[新手][校園] 當你中六果年先遇到教畜，最好嘅解決辦法就係‧‧‧‧‧‧: 32. 你又嚟搞我？ (五)
一路食lunch大口仔就一路同我哋講返佢聽到啲咩返嚟。原來成件事就係三條女搞出嚟，係校長身上果啲所謂證據就應該係佢三個啲篇面之詞，再加埋教畜係背面撐腰，所以盧毛就完全信晒佢哋口供。同埋教畜係盧毛面前加鹽加醋，令到成件事更加被誇大。不過，有大口仔喱個無間道，起碼我哋都多一樣揸拿。
食完飯之後，由於我哋要企到四點，所以同大口仔分頭走。我哋一返到去，就見到盧毛、龜sir同教畜成個看更咁企響度。
教畜︰「邊個叫你哋去食飯咖！」估唔到係教畜係度扮大佬。
力仔︰「夠鐘咪去食飯囉12點！校規有寫！」對於教畜，我哋個態度亦唔需要好好。
教畜︰「依家罰你果個都未放你，你做咩自把自為呀！」
威廉︰「咁你又係邊個呀，喱度你最細喎，你收Stop la喇！」威廉手指指咁對住佢講數，真係有幾分似大佬講數。
盧毛︰「Shut up！I haven’t ask you to leave！」見條o靚比人大返轉頭，盧毛都要親自出馬。
威廉︰「跌時賣威！熱時喼分敗史菇畫嬌喱唇！」
盧毛︰「You don’t have any right at this moment since you are under punishment！」
盧毛講完之後，我哋都預期威廉會繼續駁落去，但係佢竟然收咗聲。
其實企係禮堂門口都幾係嘢，天寒地凍企係度基本上係食風咁濟。話就話咁係好提神，但係我哋已經凍到腦都僵埋。
「佢哋就係罰你哋企係喱度呀？」「你哋坐低休息下先！」企到三點幾果陣，有個男人衝咗上嚟一樓。佢同我哋講完嘢之後，就走咗去校務處叮鐘話要搵校長。佢個樣勁有殺氣，問我哋嘢果陣都比佢嚇一嚇親。
阿風︰「喂，威廉喱個就係你個秘密武器喇？」我哋九個人同時望住威廉，等佢嘅回覆。
威廉︰「今次我都唔知咩事，我唔識喱條友咖！」威廉擺起個咩都唔關佢事嘅樣出嚟。
小夫︰「哈哈sor，果個係我老豆嚟，我lunch果陣打咗個電話叫佢嚟幫手。放心！絕對冇問題。」
夫爸︰「你憑咩罰佢哋十個咁樣係度吹風？你依家咁樣係體罰！」係我哋密密斟果陣，盧毛同龜sir已經行咗出嚟。
龜sir︰「先生，佢哋犯咗校規，所以要受懲處！」龜sir啲官腔十年都唔會變一變。
夫爸︰「你同我講得清清楚楚，校規邊個chapter邊個subsection，佢哋又做咗啲咩？」
小夫︰「我老豆係公務員，講條例嘢好叻！」小夫陰陰咀笑咁同我哋講。
龜sir︰「佢哋欺凌同學、侮辱老師同學校。」
夫爸︰「你哋有冇做過？」夫爸拎咗轉面問我哋，眼神依然都係好兇。
夫爸︰「等等先！就算佢哋做咩都好，企成六七個鐘就係體罰，你係咪想聽日生果頭條見呀？依家有晒所有evidence你體罰學生！」夫爸未等我哋答佢就拎返過去同龜sir理論。
龜sir︰「OK，等等先，唔好咁激動住先，本身我哋都想約你同江少夫同學一齊做個面談。不如咁喇，依家比佢哋坐低先，我哋幾個再慢慢係會議室傾喇！」 龜sir一對住家長，就好似酒樓經理對住啲客咁，恭恭敬敬驚死得罪咁。