無答我。 


好奇怪，阿澄其實都算好脾氣，未見過佢嬲人咁濟。





我地係沙灘度玩下沙灘波咁，簡單啦，追波係我嘅強項，佢地好鬼鍾意拋波叫我去追，似玩我多啲，不過無所謂啦，我又鍾意。 


我好似天生就鍾意追野咁。 


就咁樣玩下波，玩下捉姨因咁，就可以快樂咁樣過咗成日。 


其實我覺得係個男仔嬲咗阿澄，因為其實阿澄周不時都會望向佢。 


真係不識抬舉，阿澄咁得意嘅女仔邊有人嬲得落架。 






豈有此理，等我鬧下佢先。 


我衝埋去佢腳邊，係咁鬧：「你係咪男人黎架？有種就道歉先，邊有人做男人做到你咁小氣？」 


佢好似有啲驚訝，無幾耐阿澄都過咗黎。 


「睇黎阿波幾鍾意你。」阿澄笑住咁同個男仔講。 


下？鍾意？阿澄你清醒啲先啦，我係幫你鬧緊佢呀！






「唔知呢，可能我天生吸引狗掛。」個男仔仲要唔知醜咁應佢。 


痴線，冤枉呀，乜水會被你吸引。 


「個袋......你岩唔岩用？」 


「好岩呀......多謝你日本嘅手信。」 


「我順便啫。」 


「咁我今晚可唔可以再打畀你？」 


喔？ 


我好似開始明白一啲野。 


原來一直同阿澄傾電話個男仔就係佢？ 


咁佢地即係唔係嗌交啦，仲要送哂禮物咁。 


咁點解要扮哂唔識唔熟咁？人真係奇奇怪怪。 













唔知點解，我由心底裡唔鍾意呢個男仔。