【好想同你講下野】一隻厹的日記: 10

阿澄係一個好外冷內熱嘅人，對住人亦都好慢熱，除非真係好熟嘅人，如果唔係佢對人其實好冷淡。 


有一日，佢帶咗一班同學上咗佢屋企。 


「嘩，原來阿澄你屋企養咗狗架？好得意呀。」 


佢班同學一見到我就係咁非禮我，上下其手咁樣，喂！等等，你連耳窿都摸埋，有無搞錯呀？真係豈有此理！到底幾時先有狗權立法？ 






即係我唔係話歧視你地，但你地可唔可以洗咗你隻油到死嘅手先摸我呢？ 


我被人蹂躪一輪，佢地終於肯放過我。 


我即刻九秒九走返黎阿澄身邊。 






「佢叫阿波。」 


「佢又真係幾似個波啵。」 


原來佢地係考完試，上黎阿澄屋企玩下，隨便一齊溫第二日嘅書，又係為咗嗰個考試。 






我都係到嗰時先知，阿澄對其他人嘅態度同屋企人係好唔同。 


佢同屋企人會好多野講，對住我會成日講心事，但對住外人，佢多數都淨係應：「好呀。」 

「嗯。」 


好冷淡嘅態度。 


原來呢種叫慢熱，要一段好長嘅時間先至適應，同嗰個人慢慢熟。

我有啲慶幸我唔係人，係一隻狗，咁阿澄先至可以坦然無懼咁同我講野。 






雖然阿澄好冷淡，但佢地班同學好似好鍾意阿澄咁。 


不過老老實實，佢地都唔係溫書嘅，係咁係度玩，結果玩到六點幾先肯走。 


送走咗佢地之後，阿澄同我講：「Sorry呀，阿波，有無嚇親你呀？」 


我當然搖頭啦。 


忽然門鐘又響。 






阿澄出咗去開門，我好奇，跟住佢一齊，原來有一個頭先嘅同學返轉頭。 


嗰個人高高瘦瘦，戴黑框眼鏡，怕怕醜醜咁講：「呃......多謝你今日嘅款待呀。」 


一個男扭拎到咁，算點啫。 


「你專頭返黎就係為咗講呢句？」 


「係呀......我覺得，唔講好似好無禮貌嘛。」 






「白痴，不過多謝你。」 


「其實......我又唔止為咗呢樣野返黎嘅。」 


「仲有咩事？你漏咗野？」 


「係呀......我漏咗問你拎電話號碼......」 





















我有啲慶幸我唔係人，係一隻狗，咁阿澄先至可以坦然無懼咁同我講野。 


然後，我又開始無呢種感覺。