【好想同你講下野】一隻厹的日記: 11

「唔得，你一定要去！」 


「唔得，我唔去呀！」 


阿澄同媽咪鬧交鬧得好勁，原因係爸爸媽媽買咗機票，諗住全家去日本旅行，但佢一口拒絕。 


「我地走哂，邊個睇住阿波呀？」 






「擺佢係人地屋企咪得囉。」 


「唔得，佢一定唔慣！佢會好驚架！」 


「痴線，我地去一個星期之嘛。」 






「一個星期見唔到阿波已經好長架啦！」 


「咁你去唔去呀？」 


「唔去！」 






「我地買哂機票，邊有得你而家話唔去就唔去！」 


「係你地自把自為之嘛，一係帶埋阿波，我就去！」 


「痴線，帶埋佢去幾唔方便，而且又貴！」 


「總之阿波唔去我就唔去，我唔會留佢自己一個人係屋企架！」 


阿澄抱住我返入房。 






佢喊咗好耐，我好想安慰佢，但唔知點安慰佢，唯有用個頭摸下佢。 


佢忽然攬住我，然後好深情，又用佢好可愛嘅眼睛望住我話：「阿波，我唔想畀你一個人呀....」 


我唔太明白阿澄喊咩，但我好內疚佢為咗我同媽咪鬧交。 


「其實我都唔可以無咗你架，阿澄。」我講。 


不過，唔知佢聽唔聽到呢.......

阿澄最終都被屋企人逼咗去日本。 






佢臨走之前，吩咐咗我好多野。 


「拿，我走咗之後，唔準唔食野，唔準夜訓，唔準自己一個四圍走，唔準又食地下啲污穢野，唔準對住空氣吠，唔準又嚇人，唔準唔做運動，唔準自閉一個人，唔準撩其他狗女。」 


到最後，佢扁扁嘴咁話：「唔準唔掛住我。」 


我就咁寄居咗係隔離屋嗰度。 


話說隔離屋嗰家人姓陳，成家都好熱情，對我都算係幾好，佢地屋企仲有一隻狗女，金毛尋回犬。 






「你叫咩名？」佢問我。 


「阿波。」 


「你係新入黎住？」

「唔係，我係黎寄居一排。」 


「點解？」 






「因為我主人去咗旅行。」 


「我係問點解你唔問返我叫咩名。」 


而家啲狗咁怪嘅。 


「咁你叫咩名？」 


「Diana。」 


我最憎英文，仲要係咁做作嘅英文名。 


「你唔讚我嘅？」 


「讚你咩？」 


「讚我個名好聽，讚我靚。」 


呢隻狗真係short short地。


「點解你唔肯讚我？」 


「因為我主人靚過你，我講唔出口。」 


「你主人唔係人黎架咩？」 


「係呀。」 


「你覺得人好靚？」佢好疑惑咁同我講。 


「有咩問題。」 


到咗食飯嗰時，佢地家人擺咗兩罐嗰啲咩西施罐頭畀我地。 


「你平時就係食呢啲？」


「係呀，」佢好自豪咁講：「高級野黎，好好食架，你試下，包你鍾意。」 


「我唔食肉架，有無其他野食。」 


「你唔食肉？」佢聽到之後大笑咗好耐，笑到眼淚水都出哂黎。 


「有咩問題？」 


「邊有狗唔食肉架？」 


「我囉。唔得架咩？」 


「你係狗，天生注定就係食肉架啦。」 


「有咩問題啫，我主人都跟我一齊唔食肉啦。」 


「你好鍾意你主人？」　 


「當然。」 


「咁我唔鍾意佢。」 








真係一隻奇怪嘅狗。