[新手][校園] 當你中六果年先遇到教畜，最好嘅解決辦法就係‧‧‧‧‧‧: 33. 你又嚟搞我？ (六)
全靠夫爸，我哋先可以入返去停課室坐，唔洗係禮堂門口吹風。不過我哋最期待嘅係夫爸幫我哋幾個落一落盧毛面。佢哋傾咗差唔多都有成半個鐘，等到我哋頸都長埋。
比利︰「夫爸搞唔搞得掂盧毛咖！」
阿毛︰「夫爸發起火上嚟唔係小嘢咖，小夫同我講。」
阿風︰「今次就好睇過戲喇。」
大概九點字左右，小夫行返入嚟停課室。我哋八對眼一齊望住佢，期待緊佢將個好消息帶比我哋。我哋對視咗幾秒，佢最後同我哋拎一拎頭，姐係代表佢老豆都拆唔掂。
阿風︰「家長佢都搞得掂，係咪路呀？」
小夫︰「坐就有得坐嘅，課就要繼續停，因為有條罪佢拗唔甩，which is 最大果條。」
我︰「我屌，連老豆出埋馬都唔得。」
威廉︰「話咗咖喇，喱啲係我哋同學校之間嘅爭拗，叫其他人第三方嚟根本幫極有限，始於佢哋係局外人，唔知實際件事，任學校嗡都得。要拆得掂喱場仗，第一樣係最緊要……就係要我哋做嘅嘢要團結一致，第二……唔好再有人自把自為！總之要贏就係要靠自己，係最適合嘅時機先好搵人幫手一鑊翹起佢。」
其實一直以來，威廉個樣都係成竹在胸咁，但係我哋根本唔知佢到底打算做啲乜，之前駁咀又駁駁下停咗，依家又唔見進一步行動。
係同一時候，教畜同盧毛行咗入嚟，對住我哋又奸笑又拎頭。
盧毛︰「唔好以為搵個家長嚟就搞得掂喇，要玩手段我唔差得過你。你哋成日講果句咩球證旁證都係我嘅人，依家就比你試吓喱句說話嘅真正意思囉！」盧毛就好像個勝利者咁用一個好不屑嘅語氣，講完轉身就走。
教畜︰「睇嚟你哋就淨係得果啲低B招數嚟玩我，我咪任你high一陣囉。依家睇吓邊個慘啲。依家你哋咁樣，個Final Exam就唔洗考咖喇，冇考個Final Exam咁我連DSE準考證都唔洗比你。」
小夫等佢哋走咗之後，將係會面室嘅情況講咗比我哋聽。咩社交網站上行為不當因為私隱同埋唔夠evidence所以作罷；欺凌同學就因為玩game大懲罰係灰色地帶所以佢屈我哋唔到。之但係侮辱老師就打唔甩，皆因盧毛同埋教畜一句搭一句唱雙簧，索性玩壟斷發言。
「張sir同我講佢哋無論係上堂定課後時間態度都十分頑劣。」「冇錯，佢哋會係學校範圍大聲嘲諷老師，為老師改一啲侮辱性嘅外號；故意上堂唔聽指令，駁咀駁舌；甚至企圖傷害老師，例如批踭。」「你可以聽到喇，而且我哋有晒班上同學做證人。所以小懲大誡係必須嘅。」「冇錯，Mrs. Lo」「根據校規，侮辱師長可以記缺點；擾亂課堂秩序可以嚴懲。所以我哋已經罰輕咗，希望唔會影響太多佢哋考DSE。」「今次我哋絕對希望十個同學可以反省一吓，而且專心準備公開考試。」
聽完之後，我哋個咀簡直O到大一大。原來一場辯論唔係有道理有evidence果邊贏。只要你有足夠肺活量，死唔斷氣咁講，你依然可以取得壓倒性嘅勝利。
阿風︰「喂，咁撚樣都得呀！」阿風個樣想走去殺咗盧毛咁。
小夫︰「所以我哋除咗一入去果吓，之後根本冇得發聲，任佢講。」
威廉︰「都話咖喇，佢入到會談室，係佢主場，人多勢眾，佢想點玩都得。而且你老豆又係局外人，都唔知成件事，好難做到嘢。」
阿風︰「咁你又有咩橋呀，馬後炮王。我哋全部人睇你頭，你就仲咁淡定。」
威廉︰「淡定皆因等待最佳時機，下星期一返到嚟包你有嘢睇。」我又見到果個令人心都寒埋嘅笑容。
比利︰「姐係仲要停多兩日呀？」
力仔︰「都唔差在喇，還掂係度溫書好過聽班廢柴老師9up。」