【好想同你講下野】一隻厹的日記: 20

「我係咪應該幫你搵返個女朋友呢？」 


阿澄好認真咁望住我咁講。 


我諗返起上次Diana嘅事，即刻打咗個冷震。 


唔.....唔洗啦。 






上次仲驚唔夠咩痴線。 


「你會唔會好悶架？」阿澄搣住我塊臉講。 


「唔會呀。」 






「好啦，幫你搵下女朋友啦。」佢繼續係咁搓我塊臉講：「我地可以先斬後奏。揀定先！」 


阿澄一起勁，就帶咗我去買狗嘅地方。 



奇怪嘅係，今次佢無再帶我返去舊屋，反而去咗另一個地方，嗰度就大啲，靚啲同多狗啲。 






去到，佢同個職員講話要指明要女仔。 


其實我真係唔需要女朋友...... 


不過佢都聽唔到架啦。


「你有無邊隻鍾意架？同我講呀。」她好似好興奮咁，但我一啲都唔興奮。 


為咗應酬下佢，唯有係咁意扮下野，求其認真咁望下。 






話說呢度真係好國際化，咩野狗都有。 


我四圍行下，耐唔耐就聽到啲狗係度偷偷地，細細聲咁講：「呢隻狗都好似唔錯。」 


「都幾型呀。」 


「可以考慮一下。」 


行過一隻芝娃娃面前時，佢突然間撩我講野：「你係黎揀老婆？」 






「係呀，有問題？」 


「其實你都幾好樣，不如......你揀我啦。」 


「其實我做下樣架咋，我唔係好想屋企多隻狗。」 


「做下樣唔爭在做多啲，黎啦。」佢忽然撲埋黎，嘩！嚇到我360度施丹轉身，點知佢咬住我條尾唔放，繼續係度撲我，撲到我訓低咗。 


佢係咁搔我肚皮，又黎非禮！不過肚皮太敏感，搞到我係咁笑，好似好開心咁，死梗！ 






「拿，你乖乖地做好啲場戲，咁你主人買咗我，你就有好日子過。」 


「嘩，咁攻心計嘅？我最怕有機心嘅女狗。」


「無得你唔鍾意。」 


死，今次死梗！被阿澄見到哂。 


阿澄走埋黎，然後講「你地好似玩得好開心咁啵。咁......」 






唔係咁架阿澄，唔係咁架...... 


唔好買佢呀！我唔鍾意佢！ 


我見佢嘴角向上，好奸咁笑！ 


「咁...... 不如下次再玩啦。」 



然後佢就抱我走咗。 


剩返芝娃娃呆咗係度。 


「衰波，一見到靚狗就著哂迷，你都係有我就算啦。」 


阿澄好似有啲黑臉，但...... 




我幾鍾意。