【好想同你講下野】一隻厹的日記: 18

我唔明白鬼係乜東東。 


當阿澄第一次同我睇鬼片，我先開始接觸呢樣野。 


阿澄每次沖完涼，總係有好香嘅茉莉花味，我好鍾意行近佢身邊係咁聞。（唔係變態，不過狗係咁。） 


當佢披住浴巾出黎時，佢笑住咁問我：「今晚睇戲好唔好呀？」 






我當然死狗都話好。 


我第一次同阿澄睇戲嗰時，我完全唔明白咩叫電影，我以後係個箱入面嘅人同事，都係真，只係由個箱即時轉播。 


我記得第一套戲係睇明日之後，嚇到我飛起。






直到導盲犬小Q嘅出現，阿澄見到我呆哂個樣，先同我解釋咩叫電影。 


「拿，電影即係由一班人創作一個故事，再用攝影機拍返出黎。」佢好耐心咁同我講。 


佢成日都係咁，同我解釋好多野，或者佢好鍾意同我講野，或者佢真係相信我會聽得明。 






我終於明白咩係電影。 


但我從來都未睇過鬼片，所以阿澄第一次話：「我地今晚就睇鬼片好無？你要陪我呀。」 


鬼？ 


乜鬼野黎？ 


後來，我先知原來鬼係指人死咗之後，無咗肉身得返一團氣係度。 






咁我就唔明，咁到底人係死咗定未死咗？點解死咗仲有野係度？咁死黎做咩？即係死其實只係變一團氣？咁係咪應該叫變態唔叫死？ 


另一個疑問係，點解死咗嘅鬼要害人，佢都曾經係人呀，大家同一種類。 


仲有仲有，點解鬼會勁過人咁多，咁係咪其實人變鬼係進化咗？ 


我好多好多疑問，但無人解答我。 


我真係一隻好煩嘅狗。 






「開始啦開始啦。」阿澄好緊張咁講，然後將我抱起，擺係佢大脾上面，攬住我，然後係咁搓我肚皮，真係好鬼舒服。


鬼片唔同其他戲，佢成個畫面都好鬼暗，然後有人被殺，跟住有啲唔記得落妝嘅女人追黎追去，有咩好睇呀？ 


但阿澄就睇得好緊張，一路攬得我越黎越實，特別係見到嗰個無落妝女人。 


「啊！！！」又要驚又要睇，人類真係奇怪。 



「波波，你驚唔驚呀？」阿澄忽然問我。 






「唔驚呀。」我答佢。 


「我估你都好驚，我地一齊遮住隻眼！」 

結果一到落妝女啲畫面，我就被阿澄遮埋我隻眼。 


...... 


其實我想睇........ 







「阿波，你會唔會驚死？」阿澄問我。 


死？狗死咗會唔會變鬼呢？又好似無狗講過呢樣野，最起碼狗唔會拍電影講返出黎，所以我真係唔知。 


狗死咗係點架呢？ 











其實我唔驚死，我最驚係無得繼續陪你。